Read Mousgoum Seŋ joro 25 Bible Online

Seŋ joro 25 - Mousgoum bible

Seŋ joro 25

¹Hanɗa a seŋ joro zamai zamai na wiini Salmun na ɗai na wiini Ezekiyas pai na Yuda e ɗûŋ.

²Abai na wiini Alaw ɗa a sdani n’a zaŋ war ŋoyai, na wiiɗi paakai ɗa a siŋki n’edi na wiini wazagai zi ŋoyai ɗa lai.

³Mogoni hlai n’amai, hulumni afti n’azumai, gaini agulɗi paakai lai ɗa ɗif a kiɗa a vadaŋ kai.

⁴Yima flaini arzaŋ ɗa edi, n’a hina hilu, ɗif zi hiliyi kawakai aga a za grak na pɗem ktai gaini.

⁵Burga ɗif na meefeŋ ɗa edi sini pai par, paini aga te ɗiya gdaŋ, aga a za sda war jre.

⁶Wuzani pai ɗa, ku za suku aŋ ɗif n’abai kai, ku tika sumna war hlaiɗi ɗai n’abakai kaalai.

⁷Na ɓa e muɗuku ɓa, halasi nsek ɗa pɗem, a suwa n’e burkukuɗi azumai par burini ɗif n’abai n’a cosi blaŋ ɗa.

⁸Ku purma aŋ muɗa gaini wala n’arku a talaŋ wuzaɗi sariya kai, na ɓa gawku a mulaŋ li edi puku ɗa, kapai ku za suku maɵa ɗa?

⁹Na ɓa seŋ a za li arbaku gaini maiku ɗa, ki vidiŋ arbaki, amma asir na wiini maiku na zamai ɗa ku hinaŋ warku.

¹⁰Sla kai, na ɓa a ɵina li ɗa, aga a miisuku, seŋ na maafanai n’a niyaɗi muku par ɗa, a tiɗa a wayasi warku kir kai.

¹¹Seŋ n’a muɗa war sartini pɗem, maini wala n’e ziziniŋ gaini or n’e tiki arzaŋ arbani ta ta aŋ juf ɗa ɵa.

¹²Gadai na wiini ɗif zi yel ɗa burini ɗif n’a ɵina seŋ ɗa, a na maini aidaw zi or na gaini futini nɵa.

¹³Sleŋ na jre ɗa a sini gdaŋ wiini ni n’a ɵinaŋ, wiini epin-gezani, maini yem na ɗarak na war hlai z'afu nɵa.

¹⁴Ɗif n’a ɵina ha ɓa aga a sa katu, amma a saŋ kai ɗa, a ɗugul gaini smer n’a ɵa faŋ kai ɗa.

¹⁵Gaini sabur ɗa hiinini ɗif n’a ɗûûkliti sariya a kiɗa a bundasi, miɗi na nem ɗa a kiɗa a haɗasi hiinini ɗif.

¹⁶Na ɓa ku nava emelni ami li ɗa, suma midini kiɗiku ta, ɵa kai na ɓa a suwa li ɗa aga ku hunvaŋ edi.

¹⁷Ku hala ahani maiku goz goz kai, a kaya li tuku ɗa, aga a tika pini a miisuku.

¹⁸Ɗif n’a muɗa zaida z'eles midini maini ɗa a na, a na maini kol kol, zaw kaɵkar, zaw ɓurwi na miɗi suweɗ nɵa.

¹⁹Ɗif n’a sini asirni wiini ɗif na jreni aŋ kai war mefeŋ zi gir ɗa, a na maini ɗif n’a suma wala midiɗi seseyiŋi na te muguza, zaw n’a ɗiya midiɗi azi na hurufi nɵa.

²⁰Ɗif n’a foko sapa sini maini par arni smer n’a ɵaɗa gara, ni n’a ma vinegre mini wuruk, gaini ni n’a ɵa dawaŋ mini ɗif n’aŋ war gir ɗa lai ɗa, e ɗi ɗai ktai.

²¹Na ɓa gawku aŋ gaini wiyamai ɗa, sini simi, na ɓa sai te zaŋ ɗa, sini yem a ca lai.

²²Na ɓa ku na zaŋ nɵa ɗa, ku koto midini na ɗa a luɓusni afu, EPIƊ-ƊAI aga vurguŋku.

²³Smer na war gal n’azumai par ɗa a ɵa faŋ miɗi z'eles ɗa a raka arni ɗif amai.

²⁴Rûki n’ezni hlai rok ɗa pɗem, a suwa simni n’aha gaiɗi muni zi hiy ɗa.

²⁵Labar na pɗem n’a halasi edi midini afti na gaigai par ɗa, a na maini yem na ɗara n’a niya wulani ɗif n’a mra mri tiɗi sai ɗa nɵa.

²⁶Ɗif na jre n’a ziriya wuzani ɗif na meefeŋ ɗa, a na maini hlai zi liwi zaw kiliŋi na yemɗi aŋ gaini dûrgûzi amai ɗa nɵa.

²⁷Simini emelni ami na viya ɗa pɗem kai, piyini kol n’a suwa li viya ɗa, pɗem kaalai.

²⁸Ɗif n’a ɗala sini warni hiy kai ɗa, a na maini fuŋ n’abai na ɵaga sini kai ɗa nɵa.