Read Mousgoum Seŋ joro 31 Bible Online

Seŋ joro 31 - Mousgoum bible

Seŋ joro 31

¹Hanɗa a gadai na Lemuwel pai na Masa a navaŋ siɗi emini par.

²Ahiya, ahiya na wara par, ahiya na mu piyuku gaini piyi na caŋ gara, mu muɗuku zamai na maɵa?

³Ku hiniɗi falakai e vidiku gdaŋku edi kai, ku hina suku tiɗi falakai n’e biɗi paakai edi kai.

⁴A wiiɗi paakai kai, Lemuwel, vin ɗa a wala n’a juva siɗi paakai kai, sul ɗe a juva siɗi n’abakai kaalai.

⁵Buri ɓa e ci li ɗa, midiɗi a wula gadai ɗa, aga e ziti sariya wiiɗi na murgakai war jre kai.

⁶Sul ɗa e siŋni ɗa wiini ɗif n’a mra mri, vin ɗa ɗe e siŋni wiini ɗif n’aŋ war kwimi.

⁷A ca li do ɗa, midini a wula gaiɗi murgani skeŋ, midini a kɵa gaini girni kir kai.

⁸Amma tuku, won hlai na ku dara ku muɗa seŋ ɗa, zina piɗi nagai na miɗi a tika amai kai ɗa, gaiɗi nagai na ɗif n’a zina piɗi aŋ kai ɗa.

⁹Muɗa, ziti sariya war jre, na haw gaini na murgakai ɗa, ku ɵa puku gaiɗi par.

¹⁰Muni na pɗemi ɗa, n’aga a niviti asiya ɗa? Wiriɗi ɗa abai a suwa aidaw na wûrini caŋ gara ɗa.

¹¹Hiinini mafaɗi paŋ a tika midiɗi, te nafaŋ viya.

¹²Haa sini mriɗi ta, te zini ɗa a pɗem ɵa, te zini wala na meefeŋ duk kai.

¹³Te payasi ayirni adumai gaini leŋ ɗa, te za sda gdaŋ gaini tiɗi, gaini firiyi.

¹⁴Te na maini hulomai n’abakai na wiiɗi ɗai zi sakala ɗa nɵa te payasi simiɗi gaigai par.

¹⁵Te faka amai gorof n’abai, te da simi miɗi ɗai n’ahaɗi ɗa, te kata sda tiɗi falakai zi sda na wiiɗi ta ta.

¹⁶Vuwai n’a yima li arɗi ɗa, sai te wura, gaini der na te navaŋ war gdaŋɗi ɗa, te za zardeŋ na wiini luwuŋ zi vin.

¹⁷Te za sda gaini gdaŋɗi paŋ, te mula tiɗi piɗi kadai ca kai.

¹⁸Te sɗa ɓa sdaɗi a na hala pɗem, lanpaɗi te mra kai haa duvuk n’arba.

¹⁹Tiɗi a dubura ayirni adumai ɗa, ali tiɗi a ha sapa ɗa lai.

²⁰Te zina piɗi ɗai na haw, te sa siɗi na murgakai lai.

²¹Te huna hlai na ɗarak ɗa kai, buri ɓa, ɗai na ahaɗi ɗa, ɗif paŋ spakni sulu sulu.

²²Te zizina burgu wiiɗi na dama, sapa na wiiɗi azi leŋ na gaini futini gaini na mekele pur pur ɗa lai.

²³Won hlai na ɗai e diŋgi li war faada ɗa e sini hormo wiini mafaɗi, mafaɗi a sumna war diŋgi na wiiɗi n’abakai n’arbaɗi ɗai na war fuŋ n’abai ɗa lai.

²⁴Te ha sapa te sklaŋ edi, te za santir te wuraŋ edi tiɗi ɗai zi sakala n’e vigi ɗa.

²⁵Te muni na gaini gdaŋɗi gaini hormoɗi, te hûniti dawai kai.

²⁶Te muɗa seŋɗi paŋ gaini yel, te sa gadai na pɗamai.

²⁷Te tika hangalɗi sini hiliɗi pakataiɗi, te ɵawa tiɗi ca aŋ baiya simi kai.

²⁸Aliɗi e miɗi gaiɗi wuzaɗi ɗai paŋ ɓa te muni zi barka, mafaɗi a kûliti lai.

²⁹Aga a muɗa ɓa: Falakai n’e fiɗi was ɵa viya, amma tuku ku sûwiɗi kafa.

³⁰Juf gaini pɗem a na burini hlai n’agwi kadai, amma muni na te sini hormo wiini EPIƊ-ƊAI ɗa, te na n’aga te nava kol.

³¹Hiniti te suma pini sdaɗi na te zaŋ ɗa, A juva ɓa ɗai na war fuŋ n’abai ɗa paŋ e kûliti gaini yama burini sdaɗi ɗa.