Read Mousgoum Esaya 11 Bible Online

Esaya 11 - Mousgoum bible

Esaya 11

¹Ahi ktai aga a wa war pinzibani Isai, sin sdaini par, togoɗi ktai a diyasi tiɓ, aga sisiɗa viya.

²Seze na wiini EPIƊ-ƊAI aga a sumna midini: Seze zi yel gaini zi siɗi, Seze zi si gadai gaini zi si gdaŋ, Seze zi siɗi EPIƊ-ƊAI gaini zi sini hormo lai.

³Sdani ɗa a hormo na sini EPIƊ-ƊAI, Aga a ziti sariya pin arn ɗif kai, Aga a za pin wala n’a ɵinaŋ gai ɵeŋ kaalai

⁴Aga a zitiɗi sariya wiiɗi na murgakai war jre, aga a za siɗi na horafai na midini afti maini n’a na ɗa ɵa. Aga a ɵiɓa afti gaini seŋ na mini par maini gaini amaraŋa nɵa, aga a fuɗa ɗif na meefeŋ edi gaini smer na mini par.

⁵Jre gaini jre-ɗikat a santir n’a rga wuzani gaini kureɗ.

⁶Belemke aga a sumna gaiɗi adumi war hlai ktai, Ahruwi gaini ahi-hek, aga a fana simani marni, ahi ɵeŋ, ahi gurnai, gaini fai n’e likiŋ aga a suma pin marni yaw, arwagwi n’agwi aga a kaŋ aŋ simi.

⁷Slai gaini Urs aga a suma war hlai ktai, alini a fana war hlai ktai lai. Gurnai ɗa lai, gari ɗa lai, aga limi ɗa a kuzum.

⁸Akoɗokai, aga a ɵa dawaŋ war hlai na makai a fana woni, ahiyogwi n’agwi aga a wa tini war waŋ na wiini kaaɗi.

⁹Wala ktai na meefeŋ aga a za kai, wala ktai aga a tuura kai, amai midiɗi huwuŋ na sɗik na wiini EPIƊ-ƊAI, buri siɗi na ɗai e siɗi EPIƊ-ƊAI ɗa aga a va midini afti paŋ, maini yem n’a va war yem-ra n’abai ɗa nɵa.

¹⁰War mefeŋ ni ɗa, pinzibani Isai aga a bunda aŋ wadrapo buriɗi ɗai paŋ, Pinzibaɗi paŋ aga e hilisi sini, Hlai n’aga a sumna warni ɗa, aga a tala juf gara.

¹¹War mefeŋ ni ɗa, EPIƊ-ƊAI aga a miɗiti tini edi azi n’aŋ sulu pra, aŋ pliɗisi piɗi ɗaini n’e hinisi karɗi war Asiriya par, Egipte par, War Patros par, war Etiopiya par, war Elam par, war Sineyar par, war Hamat, gaiɗi n’edi midini wudi na ɵimani yem-ra n’abai ɗa par lai

¹²Aga a drapo amaai wiiɗi pinziba, aga a tipiɗisi ɗai na Izrayel n’e ɵiri edi ɗa, aga a tipiɗisi ɗai na Yuda n’e ɵiri edi war koŋni aftia na puɗu paŋ.

¹³Nɵa sile, na win pizibani Efrayim aga vada edi, gawɗi Yuda aga e vidi edi lai. Pinzibani Efrayim aga e zi sile sin pinzibani Yuda kir kai. Pinzibani Yuda aga e bili gaw sini pinzbani Efrayim kir kaaai.

¹⁴Aga e fiki amai midiɗi Filistrekai na piɗi futi na koskoi sek ɗa aga e virmiɗi ɗai na piɗi futi na dawai par, piɗi marɗi. Aga e kirpiɗi ɗai na Edom gaiɗi na Mowab, Amonitekai lai aga e hini azumai piɗi.

¹⁵EPIƊ-ƊAI aga a tusa yem-ra n’Egipte, a siita amai: aga a siŋka tini midini yem, smerni zi spak, aga a vuvuwa smerni gaini gdaŋ, aga a ɓurwaŋ aŋ arakai muguzak, ɗai aga e hili woni gaini harabak eziɗi ca.

¹⁶Futi aga te ɵa su buri piɗi ɗaini, n’e hini karɗi war Asiriya par ɗa, maiɗi na te naka su, won hlai n’aliɗi Izaiel e niyisi edi war Egipte par ɗa ɵa.