Read Mousgoum Yama n’a suwa yama paŋ 1 Bible Online

Yama n’a suwa yama paŋ 1 - Mousgoum bible

Yama n’a suwa yama paŋ 1

¹Yamai na wiini salmun na pɗemi te suwa marɗi paŋ.

²Susuɓa maa, susuɓa maa, buri ɓa lilimi na ku lilimaŋa pɗemni a suwa vin,

³pɗemni a suwa lugosni yitirku ɗa. Tuku mal ku yitir na gaini futini. Ɓulamai ɗa e diriku na ɗa buri hanɗa.

⁴Yimaŋaɗi puku kaai, ruvumu, pai, kaŋa amlai war dilimi zi feŋ ɗa ta, pin barkaku ɗa aga mu ɵumu dawaŋ, kulumu lilimiku ɗa, a suwa vin ɗa, ɓulamai ɗa e diriku na ɗa a futini.

⁵Amur-sa a purna su sme, amma mu na juvi, ɓulamai na Yeruzalem, juvi maini gumu na Kedar nɵa maini rido na jufai n’ahani pai nɵa.

⁶ki mili arki sini amur-sa n’a purna kai, te purŋa na te futi, aliɗi ama e fiki amai sa gaini hiy, e tikiŋa ta aŋ giɗima luwuŋ zi vin, luwuŋ zi vin na wiya mal ɗa mu giɗimaŋ kai.

⁷Muɗaŋa wiiku ta, tuku na agula te duruku gara, hlai n’aga ku ka farai woni aŋ suma ɗa wata ɗa, girvudi ta ɗa, ku ɗokoŋ pini seze na wata ɗa? Kapai mu bunda mini faraɗi marku blaŋ aŋ giliŋi kai.

⁸Na ɓa ku sɗaŋ kai ɗa, a "miisa falakai", tika ezini fara, ka alini haakaiku aŋ suma, ɵimani hlai zi simni na wiiɗi ɗai zi giɗimi farai ɗa.

⁹Marmaya, mu kutuku na ɗa gaiɗi plisi na te gidiya saret na wiini pai n’Egipte.

¹⁰Galaiku a tala juf gara azumai pini wala na ɵime na mogokai par, wulaku ɗe juf gara arbani aidaw lai.

¹¹Tiyi aga mi suku wala na ɵime zi or, mi tiki arzaŋ arbani ta ta ta.

¹²Hlai na pai a na gaiɗi ɗaini n’abakai aŋ simi, yitir na sa a luguza haa midini ta.

¹³Ni na agula a daraŋ gara ɗa, a na maini peket na wiini mir n’a luguza pɗem nɵa, a fana ɗa amai didikŋa waŋ.

¹⁴Marmaya a na ara maini sumulni flerni luwuŋ hene, na war zardeŋ zi luwuŋ zi vin na war En-Gadi nɵa.

¹⁵Ku suwa juvi gara, marmaya, ku suwa juvi gara, arku a gidiyasi ɗai suku maini dere ɵa!

¹⁶Ku suuwa juf gara, marmaya, jubet gara, hlaimu zi feŋ ɗa a guɗa gai gûɗi!

¹⁷Luwuŋ na midiɗi dilimimu a luwuŋ Sedre, n’e giriŋ sini dalam ɗi ɗe a luwuŋ sipre lai.