Read Mousgoum Seŋ joro 6 Bible Online

Seŋ joro 6 - Mousgoum bible

Seŋ joro 6

¹Ahiya, na ɓa ku yima suku li mini tumuŋ ezini maiku, na ɓa ku ɵiɓa tuku li war tini epin-gezani wala, ezini ɗif ɗa,

²na ɓa ku yima suku li war azaw gaini seŋ na muku par, ku rga suku li gaini ɵinini-ha na wiiku lai ɗa,

³ahiya, kapai ku pla suku edi ɗa, za maini nɵa: Hala siiwa epin-gezani wala ɗa, siika mini, buri ɓa ku kɵa war tini su.

⁴Ku nava futini kai ɗa, ku sumna azumai kai, ku arku kai, ku kala weseŋ kaalai.

⁵Pla suku edi tini par maiɗi hudrai na te pla siɗi mini azaw par ɵa, maini wala zi ɗufli n’a prasi edi war kurbuduk par ɵa. Ɗif na malam

⁶Tuku ɗif na malam, tala sini teler ɗa, tala sdani ɗa, bunda aŋ ɗif zi yel,

⁷Teler ɗa paini aŋ kai, ɗif n’a tala sda tini aŋ kai, abaini aŋ kaalai.

⁸Gaini hanɗa paŋ ɗa, a fat ɗa a paya walani zi simi ɵimani, sarti na wiini hiɗi ɗa a tapa simi n’a kiɗa a zina pini war mefeŋ zi gir ɗa.

⁹Tuku na malam, suku azumai ɵa waŋ haa kaswa ta ɗa? Kapai ku ɵiya amai ɗa kaswa ta ɗa?

¹⁰Na ɓa ku kala weseŋ burini hlai n’agwi, ku dunra burini hlai n’agwi, ku maɗa suku edi burini hlai n’agwi lai ɗa,

¹¹war hlai hanɗa, murga aga te nuvukusi aha maini ɗif zi sipili nɵa, haw ɗe a luɓasi muduku maini ɗif zi virmi wazagai nɵa lai.

¹²Ɗif n’a hala gaini eles mini kaai ɗa, a ɗif n’a nava kai, ɗif na meefeŋ.

¹³Ɗif a muɗa gaini arni lai, gaini ezini lai, gaini ali tini lai.

¹⁴Agulni te va gaini rhai, sai a hiina ɗa a sda na maafanai, a digizila humokɗi ɗai siɗi marɗi lai.

¹⁵Ni lai, ɓilki n’edi aga a cosi midini tizaw, aga a tuura edi ti dama, kurgumni aŋ kai,

¹⁶Wazagai n’EPIƊ-ƊAI a daraŋ kai ɗa a na ɵaara: Tili zi miisi, alsi na te viiɗa seŋ, ti na te fuɗa ɗai na tiɗi war seŋ kai. Agul na te hiina ɗa a wazagai na maafanai, azi n’a purma mini zini meefeŋ. Zaida na jre kai n’a muɗa eles, n’ag'aŋ muguzak a na lai, a hanɗa: Ɗif n’a digiɵiɗi tawalakai siɗi marɗi.

²⁰Ahiya, yima gadai na wiini apuku muduku, hitrai na amuku te suŋku ku hinaŋ edi kai.

²¹Ku duɓugaŋ sini hohotku pɗem, ku rgaŋ wulaku maini aidaw nɵa.

²²War hiliku gaini wiyikusi ɗa aga a ɵa wuzaku, war feŋku n’azumai aga a giɗimuku, war fikuku n’amai ɗa aga a haɗa kalaŋ gaiku.

²³Buri ɓa gadai ɗa a lampa, hitrai ɗa a gaglai, gadai na war hitrai ɗa, a futi n’a ka sini suŋfa,

²⁴a kutuku miɗi muni na payaiɗi meefeŋ ɗa par, mini miɗi na zubet n’aŋ miiɗi muni na ku siɗiti kai ɗa par lai.

²⁵Ku za suna pini juf na wiiɗi muni kai, hina arɗi na te dugunku a tunuku kaalai.

²⁶Muni na zawar ɗa, te paya ɗa a wala n’agwi kadai, amma muni na gaini tiki ɗaw ɗa, te ɓa derku ɗa kap.

²⁷Na ɓa ɗif a wa afu war ɵubuni ɗik ɗa, sapani ɗa a ya kai ɗi?

²⁸zaw na ɓa ɗif a hala midini morjo gaini ezini ɗa, afu a yaŋ ezini kai ɗi?

²⁹Ɗif n’a piyiti munini maini a na maini nɵa lai, a titimiti li ɗa aga a nava seŋ lai.

³⁰Ɗif n’a hala wala kapai a va warni gaini buri ɓa wiyamai te na zaŋ ɗa, ku zini yewere kai.

³¹Amma gaini hanɗa paŋ, na ɓa e niviŋsi li ɗa a vurga wala ni ɗa azi muguzak, a ɓa wazagai n’ahani ɗa paŋ.

³²Ɗif n’a za maɵara gaiɗi munini ɗif ɗa, a ɗif na yel midini kai, ɗif n’a za maini hanɗa nɵa ɗa a ɓulka ɗa a sini.

³³Aga e ɵiɓiŋ lai, a ɓa hormoni edi lai, siyerni ɗa a vada edi duk kai.

³⁴Buri ɓa sile aga a bunda mafaɗi muni maswar, yuvai n’a firiya a vurga meefeŋ ni ɗa, aga a zaŋ gaini hiinini haw kai.

³⁵Wala ktai n’aga a hiinaŋ aŋ vrak burini meefeŋ hanɗa aŋ kai, koo ku sini ɗa a maɗi, aga a ɗiya sini kai.