Read Mousgoum Ɗif zi ɓiki seŋ 10 Bible Online

Ɗif zi ɓiki seŋ 10 - Mousgoum bible

Ɗif zi ɓiki seŋ 10

¹Aduwai zi mri a hofa, a biva emel na wiini ɗif zi zi yitir edi. Dûûli na agwi kadai ɗa, gumani a suwa yel, a sûwiti abai ɗa lai.

²Hiinini ɗif zi yel a hala war gal na pɗem sek, amma hiinini ɗif zi dûûli ɗa a kaŋ war gal na meefeŋ sek.

³Koo war hilini na war futi blaŋ kaw, ɗif zi dûûli ɗa yelni ɗa a kiɗa kai. A siŋkiɗi wiiɗi ɗai paŋ ɓa: a ɗif zi dûûli.

⁴Na ɓa abaiku a za hiy suku ɗa, ku hina hlaiku edi kai, buri ɓa, hangal na gaini tiki azumai ta ɗa a hina ɗif a niya war meefeŋ kai.

⁵Mu tala meefeŋ zamai ktai midiɗi yai, a wili na ɗif n’abai a wula ɗa:

⁶Ɗif zi dûûli ɗa e tikiŋ amai midiɗi ɗai ta, zi siɗi zûwin ɗa azumai par pini sa,

⁷bagakai midini plasai sa, paakai azumai gaini eziɗi yaw maiɗi bagakai ɵa.

⁸Na ɓla waŋ ezini maini ɗa a kɵa warni a ni dama, n’a ho ɵaga azumai ɗa, wala meefeŋ aga a lumaŋ.

⁹N'a gzila alini-fuŋ, a kiɗa a nava huruk mini, n’a ɓasa luwuŋ ɗa a kiɗa a zini meefeŋ lai.

¹⁰Na ɓa kawai mini a tiliyika li, e liɓiŋ kai ɗa a vuduku gdaŋku edi abai, gaini yel ɗa wazagai paŋ a za war futini.

¹¹Na ɓa wala meefeŋ a luma ɗif na evekni aŋ tini ɗa, ribani ɗif z'evek ɗa a maɗa?

¹²Seŋ n’a niyasi war mini ɗif zi yel par ɗa a seŋ na nem, amma seŋ na mini ɗif zi dûûli par ɗa a baŋ edi sek.

¹³Pi zi tiki na wiini seŋni a dûûli, vidini n’edi sek ɗa a dûûli n’a suwa pra.

¹⁴Ɗif zi dûûli a muɗa seŋ viya viya, amma ɗif a sɗa wala n’aga a za ɗe kai, n’aga a za duɓani sek ɗa a siŋkiŋni asiya ɗa?

¹⁵Sdani ɗif zi dûûli ɗa a kaiaŋ kadai meere, a siɗiti futi na te ka aha war fuŋ n’abai sek ɗa maa kai.

¹⁶Haw gara buriku, tuku afti na paiku ɗa a arwagwi n’agwi, na ŋarakaiku ɗa e simi gorof par tar.

¹⁷Sleɗ muduku tuku afti na paiku a wa war pinziba na muluk, na ŋarakaiku e simi war hlai ni, e simi kapai e nivi gdaŋ, buri e ciini gaini maiɗi ɗai n’e ci vin ɵa kai.

¹⁸Ɗif na faali ɗa dalam a hurba midini, na amulka ɗa, faŋ a ka amlai midini lai.

¹⁹Buri ɵini dawaŋɗi ɗa, ɗai zi farai ɗa e di simi, vin ɗa a firiya agulɗi ɗai, farai ɗa a za wala paŋ lai.

²⁰Ku muɗa seŋ na meefeŋ sini pai kai, koo amlai warɗi agulku, koo amlai warɗi dilimiku zi feŋ tekeɗeɗi ku muɗa seŋ na meefeŋ sini ɗif zi farai kaalai, buri ɓa wala zi ɗufli n’arbani hlai n’amai a kiɗa a ka seŋ hanɗa, aduwai te kiɗa te vurna seŋ hanɗa lai.