Read Mousgoum Ɗif zi ɓiki seŋ 8 Bible Online

Ɗif zi ɓiki seŋ 8 - Mousgoum bible

Ɗif zi ɓiki seŋ 8

¹Ɗif na yel ɗa asiya ɗa, n’a kiɗa a siŋka ezini wala edi asiya ɗa? Yel na wiini ɗif ɗa a bunda midini arni a ŋala pre pre, midini arni zi riki amai ɗa a bunda pla lai.

²Mu muɗa ɓa; za pini gadai na wiini pai, pini wala zi hi miy na wiini Alaw.

³Ku purma aŋ yima suku edi sini par kai, ku hiriŋa war wala na meefeŋ kaalai. Buri ɓa a kiɗa a za paŋ maini n’a dara nɵa,

⁴Buri ɓa miɗi na wiini pai ɗa spak aŋ pini, n’a kiɗa a miɗini ɓa: Ku za na ɗa a maɗi ɗa asiya ɗa?

⁵Ni n’a za pini gadai ɗa, wala na meefeŋ a kiɗa a za sini kai. Hlai gaini sariya ɗa, agulni ɗif zi yel ɗa a siɗaŋ ya.

⁶Buri wala paŋ aŋ gaini sartini gaini sariyani lai, amma gir ktai n’abai a na burini ɗif:

⁷A siɗa wala n’aga za ɗa kai, ɗif n’aga a siŋkini wala n’aga a za ɗa aŋ kaalai.

⁸Ɗif n’aŋ gaini spak midini suŋfa aŋ bula midini suŋfa hanɗa aŋ kai; ɗif n’aŋ gaini spak midini mefeŋni zi mri aŋ kaalai, war hatam ɗa si-n’amla aŋ kai, mafunini ɗif te kurɗaŋ kai.

⁹Hanɗa paŋ mu talaŋ Won hlai, na mu tika hangala sini wazagai n’a na za midiɗi yai, war hlai na ɗif spakni a na midini maini, buri a zini wala na meefeŋ.

¹⁰Nɵa mu tala ɗai e kiɗi ɗai na maafanai edi mini waŋ sek aŋ pi; ɗai e hili e wiyisi, e hilsi e wiyisi war hlai na sɗik par, ɗai n’aha war fuŋ n’abai ɗa, midiɗi a wula gaini sdaɗi n’e ziŋ ɗa lai. Hanɗa kaw a meere kadai paŋ.

¹¹Buri ɓa gir na pini sda na meefeŋ ɗa, a na za witaw kai ɗa, nɵa agulɗi ɗai paŋ a va gaini diri na wiini zini meefeŋ.

¹²Koo ɓa ɗif na tuwur ɗa a za meefeŋ azi miya, a sumna wiini karni lai, amma ta mu sɗa ɓa, ɗai n’e sini hormo wiini Alaw, muluk na wiiɗi aga a za lai. Buri ɓa e ɗa sini hormo.

¹³Amma muluk na wiini ɗif na meefeŋ aga za kai, aga a vuga maini agiyiŋ nɵa, mefeŋni aga a za mogo kai, buri ɓa hormo warni burini Alaw kai.

¹⁴Wala zamai a na za midiɗi yai na kadai tiɓ a za ɵa kai, ɗai zamai na jrekai gir a za siɗi maiɗi ɗai na maafanai ɵa, ɗai zamai na maafanai gir a za siɗi kai maiɗi ɗai na jrekai ɵa lai, mu muɗa ya ɓa, hanɗa kaw ɗa a meere kadai paŋ.

¹⁵Mu kola firiyi ɗa ta, buri ɓa wala na pɗem warɗi yai burini ɗif tar ɗa, a simi, a ci, a vini hajani n’amai ɗa lai, n’a kiini pini war sdani, buri mefeŋ n’agwi n’Alaw a siŋni midiɗi yai.

¹⁶Won hlai na mu rga wara buri mu paya yel, mu tala sda na ɗai e ɗa ziŋ midiɗi yai lai, koo na ɓa ɗif a kala weseŋ duvuk kaalai, girvudi kaalai tekeɗeɗi,

¹⁷mu tala sdani Alaw haa ɗa, ɗif a kiɗa a nava ezini wala n’a na za midiɗi yai ɗa paŋ kai, gaini was n’a na fuɗaŋ na ɗa paŋ a kiɗa a navaŋ kai, koo na ɓa ɗif zi yel ɗa a muɗa ɓa a sɗa wala tekeɗeɗi, a kiɗa a nava ezini kai.