Read Mousgoum Seŋ joro 29 Bible Online

Seŋ joro 29 - Mousgoum bible

Seŋ joro 29

¹Ɗif na ɗai e sini gadai, amma a dara a yimaŋ kai ɗa, a mra ɵa, a bunda kir kai.

²Na ɓa spak ɗa aŋ war tiɗi ɗai na jrekai ɗa, ɗai a e firiyi, amma na ɓa a ŋa ɗa a ɗif na meefeŋ ɗa, ɗai e tûwi tini gir.

³Ɗif n’a firiya yel ɗa a sini firiyi na wiini epini. Amma ni n’a paya gaiɗi zawarai ɗa a ɓa faraini paŋ ɗa edi piɗi.

⁴Gaini jre ɗa, pai a riya der na midini aftini ɗa amai, amma ni n’a riya tar amai sek sek ɗa, a tuura edi n’a aftini lai.

⁵Ɗif n’a zini midini maini ɗa, a gaŋa wuzani ɗa a zaw.

⁶Azaw aŋ war meefeŋ na wiiɗi ɗai na maafanai ɗa, amma ɗif na jre ɗa a ɗuula gaini firiyi.

⁷Ɗif na jre ɗa a sɗa jre na wiiɗi na murgakai ɗa ya, amma ɗif na meefeŋ ɗa yelni a kiɗa midini hanɗa kai.

⁸Ɗai n’e ɵini seŋ kai ɗa e kisi tûrli war fuŋ n’abai ɗa, amma na yalakai ɗa e tiki hlai ɗa azumai.

⁹Na ɓa seŋ a niya li arbani ɗif zi yel gaini na tatala ɗa, koo ɓa a za hiy, koo ɓa a riya, a nava si-n’amla kir kai.

¹⁰Ɗai zi fiɗi ɗai ɗa e bili gaw sini ɗif na jre ɗa, amma ɗai na jrekai ɗa e piyi ɗa a ɗif na maini ni nɵa.

¹¹Ɗif na tatala ɗa, hiinini ɗa a ŋoya kai, amma zi yel ɗa a rodo sini, a hinaŋ a siŋkaŋ edi kai.

¹²Na ɓa ɗif n’a ɵa wuze ɗa, a zaga ɵimani mini seŋ z'eles ɗa, ɗai na pini paŋ e bindi maafanai paŋ.

¹³Ɗif na murga gaini ni n’a zini gir ɗa, wala n’a tipiɗi a na, a siɗi arai wiiɗi nagai sulu paŋ aŋ tili gaini ɗa a EPIƊ-ƊAI.

¹⁴Pai n’a zitisariya wiini ɗif na murga war jreni ɗa, paramaini zi pai aga te ɗiya gdeŋi haa kureɗ.

¹⁵Daɓala gaini gadai ɗa a sa yel, amma arwagwi n’e ɵiɓiŋ kaalai, n’e gidiŋ kaalai ɗa siyer na midiɗi emini.

¹⁶Won hlai na ɗai na maafanai e ɗa viya ɗa, meefeŋ ɗa a riya amai sek, amma mefeŋ ktai na jrekai aga e tiliɗi e kɵi azumai.

¹⁷Gada ahiku ɗa aga ku nava si-n’amla, suŋfaɗi agulku aga a va gaini firiyi lai.

¹⁸Na ɓa ɗif na mini Alaw n’a tala wazagai n’aga za dawai sek aŋ kir kai ɗa, ɗai e piyi pini jaaɗi, amma ni n’a za pini ɗû ɗa ɵeɗ midini.

¹⁹Bege ɗa, e gidiŋ gaini miɗi kadai kai, koo ɓa a ɵina tekeɗeɗi aga a za pini seŋ ni kai.

²⁰Ku nava li ɗif n’a muɗa seŋ gaini hiini kai ɗa, na ɓa ku pɵa midini ɗa, marya pɵa midini ɗif na tatala ɗa.

²¹Bege n-epini gezani a glini wulani gaini gili warni agwiyeŋeni par ɗa, aga a za aŋ ɗif n’a siɗa sda kai.

²²Ɗif na maswar ɗa a faka sispai gara, ɗif n’a ziy gara ɗa a riya meefeŋ ɗa amai sek sek lai.

²³Ɗif n’a kola sini ɗa, aga a hosa azumai, amma ni n’a hosa sini ɗa aga a nava kol.

²⁴Konpoli na wiini ɗif zi mihill ɗa a za na meefeŋ wiini sini dama, buri ɓa a ɵina seŋ na maafanai n’e ɗa miɗiŋ sini ɗif zi mihill ɗa, amma a dara a wiini pini amai kai.

²⁵Ɗif n’a huna wuzaɗi ɗai ɗa aŋ gaini yimi war azaw, amma ni n’a hina sini war tini EPIƊ-ƊAI ɗa, wala na meefeŋ a tetemaŋ kai.

²⁶Ɗai viya e firiyi ɓa ɗif n’a na ŋa ɗa a siɗiɗi, paŋ ktai a ziti sariya na gaini futini wiini ɗif ɗa a EPIƊ-ƊAI.

²⁷Ɗif na meefeŋ ɗa a tala arɗi ɗai na jrekai ɗa hi-hir, ɗif n’a paya payai na ɗikat ɗa ɗe, a tala hi-hir arɗi ɗai na maafanai ɗa lai.