Read Mousgoum Ɗif zi ɓiki seŋ 5 Bible Online

Ɗif zi ɓiki seŋ 5 - Mousgoum bible

Ɗif zi ɓiki seŋ 5

¹Hina muku a wa seŋ kokolai kai, ku za ɵinini-ha na gaini hiini kai wuzani Alaw kaalai, buri ɓa Alaw ɗa a na amai war hlai n’amai, tuku ku na azumai midiɗi yai, nɵa ku taɓa pini seŋ na viya viya kai.

²Buri ɓa hiini na viya na midini wazagai a pɵa weseŋ, seŋ zi miɗi na viya viya ɗa a siŋka dûûlini ɗif edi.

³Na ɓa ku za ɵinini-ha li wiini Alaw ɗa, vaŋ amai tar. Buri hiinini-haw buriɗi na tatalakai aŋ kai, ɵinini-ha na ku zaŋ ɗa, vaŋ amai.

⁴Ku za ɵinini-ha ta, ku vaŋ amai kai ɗa, marya na ku zaŋ kai ɗa.

⁵Hina muku a bunduku aŋ ɗif na tuwur kai, ku hala ku miɗini wiini ɗif na wiini Alaw ɓa: Mu zaŋ na gaini hiini kai ɗa kaalai. Ku firiya ɓa Alaw a faka amai suku gaini hiy pini seŋku, a tuura sdaku edi lai buri maɗa?

⁶War weseŋ zi pɵi ɗa seŋ na meere kadai viya, war seŋ zi miɗi na viya viya nɵa lai, buri nɵa ku sini hormo wiini Alaw.

⁷Na ɓa midini afti ku tala ɗif na haw a sɗa gir, jre na wiini ɗif gaini jre ɗikat aŋ kir kai ɗa; ku bunda hiyak burini hanɗa kai; buri ɓa ɗif n’abai paŋ, abaini n’a ŋa midini a na, amai par midiɗi nagai ɗa, abakai zamai e ɗa pra.

⁸Der na wiini afti ɗa a niviɗi paŋ, pai lai a suma mini pini paŋ.

⁹Ɗif n’a firiya farai ɗa a va gaini kai, ni n’a firiya muluk ɗa, derni a kiɗaŋ kai; hanɗa kaw a meere kadai paŋ.

¹⁰Der n’a nava li viya ɗa, ɗai n’e simiŋ ɗa viya lai, ribani epin-gezani der ɗa tiɓ ɗa a ma ɗa? A tel n’a talaŋ gaini arni kadai baaha kai ɗi.

¹¹Ɗif n’a fuɗa was burini simini ɗa, weseŋ a yima spat, koo ɓa a nava simi viya, viya kai ɗi ɗa, amma ɗif zi farai na faraini viya ɗa a kala weseŋ pɗem kai.

¹²Mu tala wala zamai na meefeŋ, n’a fuɗa si gara ktai midiɗi yai: Ɗif a tapa faraini amai yaaha, a bunda a kasi midini ɗa a seŋ.

¹³Farai hanɗa a ɓa futini su kai, haa a wa ahi ta ɗa sisi maa tini kai,

¹⁴maini n’a niyasi warɗi emini par ɵa, a waya sek ganala maini n’a halasi nɵa: Sdani n’a zaŋ paŋ ɗa, a tika wala ktai tini warni par aŋ hala gaini kai.

¹⁵Hanɗa kaw a wala na meefeŋ n’a fuɗa si gara, hilini n’a hala maini n’a halasi nɵa ɗa, sdani n’a zaŋ wiini smer na ɗa, ribani na warni ɗa a wiini maɗa?

¹⁶Pra, mefeŋni a vada war gir, war tuwi gaini agul zi divi ɵa.

¹⁷Na ta mu sɗa ɓa a pɗem ɗa a hanɗa: Ɗif a suma, a ca, a vada hazani gaini sda n’a zaŋ midiɗi yai ɗa, war mefeŋ n’agwi n’Alaw a siŋni ɗa, buri hanɗa a wiini ta.

¹⁸Pra, ɗif n’Alaw a sini farai gaini der zamai zamai, n’a sini yel aŋ suma warni par, aŋ yima gal na wiini edi, aŋ vada hazani gaini sdani lai ɗa, hanɗa a like na wiini Alaw.

¹⁹Ɗif hanɗa midini a wula ɓa aŋ warɗi yai burini hlai n’agwi, buri ɓa Alaw a sini firiyi warɗi agulni ta.