Read Mousgoum Seŋ joro 24 Bible Online

Seŋ joro 24 - Mousgoum bible

Seŋ joro 24

¹Ku za sile siɗi ɗai na maafanai kai, ku paya aŋ dinga payaiku gaiɗi kai.

²Buri ɓa hiiniɗi a tika ɗa midini karai, miɗi a muɗa ɗa sai gaini meefeŋ n’aga e ziŋ ɗa.

³Gaini yel ɗa dilimi te kiɗa te rga amai, gaini siɗi ɗa te kiɗa te ɗiya gdeŋi.

⁴Gaini siɗi ɗa, dalamai n’amlai warɗi a va, gaini wazagai na juvai, na pɗamai lai.

⁵Ɗif zi yel ɗa spak gara, zi siɗi ɗa a riya gdaŋni amai.

⁶Na ɓa ku ɗif na ku sɗa yelni hatam ɗa, ku kiɗa ku hitima, rɗi n’amai ɗa a za sini vokɗi ɗai n’e si gadai ɗa.

⁷Burini ɗif na tatala ɗa, yel ɗa a na amai gaigai maiɗi huwuŋ nɵa, a kiɗa a muɗa seŋ war faada kai ɗa buri hanɗa.

⁸Ni n’a hiina warni aŋ zi meefeŋ ɗa, aga e yikiŋ ɓa: "Epini sda na meefeŋ".

⁹Hiini na wiini gɵibi ɗa, a tuwur tar, ɗif n’a ɵina seŋni ɗif kai ɗa a tala arɗi ɗai aŋ wala na hi-hir.

¹⁰Na ɓa, war mefeŋ zi gir ku ɓa arai zi pi na wiiku edi ɗa, gdaŋku ɗa a n’a kiɗa wala kai.

¹¹Ɗif n’e rgiŋ daŋgai aŋ fiɗiŋ edi ɗa, ɵaŋ, nagai n’e ɵûûri war kiɗi n’edi aŋ fiɗi ɗa, kûrɗiɗi edi.

¹²Aga ku muɗa kai ɓa: Tiyi mi siɗiŋ ɓa a na ɵa kai, ni n’a guɵura agul paŋ ɗa ni a sɗaŋ kai ɗi? Ni n’a tika hangalni suku ɗa, ni a sɗa kai ɗi? Aga a sa sini asiya asiya ɗi paŋ vrak na pini sdani sdani!

¹³Ahiya, suma emelni ami ɗa, buri ɓa a wala na pɗem buriku, aga ku sɗa pɗemni war muku.

¹⁴Yimaŋ muduku pɗem ɓa, yel ɗa a na buriku maini hanɗa nɵa lai, na ɓa ku navaŋ li ɗa, dawai sek ɗa aga ku nava. Biyi na pini ɵeɗ na wiiku aga a ɓa edi kadai kai.

¹⁵Tuku ɗif na meefeŋ, ku ruɓta mini magalani ɗif na jre ɗa kai, ku tuura dalamni kaalai.

¹⁶Buri ɓa ɗif na jre ɗa, koo ɓa a kɵa azi muguzak ɗi, aga a faka amai ɗaai, amma ɗai na maafanai ɗa, eziɗi a wula ɗa war gir.

¹⁷Ku firiya pini kɵi na wiini gawku ɗa kai, na ɓa ezini a wula li ɗa, ku pra amai gaini firiyi kaalai.

¹⁸Sla kai ɗa, Won hlai n’EPIƊ-ƊAI a tala hanɗa li ɗa, aga a sini firiyi kai, a tika hiyni edi midini par lai.

¹⁹Ku za hiy siɗi nagai n’e zi meefeŋ kai, ku za sile siɗi na maafanai ɗa kaalai.

²⁰Buri ɓa ɗif n’a za meefeŋ ɗa, dawaini t'aŋ kai, suŋfaɗi ɗai na maafanai ɗa, a na maini lampa n’a mra nɵa.

²¹Ahiya, zini hormo wiini EPIƊ-ƊAI gaini pai, ku tapa gaiɗi nagai n’e firiyi ɓa wazagai paŋ a bunda hahakai ɗa kai.

²²Buri ɓa, gir na wiiɗi a kiɗa a luɓasi midiɗi tizaw tar, gir n’EPIƊ-ƊAI zaw pai a kiɗa a ɵinaŋsi midiɗi ɗa, a sɗaŋ ɗa asiya ɗa?

²³Gadai hanɗa, e siŋ ɗa e ɗi ɗai na yalakai ɗaai: Won hlai na ku ziti sariya ɗa, ku ɵa puku pini ɗif ktai par kai, pɗem kai.

²⁴Ni n’a miɗini wiini ɗif na meefeŋ: ku na jre ɗa, firiɗi ɗai aga e miɗi seŋ na maafanai sini, ɗai aga e bili gaw sini.

²⁵Amma nagai n’e kûti sariya midini ɗif na meefeŋ ɗa, e zi ɗa a sda na pɗem, ɓiki n’abai aga a sumna midiɗi.

²⁶Ɗif n’a wuyuku seŋ war jreni ɗa, a ɗif n’a duruku.

²⁷Za sdaku n’edi par gaini futini, zizina vuwaiku gaini futini lai, asakal hanɗa, ku kiɗa ku mula fuŋku.

²⁸Ku muɗa zaida z'eles midini maiku aŋ blaŋ kai, ku dara ku za eles ɗi?

²⁹Aga ku muɗa kai ɓa, zi n’a zaŋa na ɗa, ta aga mu ziŋni ɵa lai. Aga mu za sini asiya ɗi paŋ pini sdani, ku muɗa ɵa kai.

³⁰Mefeŋ ktai mu vuga ɵimani vuwai na wiini ɗif na malam ɗaw, ɵimani vuwai zi luwuŋ zi vin na wiini ɗif na yel midini kai ɗaw.

³¹Duvudvud a tika hlai ɗaw, hlai paŋ ɗa a vek na maafanai kiini, ɵagai na sini ɗe gaini hiɗi azumai ɓaw lai.

³²Ta, mu mula ara sini, mu tika pa mu hiina, mu talaŋ haa a yima mada ɗa ɓa:

³³Na ɓa, ku kala weseŋ burini hlai n’agwi, ku dunra burini hlai n’agwi, ku maaɗa suku azumai burini hlai n’agwi, ku ɵawa tuku burini hlai n’agwi lai ɗa,

³⁴war hlai hanɗa murga ɗa aga te nuvukusi aha maini ɗif zi sipili nɵa, haw ɗe a luɓasi muduku maini ɗif zi virmi wazagai nɵa lai.