Read Mousgoum Esaya 1 Bible Online

Esaya 1 - Mousgoum bible

Esaya 1

¹Hanɗa a wala n’a siŋka arni Isai, n’ahini Amots, midiɗi pai na Yuda gainii fuŋ n’abai na Yeruzalem. Hanɗa war mefeŋ na Oziyas, Yotam, Akas, gaini Ezekiyas e ɗa aŋ paakai war Yuda.

²Hlai n’amai, ɵina! Yai, zaga ɵimaku! A muɗa na ɗa a EPIƊ-ƊAI. Mu wula ali amai, mu ziɗi aŋ ɗai lai, amma e fiki amai sa.

³Sleŋ ɗa a siɗa epin-gezani, ablehö a sɗa hlai na epin-gezani a sini simi woni. Amma Izrayel, na, te sɗa wala kai, ɗaiŋa ɗa e ɵini kai.

⁴Gir gara, buri pinzibaɗi ɗai na tuwarai, buriɗi ɗai na maafanai, burini pinziba n’e zi meefeŋ, burini pinziba na gaini fi! E hini EPIƊ-ƊAI edi mak, E miisi Alaw na sɗik na wiiɗi Izrayel, E bindi arɗi edi sini par.

⁵Hlai n’a hina siki zamai aŋ ɵiɓi tiɓ ɗa a na wata ɗa, tiki na ki riyi wuzaki sek war zini meefeŋ na ɗa? Humokki a wuruk kiini agulki te na vigliki lai.

⁶Azumai eziki par haa amai miɗiki ta, hlai n’a hina pɗem ta aŋ kai: Siki paŋ a wuruk, gai hitli tin ɵiɓi gaini ɓilik na fana viya kai, na mini gaini i edi kai, gai nigi kai, na ɗif a girda kurgum mini kaalai.

⁷Aftiki a hina edi kadai su, Fuŋki n’abakai a ya li edi gaini afu, ɗai n’edi par e tiki aftiki li tiki, Hanɗa a ɓilki n’edi na maini ɓilki n’edi na wiini pinziba na zamai ɗa nɵa.

⁸Te hina te Siyon na juvi ktai maini gumu n’e piŋ edi edi war vowai zi vin nɵa, maini fuŋ n’abai na gaini guni gun, tiɗi askarai zi gɗam nɵa.

⁹Na ɓa EPIƊ-ƊAI zi spak, a hinumu fu ɗai zamai arbamu karɗi kai ɗa, mu bundumu fu na ɗa maiɗi Sodoma nɵa, mu kutumu fu na ɗa maiɗi Gomora.

¹⁰Slini seŋ na wiini EPIƊ-ƊAI, tiki n’abakai na Sodoma, zigi ɵimaki mini gadai zi ɗû na wiini Alaw na wiyi, tiki ɗai na war Gomora.

¹¹EPIƊ-ƊAI a na muɗa ahini nɵa: Ɓakakaiki na viya viya ɗa, ma pini kai, Ɓaka zi yi na wiini adumai na maɵagai, gaini emel-gdaŋ, na wiini ali-ɵakai ɗa A vaŋa ta. Fel na wiini garakai, gaini na wiini alini-adumai, gaini na wiini haakai ɗa Mu firyaŋ kir kai.

¹²Ki yivi ki hilisi wuza na ɗa, mu miɗiki ka ɓa ki hilisi amlai war pakataini Tempelŋa ɗi?

¹³Ɓakakaiki n’a nafa kai ɗa, ki ɗiyiŋ ta, ki kiŋsi kir kai: Wazagai zi ɗûgûdi zi lûgûzi ɗa a tala ara hi-hir. Merfeŋ tile, gaini Sabbat gaini diŋgiki n’abakai nɵa lai. Tiki ki yiki diŋgi n’abakai, ki zi meefeŋ lai, Mu firya sda hanɗa kai.

¹⁴Fetaiki na wiini merfeŋ tile, gaini diŋgiki n’abakai, A bunda mada aŋ jak na guma, mu kaya tini libini su.

¹⁵Won hlai na ki yimi tiki amai aŋ siiwi mu bunda ara edi sek, koo ɓa ki siiwi viya tekeɗeɗi, mu zuɓuraŋ kai: tiki ɗa aŋ gai didiɓi gaini fel.

