Read Mousgoum Seŋ joro 7 Bible Online

Seŋ joro 7 - Mousgoum bible

Seŋ joro 7

¹Ahiya, muduku a wula gaini seŋŋa kai, gadaiŋa zi ɗiyi ɗa ku yimaŋ maini derku nɵa,

²Na ɓa ku firiya ku sumna karku ɗa, ku wula muduku gaini gadaiŋa kai, Ku giɗima hitraiŋa maiɗi arku ɵa.

³Ku hinaŋ a mula tuku par kai, ku ɗoŋ warɗi agulku ɗo.

⁴Ku yima yel ɗa maiɗi tawalku na muni nɵa, ku yika siɗi ɗa maiɗi marmaiku nɵa lai.

⁵Wazagai na sulu hanɗa aga a kutuku miɗi muni zi zawar ɗa par, miɗi muni na ku siɗiti kai na seŋ na miɗi zbet ɗa par.

⁶Mefeŋ ktai, mu na arni fenetir na wiiɗi dilimiŋa zaw, mu tala ara arni vitir ɗa ɗaw.

⁷Mu tiliɗi gawlakai na gaini ŋiyi kai piɗi marɗi yaw, ktai arbaɗi a tala ara yelni gulai.

⁸A niya warɗi futi na wiiɗi ɗai zi sakala ɗaw gobi sini hlai na muni zi zawar t'aŋ woni ɗa, a tikiti futi na ahaɗi sek ɗa.

⁹A za na ɗa koskoi na futi te nawa sek, na hlai a za gegeŋ sek ɗa.

¹⁰Muni ktai te halasi mini, sapa siɗi maiɗi muni zi zawar nɵa, te muni zi tini ɗai.

¹¹Te muni zi tûrli hlai na siyer pini arɗi kai, piɗi a tika aha kai.

¹²Te baiya ɗai hlai paŋ: war futi paŋ, war hlai na ɗai e tipi woni ta ta ɗa paŋ, ezini hlai paŋ lai.

¹³Te yima gawla ɗa, te kɵa amai wulani, te miɗini gaini siyer agwi ma arɗi kai:

¹⁴Mu za ɵinini-ha wiini Alaw buri mu zini ɓaka zi ɵeɗ, girna mu vadasi li gaini ɓaka ni ɗa.

¹⁵Mu niyasi anene muku, aŋ piyuku na ɗa buri hanɗa, tiyana mu nuvuku ya lai.

¹⁶Mu zizinasi liŋa ya, mu barasi burgu, na kiini kiini miɗini bar bar gaini ladra zi leŋ na Egipte par lai.

¹⁷Mu ɗugudasi wazagai zi ɗûgûɗi zi lûgûzi n’a luguza pɗem amai midini liŋa ya lai.

¹⁸Halasi, hulumu mu ɵumu dawaŋ haa hlai a sɗasi edi, kapai mu ɵunumu pɗemni feŋ na gaiɗi marmu ɗa.

¹⁹Buri ɓa mafa ɗa a na aha kai, a hala morkoi ɗaw, a morkoi na gaigai.

²⁰A mula farai tini war sak viya, aga a wayasi na ɗa haa tile ɗa amai arba.

²¹Te zaŋ gaini yel ɵa haa a kɵa war tiɗi. Te tanaŋ gaini seŋ na zibet na miɗi ɗa.

²²Nɵa gawla ɗa a ɵa piɗi su maini ɵeŋ n’e kiŋ aŋ fiɗi nɵa. Maini ɗif na hangalni gulai n’e rgiŋ aŋ ɵiɓi nɵa,

²³haa ɓurwi te ɓilti agulni tiɓ, maini wala zi ɗufli n’a hala war gurbuduk sek, n’a sɗa ɓa suŋfani aga a ɓa nɵa kai.

²⁴Tiyana ɗa aliya, ɵini seŋŋa ɗa, tiki hangalki sini seŋ na ma par ɗa lai.

²⁵Ki hini hiiniki a wula edi piɗi muni na maini hanɗa ɵa kai, ki wili edi war futi na wiiɗi kai.

²⁶Buri ɓa te za huruk wiiɗi ɗai viya, koo na gdaŋai gara ma te fiɗiɗi edi.

²⁷Dalamɗi ɗa te futi na wiini hlaiɗi ɗai zi mri, te futi na te ka azumai sek sini dalamni mri.