Read Mousgoum Yama n’a suwa yama paŋ 6 Bible Online

Yama n’a suwa yama paŋ 6 - Mousgoum bible

Yama n’a suwa yama paŋ 6

¹Hai! A miisa falakai, marmaiku ɗa a hala na wa sek kiɗi ɗa, a tika futi na wa sek ki ɗi ɗa; tiyi mi hili fu gaiku aŋ piyiŋ lai.

²Marmaya ɗa aga a halasi war zardeŋni, warni hlai zi sugoi n’a luguza pɗem, Woni aga nava simini, a ɗukla miye lai.

³Ta mu wiini marmaya, marmaya ɗe a wiya ta lai, ni ɗa a nava simini arbani miye.

⁴Ku suwa juvi gara marmaya, maini fuŋ n’abai na Tirsa ɗa nɵa, ku ŋala maiɗi Yeruzalem ɵa, sbupi maiɗi vokɗi askarai na war hatam nɵa.

⁵Bundaɗi arku edi sa par pla, buri ɓa a na vada gdaŋŋa edi. Ayir na muduku murɗakai maini farani haakai n’a niyasi amai sini huwuŋ Galaad par nɵa.

⁶Sesiyeŋku ɗa muɗukokai maini ayirni farani adumai n’e minisi sini edi nɵa; na gaini ali pini sulu sulu kafa ktai n’ali piɗi kai t'aŋ kai.

⁷Galaiku a sɗasi mekele amlai par pini sapa n’arku bar ɗa, maini grenade na gaini ɓisi arba ca nɵa.

⁸Koo na ɓa falakaini pai n’aha ɵaara, n’edi par ca ca ɗa mitwis, ɓulamai ɗa few kadai lai tekeɗeɗi ɗa,

⁹na wiya ɗa, te na ketekeɗeki, daraiŋa, a miisa falakai. T'aŋ tiɗi emiɗi te na ketekeɗeki, t'agulɗi emiɗi, drakai e tiliti li ɗa, e siɗi kol, falakaini pai n’aha gaiɗi, n’edi e kûliti lai.

¹⁰Muni na te luɓasi maini hlai na rum rum nɵa, juvi maini tile nɵa, te ŋala maiɗi futi ɵa, sbupi maini vokɗi askarai na war hatam nɵa lai ɗa, naa te siya ɗa?

¹¹Mu hala war jardeŋ na wiini luwuŋ koko, aŋ tala luwoŋai n’agogoi n’a diya war huduk ɗa, mu tala luwuŋ zi vin ɗa haw, a na goɗa ɗi ɗa, mu tala luwuŋ grenade ɗa haw, a na civiya ɗi ɗa.

¹²Mu sɗa wala n’a na za sa na kir kai, ku ɵaɗaŋa felŋa ɵeɗ, ta n’ahiɗi ɗai na war muluk.