Read Mousgoum Seŋ joro 27 Bible Online

Seŋ joro 27 - Mousgoum bible

Seŋ joro 27

¹Ku kola suku buri dawai kai, buri ku sɗa n’aga a za girna ɗa kai.

²Hina ɗif zamai a kuluku gaini yama, amma tuku dama ku kola suku kai, hina ɗif n’edi par a za hanɗa, amma tuku ku zaŋ kai.

³Ahi-fuŋ ɗa guma, kai kai ɗa ɵa lai, amma hiy na wiini ɗif zi dûûli ɗa gumani a suwa pra.

⁴Hiy n’abai ɗa a wala na sabaɓ gara, hiy ɗa a na maini ra n’a huŋva edi nɵa, amma sile ɗa, n’a kiɗa a ɗiya mini ɗa asiya ɗa?

⁵Ɗif n’a suŋkuku meefeŋku edi gaglai ɗa pɗem, a suwa marmai na kus kus ɗa.

⁶Wuruk na marmaiku a zuŋku ɗa a siŋka dirini edi, amma gûbi na gawku ɗa a gûbuku ɗa, a rhai meere.

⁷Ɗif na gaini vi ta ɗa a kirpa emelni ami ɗa azumai pini ezini, ɗif na wiyamai blaŋ ɗa, a wala na ɗewek maa a sɗaŋ mini nem.

⁸Ɗif n’a na gleŋa edi gaigai sini aftini par ɗa, a na maini wala ɗufli na gutni a wula arni ɗa nɵa.

⁹Emel gaini wazagai zi ɗûgûdi zi lûgûzi ɗa a sa firiyi wiiɗi agul, pɗemni marmai ɗa a suwa arai zi-pi na ku saŋ suku kiiku ɗa.

¹⁰Marmakaiku gaiɗi marmakaini apuku ɗa ku hiniɗi edi kai, Won hlai na k’aŋ war gir ɗa, ku hala ahani tawalku kai, ɗif n’aŋ ɵimaku gobi ɗa, a suwa tawal n’aŋsi gaigai ɗa.

¹¹Ahiya, za aŋ ɗif zi yel, agula aga te firiya lai, na ɓa ɗif a tirkaŋa kaw ɗi ɗa, mu kiɗa mu wiyini seŋ.

¹²Ɗif zi yel ɗa Won hlai n’a tala gir a na halasi a ŋoya cok, amma nagai na gaini niyi kai ɗa e hili arni sek, e hini e siɗi gir lai.

¹³Na ɓa ɗif a yima sini li mini tumuŋ na wiini ɗif na morkoi ɗa ku militi kaputni, na ɓa a ɗiya li eziɗi muni na morkoi ɗa, a suku kaa wala ktai ta haw.

¹⁴Ɗif n’a halasi a ɵiɓa wuti wiini maini gorof gaini wûle na gdaŋ lai ɗa, wuti hanɗa a tala maini tirki ɵa.

¹⁵Muni zi hiy ɗa te na maini baŋa na midini dalam na faŋ a ɵa li ɗa tiɗiwiini a ɗiya kai ɗa nɵa.

¹⁶Ɗif n’a firiya a cikiti ɓa te za hiy kai ɗa, a maini ɗif n’a firiya a caka smer ɓa a ka kai, zaw n’a yima emel n’a naka gaini tini.

¹⁷Kawai a zaŋ edi hiniŋ ɗa a maini, ɗif ɗe a zizinaŋ ɗa a maini lai.

¹⁸Ɗif n’a tika hangalni siɗi luwuŋini aga a suma aliɗi, ni n’a tika hangalni sini epin-gezani ɗa, aga a nava kol lai.

¹⁹Arni yem ɗa, arni ɗif a tala maini n’a na ɗa ɵa, war hiinini, ɗif a sɗa sini maini n’a na ɗa ɵa lai.

²⁰Hlaiɗi ɗai zi mri gaini waŋ na hulum na wiiɗi ɗai zi mri ɗa a va kai, suna na wiini ɗif murɗek ɗa a va kaalai.

²¹Or gaini arzaŋ ɗa a tetemaŋ ɗa a afu, amma ɗif murɗek ɗa ku sɗaŋ ɗa sini yikini n’a wa ɗa.

²²Ɗif zi dûûli ɗa, koo ɓa ku gzilaŋ warɗi adini arni seyem gaini aruwadiŋ tekeɗeɗi ɗa gɵibini a tika edi sini par kai.

²³Sɗa faraiku ktai ktai paŋ, tikini hangal wiini faraku lai.

²⁴Buri ɓa farai a hina kureɗ kai, abai ɗa ɗe te hina war pinziba ɵa kureɗ kaalai.

²⁵Sliɓa evek azumai, kuzum na hahakai a diyasi li ɗa, ku mulasi kuzum na hûleŋ na amai sini huwuŋ par ɗa,

²⁶wula adumai kapai ku za sapa suku gaini ayirni, wula afukasai, ku sklaŋ edi ku wura vuwai zamai pra,

²⁷ku wula haakai viya kapai a za fiyaw viya, fiyaw ni ɗa, tuku gaini dalamku gaiɗi bagakaiku na falakai paŋ aga ki simi warni.