Read Mousgoum Esaya 10 Bible Online

Esaya 10 - Mousgoum bible

Esaya 10

¹Haw gara buriɗi ɗai n’e rgi gadai na maafanai, n’e ɗû gadai zi ɗû n’a glasi gir midiɗi ɗai

²N'e ziti sariya na jre wiiɗi na horofai kai e zitiɗi sariya wiiɗi na murgakai n’arbaɗi ɗaiŋa maini n’a na ɗa ɵa kai, e simiɗi falakai na war greŋ ɗa, e kiriɗi na huyokai lai.

³War mefeŋ zi gir ɗa, aga ki zi maɵa ɗa? Mefeŋ na gir aga a luɓasi miɗiki gaigai par ɗa, aga ki zi ɗa a maɗa? Aga ki rivi aŋ piyi zinai wata ɗa? Abaiki aga ki hiniti wata ɗa?

⁴A hina buriki ɗa a simni n’arbaɗi ɗai zi daŋgai a mri na ki mri gaiɗi ɗai lai. Gai hanɗa paŋ, hiy na wiini EPIƊ-ƊAI a tika azumai kai, tini t'aŋ gai miɗ meɗ ɗaai.

⁵Haw gara buriɗi ɗai na Asiriya, na te amarŋai na wiini hiyŋa, kol kol n’aŋ tiɗi ɗa a suwar na wiya lai.

⁶Mu ɵiniɗi midini pinziba na jre kai Mu hugiɗi piɗi witaw, midini pinziba n’a ɓilkitiŋa agula gara, kapai e virmi wazagaiɗi, e nivi der na min gaw viya kapai e kirpiɗi azumai pin eziɗi maini ŋoroɓok na war futi nɵa.

⁷Amma nagai e ziŋ na ɗa ɵa kai, e hiiniŋ na ɗa ɵa kaalai. E firiyi e vidi pinzibaɗi ɗai edi, e vidi pinziba viya edi.

⁸Buri e miɗi gai warɗi ɓa: Ɗaiyi n’abakai ɗa, e ɗi paakai tar tar kai ɗi?

⁹Mu za sin fuŋ n’abai na Kalno maini na mu zaŋ siɗi Karkemis ɵa kai ɗi? Zaw mu za siɗi Hamat maini na mu za siɗi Arpad ɵa kai ɗi? Zaw mu za siɗi Samariya maini na siɗi Damas ɵa lai kai ɗi?

¹⁰Na ɓa mu mula afti na wiiɗi paakai na alawai na jrekai kai aŋ warni, na alawai zi rgi na warni viya a suwa na wiiɗi Yeruzalem gaiɗi Samariya ɗa,

¹¹Na mu zaŋ siɗi Samariya gaini alawaiɗi na jrekai kai ɗa, aga mu zaŋ siɗi Yeruzalem gaini alawaiɗi zi rgi ɵa lai kai ɗi?

¹²Asakal par, won hlai na EPIƊ-ƊAI a vada li gaini sdani amai midiɗi huwuŋ Siyon, a Yeruzalem ɗa, aga a zini gir sini pai na Asiriya, burini kûlûni-si n’aŋ warni, gaini tel zi miisi na tala ɗai gaini lai.

¹³Buri a muɗa ɓa: Mu za sda gaini gdaŋ na wiya, mu zaŋ gaini yel na wiya lai, buri siɗiŋa a na, mu pra edi duɓani hagani aftiɗi ɗai par, mu mula derɗi, Mu pukiɗi paakai azumai midini paramaiɗi zi pai par gaini gdaŋa.

¹⁴Mu mulasi der na wiiɗi ɗai maini ɗif n’a tikisi gutni fiini azumai ɗa nɵa, Mi mulasi afti paŋ maini n’e mili eɵe n’a hina edi ɗuk nɵa: ɗif ktai maa a yima tini amai kai, ktai maa a mala mini amai wek kaalai.

¹⁵Beŋel a kiɗa aŋ kola sini midini ɗif n’a za sda gaini ɗi? Sii zi ɗûkli wala a kiɗa aŋ kola sini midini ɗif n’a za sda gaini ɗi? Mai na ɓa amaraŋa a za sda gaini ni n’a yimaŋ tini ɗa ɵa! mai na ɓa kol kol a yima ɗif n’aŋ tini kaai ɗa amai ɵa!

¹⁶Buri nɵa, EPIƊ-ƊAI, EPIƊ-ƊAI zi spak paŋ aga a ɵina hugi araɗi ɗai na gai liki, Ɗai zi farai ɗa, afu aga a kɵa arbaɗi maini afu n’a tika pini hlai nɵa.

