Read Mousgoum Seŋ joro 5 Bible Online

Seŋ joro 5 - Mousgoum bible

Seŋ joro 5

¹Ahiya, tika hangalku sini yel na mu na hitraŋ ɗa, zaga ɵimaku mini siɗi na wiya ɗa,

²kapai ku za aŋ ɗif n’a giɗima seŋ war humokni, aga ku sɗa wala na ku muɗaŋ ɗa lai,

³Buri ɓa miɗi muni zi zawar ɗa a kasi warni par ɗa a emelni ami, seŋ na miɗi par ɗa gilɓu a suwa emel.

⁴Amma sini dibini ɗa te bunda ɗuwuki maini mugu nɵa, miɗi a suma gara maini kaɵkar n’a suma tini sulu paŋ nɵa.

⁵Payaiɗi muni hanɗa a ka mini mri, futiɗi a ka war hlai zi simni na wiiɗi zi mri sek.

⁶Te tikiti ɗa te futi na wiini suŋfa kai, hlai na futiɗi te daba woni ɗa te sɗaŋ kaalai.

⁷Tiyana ɗa, aliya, ɵini pɗem, ki hini seŋŋa na mu miɗiŋki ɗa edi kai.

⁸Ku yima suku edi siɗi muni na nɵa par, ku guna mini hlaiɗi gobi kai.

⁹Sla kai ɗa aga te tika barkaku edi, te dubuku muduku tini ɗif na hiinini haw warni kai, aga a zuku asar.

¹⁰Sla kai ɗa, gdaŋku aga a vada warɗi ɗai n’edi par, derku na ku navaŋ gaini gir ɗa paŋ a hala ahani ɗif zamai sek.

¹¹Sini vidi ɗa, ku hina gdaŋ warku kir kai, ku hina waŋ aŋ nuuma maini gurnai ɵa.

¹²Nɵa aga ku tika puku ku muɗa ɓa: Mu bula edi sini hitrai tiɓ na ɗa buri ma ki ɗi ɗa? Mu yima yimi gadai ɗa wiya kaai ɗa kaai!

¹³Mu ɵina miɗi tamai zi gadai ɗa kai na ɗa, maɵa kiɗa ɗa? Mu zaga ɵima mini hitri na wiiɗi kai na ɗa maɵa ɗa?

¹⁴Tiyana ɗa, gaini yafai kai, mu niya li war gir n’abai, arbaɗi ɗai na doogo gaini vokɗi ɗai lai.

¹⁵Ca yem na war kiliŋiku tuku mal, yem n’a liwa warɗi kiliŋiku ɗa.

¹⁶Ku hina yemku zi liiwi a ka anene warɗi futi kai, ku hinaŋ a ka war hlai na ɗai doogo e tipi woni ɗa kaalai.

¹⁷A wiiku tuku pal, ku ɓurwaŋ gaiɗi ɗai zamai kai.

¹⁸Yem zi liwi na wiiku ɗa a nava ɓiki, ɵa dawaŋ gaiɗi muni na ku tikiti gaini gawlaku ɗa.

¹⁹Muniku te tala juvi maiɗi buryimu ɵa, hiŋgeli maiɗi wudrai ɵa. Ciina tini fiyaw na miɗi hlai paŋ. Ku piyiti te na bas.

²⁰Ahiya, ku piyiti te muni zamai tiɓ buri maɗa? Ku murɵa fiyaw na miɗi muni na ku siɗiti kai tiɓ ɗa buri maɗa?

²¹Buri ɓa futiɗi ɗai ɗa arni EPIƊ-ƊAI aŋ sini paŋ. A na tika hangalni sini futiɗi na agogoi paŋ lai.

²²Meefeŋ na wiini ɗif na meefeŋ ɗa a ɵaŋ daŋgai, tuwurni ɗa a ɵawaŋ maini azaw ɵa.

²³Aga a mra buri ɓa a nava hitrai kai, dûûlini na viya ɗa aga a baŋ edi.