Read Mousgoum Seŋ joro 9 Bible Online

Seŋ joro 9 - Mousgoum bible

Seŋ joro 9

¹Yel a rgiti dilimi na wiini ɓak a zizina garai na muguzak na warɗi ca lai.

²A fuɗa wazagaini ca, a zilna viŋni, simi maa a da ya lai.

³A ɵina ɗaini zi sda aŋ yikiɗisi ɗai, amai merfeŋni hlai n’amai mogo na wiini fuŋ n’abai ɗa par, e ɗûûli e miɗi:

⁴Tiki na gaini ŋiyi kai ɗa, vigisi woni na ɗaw! Wiiɗi nagai na hangalɗi gulai, a miɗiɗi ɓa:

⁵Hilisi simi simi na mu daŋ, ci vin na mu zilnaŋ ɗa lai.

⁶Yimi siki e ɗi siɗi nagai n’e siɗi wala kai ɗa par, nɵa aga ki simni karki! Asakal hanɗa, ki tikiti futi na wiini siɗi ɗa lai.

⁷N'a gada ɗif n’a kola sini, a nava ɗa a miisi, ni n’a ɓara ɗif na payaini meefeŋ a nava ɗa a tirki lai.

⁸Ku gada ɗif n’a yima seŋŋni ɗif kai ɗa kai, aga a bula gaw suku, amma na ɓa ku gada li ɗif zi yel ɗa aga a duruku.

⁹Gada ɗif zi yel ɗa, aga a bunda yel a suwa, hitra ɗif na jre ɗa, siɗini aga a riya amai.

¹⁰Hormo na wiini EPIƊ-ƊAI ɗa a pi zi tiki na wiini yel, siɗi na wiiɗi nagai na sɗik ɗa, a siɗi ɗa.

¹¹Buri ɓa gaya ta ɗa mefeŋku aga a za viya, buzaku aga a riya amai lai.

¹²Na ɓa ku zi yel ɗa, a nufuku ku tuku, na ɓa ku zi yimi seŋŋi ɗif kai ɗa ɗe a wiiku muduku lai.

¹³Dûûli ɗa, a na maiɗi muni na subupi, na gaini ŋiyi kai, na te sɗa wala kaalai.

¹⁴Na te sumna miɗi delemiɗi midini tublaɗi dam, midini hlai n’amai mogo na war fuŋ n’abai,

¹⁵te yikiɗisi nagai n’e vigi warɗi futi, n’e hili wiiɗi na wuzaɗi sek ɓa:

¹⁶Tiki na gaini ŋiyi kai ɗa, vigisi woni na ɗaw; wiiɗi nagai na hangalɗi gulai ɗa, te muɗa maini nɵa:

¹⁷Yem na ku halaŋ gaini hil ɗa a ca pɗem gara, simi na ku sumaŋ war kuɗuhai ɗa a suma pɗem gara lai.

¹⁸Ɗai n’e hili ahaɗi ɗa e siɗi ɓa e hili na gaiɗi ɗai zi mri ɗa, e siɗi ɵa kai, e siɗi ɓa ɗai na te yikiɗisi e ɗa azumai war hlai zi simni na wiiɗi ɗai zi mri ɗa, e siɗi ɵa kaalai.