Read Mousgoum Seŋ joro 28 Bible Online

Seŋ joro 28 - Mousgoum bible

Seŋ joro 28

¹Ɗif na meefeŋ ɗa a lawa kiini koo ɓa ɗif a birga pini par kai, amma ɗif na jre ɗa, a hala gaini hangalni maini ahini gurnai nɵa.

²Won hlai na dûrgûzi a faka li midini afti ɗa, n’abakai n’e ɵi wuze e bindi viya, amma na ɓa ɗif zi ɵi wuze na yel, zi siɗi lai a na ɗa, hlai paŋ ɵeɗ.

³Ɗif na murga n’a ziɗi gir wiiɗi ɗai na hurafai ɗa, a na maini faŋ n’a ɵa abai n’a tuura seyem edi ɗa nɵa.

⁴Nagai n’e zi pini gadai kai ɗa, e kûli ɗif na meefeŋ ɗa, amma nagai n’e zi pini ɗa, e zi hiy sini.

⁵Ɗai na maafanai ɗa, e siɗi wala ktai war zi na pini gadai ɗa maa kai, amma nagai n’e piyi pini EPIƊ-ƊAI ɗa, e siɗi wala paŋ.

⁶Ɗif na murga na payaini jre ɗa, pɗem a suwa ɗif na payaini ɗikat kai ɗa, koo ɓa a zi farai.

⁷Ahi n’a za pini gadai ɗa ahi zi yel, amma ni n’a paya gaiɗi na fasakai ɗa a kasi ɗa a siyer midini epini.

⁸Ɗif n’a riya faraini amai gaini riba gaini yem na viya, a tipiŋni amai na ɗa wiini ɗif n’a na hiina haw buriɗi na murgakai ɗa.

⁹Ɗif n’a taka ɵimani tek kapai a zuɓura gadai ɗa kai ɗa, siiwa na wiini maa a wala na hi-hir.

¹⁰Ɗif n’a ka ɗif na jre edi warɗi futi na mafuni ɗa, aga a kɵa warni waŋ n’a blaŋ ɗa, amma ɗai na jreɗikat aga e nivi simni na muluk aŋ bulum.

¹¹Ɗif zi farai ɗa a sɗa sini ɓa a yel, amma ɗif na murga na yel ɗa a kiɗa a tetema yelni ɗa.

¹²Won hlai na ɗai na jrekai e rɗi li amai ɗa a firiyi n’abai, amma na ɓa na maafanai e tiki hlai li ɗa, ɗif paŋ a ŋoya sini.

¹³Ɗif n’a pa mini midini meefeŋni ɗa a nava kai, amma ni n’a muɗa meefeŋni edi, a hinaŋ edi lai ɗa a nava ni burini.

¹⁴Sleɗ aŋ midini ɗif na kureɗ a huna ɓa aga a za meefeŋ li, amma na hiriŋ ɗa aga a nava gir.

¹⁵Ɗif n’abai n’a ɵa wuze na meefeŋ, n’a ziɗi gir wiiɗi ɗai na murgakai ɗa, a na maini gurnai n’a nuuma nɵa, maini urs n’a pra aŋ yima wala nɵa.

¹⁶Ɗif n’abai n’a ɵa wuze na yel midini kai ɗa, a mula wazagaiɗi ɗai ɗa aŋ gdaŋ, amma ni n’a bla edi sini der na war jre kai ɗa, a fana viya.

¹⁷Ɗif na gumani belek aŋ midini ɗa, aga a lawa ɵa haa sini waŋni ta, ki fiɗi siki aŋ yimiŋ kai.

¹⁸Ɗif n’a paya war jre, wala a tetemaŋ kai, amma ni n’a yima wazagai tini sulu ɗa aga a ɓa mini na ktai ɗa.

¹⁹Ɗif n’a hirma vuwaini ɗa, simi aga a ɗuuklaŋ kai, amma na n’a kata wazagai war hiinini ɗa, a hina ɗa murga ɵa.

²⁰Ɗif na jre ɗa, aga a nava ɓiki viya, amma ni n’a purma aŋ za aŋ ɗif zi farai ɗa aga a mula miɗi sariya par kai.

²¹Tikini arɗi ɗai na wuzaɗi sariya ɗa pɗem kai, paŋ ktai ɗif n’abai a kiɗa a wa sini war tuwur hanɗa burini katu n’agwi kadai.

²²Ɗif n’a za sile sini wazagaiɗi marni ɗa, a lawa na pini farai, a sɗa ɓa murga te na halasi midini nɵa kai.

²³Ɗif n’a ɓara ɗif n’a na za meefeŋ ɗa, aga a bunda aŋ marmaini, a suwa ɗif n’a zini midini ɗa.

²⁴Ɗif n’a hala wazagaini epini gaiɗi emini, n’a muɗa ɓa a meefeŋ kai ɗa, a konpoli na wiiɗi gorɓolokai.

²⁵Ɗif na sunani a suwa viya ɗa a glasi sispai, amma ni n’a hina sini war tini EPIƊ-ƊAI aga a riya wuzani.

²⁶Ɗif n’a za paŋ pini hiini na wiini ɗa, ni a ɗif na tatala, amma ni n’a paya gaini yel ɗa wala aga tetemaŋ kai.

²⁷Ɗif n’a sa sini ɗif na murga ɗa, wala aga a suwaŋ kai, amma na jaani sini kai ɗa, tusa aga a sumna midini.

²⁸Won hlai na spak a sa li tiɗi ɗai na maafanai ɗa, ɗif paŋ a ŋoya sini, amma hlai n’e mri li ɗa, ɗai na jrekai e sisiɗi viya.