¹⁶Mi siki edi, zi siki edi hilu, Sdaki na maafanai, ki pukiŋ edi wuzani ara par, Ki zi wala na meefeŋ kir kai.

¹⁷Ki hitri siki aŋ zi pɗem, Ki zi paŋ war jre, Ki gidi nin’a kara ɗai ɗa, Ki zitini sariya na jre wiini na huyuk, Ki zini piɗi muni war greŋ ɗa lai.

¹⁸EPIƊ-ƊAI a na muɗa maini nɵa: Hilisi, tulumu seŋ arbamu. Koo ɓa tuwurki a na mekele hirra, maini fel nɵa ɗi, aga a bunda muɗukwi, maini maɗai zi glas nɵa Koo ɓ'a na mekele maini mukusu nɵa tekeɗeɗi, aga mu bundaŋ muɗukwi tal maini duzi nɵa.

¹⁹Na ɓa ki ɵini li ma ɗa, aga ki simi wazagai na pɗamai n’a midini afti ɗa.

²⁰Amma na ɓa ki ɵini kai, ki hriŋi wuza sek ɗa, Gaw aga a vidiki edi, hanɗa a miɗi na mini EPIƊ-ƊAI par.

²¹Fuŋ n’abai na jre hanɗa a bunda aŋ zawar nɵa maɵa maɵa ɗa? Aɗipar ɗa, aha warɗi ɗai e zi pin gadai gara, jre-ɗikat a nafu aha war Yeruzalem abai lai, amma tiyana, e ɗa aha warɗi e ɗi ɗai zi fiɗi-humok!

²²Yeruzalem, arzaŋku a bunda li aŋ flaini kawai zi hiliyi, Vinku na pɗem a ɵihiɗali gaini yem.

²³N'abakai na wiiku, e ɗai n’e fiki durgizi, bonuɗi gaiɗi gorɓolokai. Gai hlaiɗi paŋ e firiyi ɗa a katu, e piyi ɗa a sda zi vrak, E zitini sariya na jre wiini na huyuk ɗa kai, sariya na jre na buriɗi muni na war greŋ ɗa, A seŋɗi kai.

²⁴Buri nɵa, a miɗi na sin EPIƊ-ƊAI par, na sin EPIƊ-ƊAI si Spak paŋ par, Alaw na gdaŋ gara na wiiɗi Izrayel, a na muɗa maini nɵa: Haw gara! Aga mu vurga meefeŋ na wiiɗi nagai n’e diriŋa kai, mu waya meefeŋ midini meefeŋ, na wiiɗi gawŋa lai.

²⁵Yeruzalem, aga mu waisi muduku aŋ zuku gir pra, aga mu koɵa salte na suku edi, maini gaini humu nɵa, fulaini kawakai zi hiliyi n’a hina suku ɗa aga mu koroŋ edi.

²⁶Aga mu wiyiɗisi ɗaiku zi ɗûkliti sariya, maini na ɗipar nɵa, gaiɗi ɗai n’e si gadai maiɗi na war pi zi tiki par nɵa lai. Aga e yikiku ɓa: Fuŋ n’abai na wiini jre-ɗikat, Fuŋ n’abai na jre.

²⁷Siyon aga te nava pli n’edi, pini zi na te za pini gadai, Ɗai n’aga e wiyisi warɗi ɗa, e nivi pli n’edi pin jre-ɗikat,

²⁸Amma nagai n’e fiki amai Alaw gaiɗi na tuwarai, Gir n’abai aga za siɗi. Nagai n’e hini EPIƊ-ƊAI edi ɗa aga e vidi edi.

²⁹Nɵa siyer aga a yima ɗai, burini luwuŋ Terebente n’e diriŋ gara ɗa, Aga ki tiki siyer burini zardeŋ, na ki viriŋ, aŋ zi ɵeŋi alawai na zamai woni.

³⁰Buri ɓa aga ki bindi maini luwuŋ Terebente, na ɵimani a yaka edi nɵa, maini zardeŋ, na yem warni kai nɵa.

³¹Ɗif na gdaŋ ɗa aga a bunda maini broko, sdani n’a zaŋ ɗa maini afu n’a luɓa pratata nɵa. Gaini sulogaiɗi paŋ aga e yi edi piɗi marɗi Ɗif n’aga a fuɗa afu hanɗa aŋ kai.