Read Mousgoum Ɗif zi ɓiki seŋ 12 Bible Online

Ɗif zi ɓiki seŋ 12 - Mousgoum bible

Ɗif zi ɓiki seŋ 12

¹Nɵa, hina muduku a kɵa gaini Ni n’a rguku, Won hlai na ku na agwi hai, wuzani hlai na mefeŋ na meefeŋ a cosi gaini buza n’aga ku muɗa lai ɓa: Hlai a baza ara ta.

²Wuzani hlai na futi, gaglai, tile gaini meɵek lai a bunda gegeŋ, wuzani hlai na ɗugul a wayasi a bla amai, faŋ a ɵa lai,

³war mefeŋ na ɗai zi giɗimi dalam e ziriyi, na ɗai na gdaŋai ɗa e hiɗisi azumai, na falakai n’e siri e ɗiyi buri ɓa e ɗa viya kai, na nagai n’e tilisi arni fenetir par e bi jufɗi edi,

⁴Won hlai na porte na miɗi futi sek a amai, na ɓa masine zi siri a tuwa kir kai, na ɗai e ɵiyi amai pini tuwini wala zi ɗufli, na yama a zina kir kaalai,

⁵Nɵa ɗai e hûni hi-n’amai sek ɗa, hili ɗa a miliɗi hunai piɗi, ayir ɗa a bunda muɗukwi maini fler na wiini luwuŋ amandiye nɵa, aiwi te pra kokolai kir kai, wazagai n’a luguza arni simi pɗem ɗa a ɓa lemni edi, ɗif ɗe a hala war hlaini zi simni n’a vada kai ɗa sek, ɗai zi tuwi e ɗa e gûni war futi yaw yaw tar.

⁶Wuzani hlai na sogom zi arzaŋ ɗa a rawa, na kop zi or ɗa a haɗa, na argini zi yem te gzila agoɗom miɗi kiliŋi, kologom a birzila azumai warɗi kiliŋi,

⁷wuzani hlai na afti a waya azumai arni afti, maini n’a nasi ka ɗe nɵa, na suŋfa a waya sini Alaw n’a saŋsi lai.

⁸Meere kadai, meere kadai, Ɗif zi ɓiki seŋ a muɗa ɓa: Wazagai paŋ ɗa a meere kadai.

⁹Ɗif zi ɓiki seŋ ɗa, wiini ɗa a yel ɗe ktai kai, a hitra siɗi wiiɗi ɗai, a tetema, a fufuka, a ɗopa seŋ joro viya.

¹⁰Ɗif zi ɓiki seŋ ɗa a fuɗa was aŋ paya miɗi na pɗamai, aŋ ɗo seŋ na jre lai maini n’a na ɵa:

¹¹Seŋ na miɗi ɗai na yalakai ɗa a na maiɗi amaraŋai nɵa, ɗai n’e ɗûmaktuɓ ɗa e ɗa maini eŋil na wiini farai nɵa, hanɗa paŋ a like n’a sa sini ɗif zi giɗimi ni ketekeɗik.

¹²Ahiya, na ku yimaŋ muduku zamai ɗa ɓa: Ɗûni maktuɓ na viya ɗa a sda na vidini aŋ kai, hitrai na viya ɗa a kaya amur-si lai.

¹³Vidini seŋŋa ɓa, n’a muɗa paŋ ku ɵinaŋ ya, sini hormo wiini Alaw, za pini gadaini, buri ɓa sda na wiini ɗif ɗa a hanɗa ta.

¹⁴Sdani ɗif paŋ ɗa Alaw aga a talaŋ kafa, koo sda na war ŋoyai, ɓa a pɗem zaw a meefeŋ ɗi ɗa.