Read Mousgoum Ɗif zi ɓiki seŋ 1 Bible Online

Ɗif zi ɓiki seŋ 1 - Mousgoum bible

Ɗif zi ɓiki seŋ 1

¹Seŋ zi miɗi na wiini Ɗif zi ɓiki seŋ, n’ahini David n’a na aŋ pai war Yeruzalem.

²Ɗif zi ɓiki seŋ a muɗa: Meere kadai, meere kadai, wazagai paŋ ɗa a meere kadai.

³Sda na ɗai e ziŋ gaini gir midiɗi yai na ɗa a niviɗi tiɓ ɗa ma ɗa?

⁴Vuna ktai a vuga, vuna na zamai a halasi, amma yai te siɗi ɵa.

⁵Futi te diya, te nawa, te purma aŋ waya war balamɗi na te diyasi woni par pra.

⁶Smer a vuvuwa war gal n’amai sek, a bunda war gal n’azumai sek, a guna, a guna, asakal par a hala walani. A waya a tikasi pini zamai pra.

⁷Arakai paŋ a ka ɗa agoɗom war yem-ra n’abai ɗe sek, amma yem-ra n’abai ɗa a va duk kai; paŋ ktai na agogoi ɗa sini a ka woni sek ɵa.

⁸Sda paŋ ɗa a kaya ɗif, ɗif a kaya gaini seŋ zi miɗi kai, arai te va gaini wazagai na te talaŋ kai, ɵime gaini n’a ɵinaŋ kaalai.

⁹Wala n’a naka, a wala n’aga a za dama wala n’a za ya, a n’aga a za ɗe lai, wala na hehe midiɗi yai aŋ kai.

¹⁰Na ɓa wala ktai a na na mu kuɗumu aŋ muɗumu ɓa: Tili, wala hanɗa a na hehe ɗa! A na ɵa kai, a wala n’a nafu haa gamai par wuzamu.

¹¹Tumu, mudumu a wula gaini wazagai n’a vuga aɗipar, nagai n’aga e hilisi asakalmu par ɗa, midiɗi aga a wula gaini wazagai n’aga a za wuzamu sek ɗa lai.

¹²Ta Ɗif zi ɓiki seŋ, mu naka aŋ pai midiɗi Izrayel aha war Yeruzalem.

¹³Mu rga wara aŋ paya, aŋ fufuka gaini yel ezini wazagai n’a na za midiɗi yai paŋ. Alaw a siɗi wiiɗi ɗai aŋ zi na ɗa a sda zi gir meere kadai.

¹⁴Mu tala sda n’a na za midiɗi yai ɗe paŋ, amma hanɗa paŋ meere kadai, a luwi na pini smer.

¹⁵Wala na gaini fi ɗa, a kiɗa a maaɗa kai, wala n’aŋ kai ɗa, a kiɗa a pɵa kaalai.

¹⁶Mu muɗa gaiɗi agula ɓa, mu nava yel, mu siiwiɗi paakai n’e ŋi wuza par aha war Yeruzalem, yelŋa a riya amai ta, mu titima yel gaini siɗi viya lai,

¹⁷Mu rga wara ɓa mu paya ezini yel gaini siɗi, ezini tatala gaini dûûli lai; na mu navaŋ ɓa hanɗa paŋ a luwi na pini smer.

¹⁸Buri ɓa yel na viya ɗa, gir warni viya lai, ɗif n’a riya siɗini amai ɗa, a riya amai na ɗa a gir na midini.