¹⁷Gaglai na wiiɗi Izrayel aga a bunda aŋ afu, Alaw na wiiɗi na Siɗik, aga a bunda aŋ eles n’afu n’aga ya hedek gaini duvuɗvuɗ na wiiɗi edi, a yaŋ edi kriiɗ war mefeŋ ktai.

¹⁸Aga a tuura hlai paŋ edi, jur gaini zardeŋ n’a juva gara na warni lai. Afti aga a bunda maini ɗif zi veglek na gdaŋni a vada vat nɵa.

¹⁹Luwuŋai na war jur n’Asiriya ɗa, aga a hina viya kai, ahiyagwi n’agwi tekeɗe a kiɗa aŋ piɵaŋ ta.

²⁰War mefeŋ ni ɗa, piɗi Izrayel n’ahina, gaiɗi nagai n’e kurɗisi na war pinzibani Yakob, aga e piyi zinai war tini ni n’a ɵiɓiɗi kir kai, aga e piyi zinai war jre war tini EPIƊ-ƊAI, Alaw na Siɗik na wiiɗi Izrayel.

²¹Piɗi n’a hina agwi, pini pnzibani Yakob ɗa, aga a waisi, sini Alaw na gdaŋ gara ɗa.

²²Izrayel, koo ɓa ɗaiku e ɗifu viya maini kaikai n’agoɗom war yem-ra n’abai nɵa tekeɗeɗi, piɗi n’aga a waisi ɗa agwi kadai. Seŋni ɓilki n’edi na wiiku a ɗiyasi zaw, jre-ɗikat aga te huŋva edi maini yem-ra n’a huŋva edi nɵa.

²³Buri ɓiki n’edi n’a ɗiyasi hanɗa, Epiɗ-ɗai Alaw zi Spak paŋ aga a vaŋ amai midin afti paŋ.

²⁴Buri hanɗa, Epiɗ-ɗai Alaw zi Spak paŋ a na muɗa maini nɵa: Tiki ɗaiŋa na ki ɗa war Siyon, ki huniɗi ɗai na Asiriya kai! N'e ɵiɓuki gaini kol kol gaini amaraŋa lai maini n’Egipte te naka zaŋ suku ɵa.

²⁵Amma, mefeŋ a hina viya kai, agwi kadai, suwarŋa na suku aga a tika azumai, hiyŋa aga a bunda siɗi sek aŋ ɓilkiɗi edi.

²⁶EPIƊ-ƊAI zi Spak paŋ, aga a yima daɓalani amai siɗi, maini n’a zaŋ siɗi Madiyanitekai, amai midiɗi huwuŋ Horeb nɵa, Amaraŋaini t'aŋ gai yimi amai midini yem-ra n’abai ɗa kaai, maini a yimiti amai siɗi ɗai n’Egipte ɗa nɵa.

²⁷War mefeŋ ni ɗa, jakni na guma n’aŋ wulaki ɗa, aga a tika edi, Jug n’aŋ wulaki ɗa, aga tika edi lai, aga ki liki haa jug na wulaki a haɗa edi.

²⁸Gawɗi e cûsi a Ayat, a vigitisi Migron vig, wazagai zi gaw n’aŋ tiɗi ɗa, e hiniŋsi a Mikmas.

²⁹E vigi hlai na gai hiɵi haɵ ɗa vig, e miɗi: Mu funumu ɗa a Geba. War Rama ɗa, ɗai e ziriyi. A Gebeya, fuŋ n’abai na wiini Sawul ɗa, ɗai e pri e di yaw.

³⁰Ɗai na Bat-Galim, ɗûûli, Ɗai na Laisa, tiki hangalki ta, Wiyini seŋ, Anatot.

³¹Ɗai na Madmena e ɗa pri edi, Nagai na Gebim e ɗa piyi hlai zi ŋoyai.

³²Girna haa, gawki aga e ɗiyi buri hlai n’agwi a Nob, aga e tiki warɗi edi siɗi huwuŋ na Siyon, gaini boŋor na Yeruzalem, aŋ hitimiŋ.

³³EPIƊ-ƊAI, EPIƊ-ƊAI zi Spak paŋ, a na haɗa tini luwoŋai azumai gaini gdaŋ, Merfeŋni n’amai mogokai ɗa, a haɗaŋ azumai, a haɗaŋ pokoŋsi azumai.

³⁴Jur na hicik ɗa, a bulaŋ azumai gaini beŋel, luwoŋai Sedre najuf gara na Liban ɗa aga a yaka azumai.