Read Mousgoum Yama n’a suwa yama paŋ 5 Bible Online

Yama n’a suwa yama paŋ 5 - Mousgoum bible

Yama n’a suwa yama paŋ 5

¹Tawala, marmaya zi tiki, mu na halaɗi war jardenŋa, mu ɗukla mirŋa gaini sugoiŋa zamai n’a luguza pɗamai lai, mu suma sutoni emelni amiŋa, mu sa viŋŋa gaini fiyawŋa lai, mu sa viŋŋa gaini fiyawŋa. simi, tiki na marmakaiɗi marki ci, ciini marki gaini lelemi.

²Mu nafu aŋ kala weseŋ, amma hiiniŋa a kala weseŋ kai, mu tala ɗa marmaya n’a daraŋa gara ɗa a na ɵeɓasi mini hlai. a muɗa: tawala, marmaya, malaŋa mini hlai edi, daraiŋa, amiisa falakaiŋa, buri ɓa mada ɗa a maɗai kiini, ayir na mada ɗe gaini diyiɓi tini maɗai na duvuk diyaɓ lai.

³Mu wûti sapai na sa edi ku, mu wûti sa katawai pra maɵa maɵa ɗa? Mu ma aza yok, mu dedeɓaŋ katawai pra maɵa maɵa ɗa?

⁴Marmaya zi diri gara ɗa a witisi tini arni baŋa ɗaw, agula te ɵeɵega wara.

⁵Ta, mu fakasi amai aŋ milini mini hlai edi wiini marmaya na mu daraŋ ɗa, ta ɗa a dina gaini emel mir hum hum, sini ali ta par ɗe emel mir a ka sini kawai n’e ɵi mini hlai gaini.

⁶Ta, mu milini mini hlai edi wiini marmaya na mu daraŋ gara ɗa mal, amma marmaya ɗa a bunda arni pla a hala ɗaw, hangala a ɵiɓa edi tiɓ, mu tika futi pini, mu payaŋ haa, mu navaŋ kai, mu yikaŋ haa a ɵenaŋa kaalai.

⁷Ɗai zi giɗimi n’e gûni war fuŋ n’abai ɗa e nivisi gaya, e ɵiɓiŋa haa, e ziŋa wuruk, e wûti kapuk na sa edi, nagai n’e giɗimi ɵaga ɗa.

⁸Ɓulamai na Yeruzalem, mu siiwiki, ki zi barka na ɓa ki nivi li gaini marmaya na mu daraŋ gara ɗa, aga ki miɗini maɵa ɗa? Ki miɗini ɓa, diri na mu daraŋ ɗa a zaŋa aŋ veglek ta!

⁹Hai! amiisa falakai, marmaiku ɗa, wala n’aŋ sini n’aŋ siɗi marni na zamai ɗe kai ɗa a maɗa? wala n’aŋ sini marmaiku n’aŋ siɗi marni na zamai kai ɗa a maɗa? Na haa ku siiwiyi maini hanɗa ɵa ɗa?

¹⁰Marmaya ɗa mekele keŋ, sini hiniŋ, koo arbaɗi ɗai dubu doogo maa a wula kai.

¹¹Humokni ɗa a or na gaini futini ɗa, ayir na midini hisik, murɗek srik.

¹²Arni a zuva maini dere n’a sumna amai mini wala n’a ca yem warni nɵa, maini dere n’a ma sini arni fiyaw, n’a sumna amai mini kop na midiɗi tabel ɗa nɵa.

¹³Galaini maini hlai na wiini sugoi n’a luguza pɗem, n’a sa lugos na pɗem nɵa, mini ɗa a miye n’a sa mir na gaini futini.

¹⁴Tini ɗa a girliŋ zi or na gaini ali-fuŋ n’a ŋala gara sini. Warni ɗa a sesiyeŋni pekne na hiniŋ, n’e ɵirɓiŋ gaini Safir.

¹⁵Ezini ɗa a garai n’e ziŋ gaini alini fuŋ na muɗukokai n’e yikiŋ ɓa marbre, n’a pa midini azi zi or na gaini futini, a sɗa juf maini huwuŋ na Liban ɗa nɵa, maini mini kai maini luwuŋ Sedre ɗa nɵa.

¹⁶Mini ɗa a wala n’e yikiŋ ɓa jibet ɗa mal tar, sini paŋ a juva paŋ, ɓulamai na Yeruzalem, marmaya na mu daraŋ gara ɗa, a na ɗa maini hanɗa ɵa, marmaya ɗa a na maini na ɵa.