Read Mousgoum Esaya 13 Bible Online

Esaya 13 - Mousgoum bible

Esaya 13

¹Hanɗa a wala n’a muɗa midiɗi Babilon, n’a siŋka arni Esaya, n’ahini Amots.

²EPIƊ-ƊAI a muɗa maini nɵa: Pi drapo amai midiɗi huwuŋ na midiɗi gilɓu su, ɗûliɗi askarai ɗa, huwdiɗi tiki, kapai e niyisi war mini hlai na wiiɗi ɗai n’abakai ɗa.

³Mu sa miɗi siɗi askarai n’e viri edi aŋ wiya, mu yikiɗisi gaŋgalaŋai n’e siŋki hiy na wiya edi, nagai n’e firiyi pin rɗi n’amai na wiya ɗa.

⁴Ziɓiri suura n’a na wa amai midini huwaŋai, a wa maini suura na wiini vokɗi ɗai na viya nɵa, Ziɓiri suura na wiini aftiɗi paakai viya, gaini pinzibaɗi ɗai viya n’e diŋgisi, EPIƊ-ƊAI zi Spak paŋ, a tiliɗi na ɗa e ɗi askaraini n’e hili edi min hatam ɗa.

⁵E hilisi na ɗa edi midini afti na gaigai par, edi mini koŋɗi yai par; EPIƊ-ƊAI gaiɗi nagai n’e siŋki hiyni edi ɗa aga e kisi gir midini afti paŋ.

⁶Zini yama zi tuwi, buri mefieŋ zi sariya na wiini EPIƊ-ƊAI a na gobi, a halasi na ɗa maini gir n’abai n’Alaw zi Spak paŋ a ɵinaŋsi nɵa.

⁷Buri nɵa, gaŋni ɗai aga a yima amai kir kai, gdaŋɗi paŋ a vada edi.

⁸E ɗa war hunai n’abai, siɗi paŋ a fiɗiɗi paŋ, sirdaiɗi a amai, e sirfiɗi maiɗi muni na te na poka nɵa. E ɵiɓi vulai wiiɗi marɗi, e miliŋi gaini hunai, arɗi gai curi keŋ.

⁹Mefeŋ na wiini EPIƊ-ƊAI a na gizi, a mefeŋ zi dawaŋ kai, a mefeŋ zi suwar gaini hiy n’abai, aga a bunditi yai aŋ basga na kadai su, aga a vidiɗi na tuwurai edi paŋ lai.

¹⁰Buri meeɵek na war hlai n’amai na pinzibani kiini kiini paŋ, aga a za gaglaini kai. Futi te diyasi tar ɗa, te tar, tile ɗe aga a za gaglaini kir kaalai.

¹¹Aga mu ziɗi gir wiiɗi ɗai na midiɗi yai ɗa paŋ burini tuwurɗi, mu ziɗi gir wiiɗi na maafanai burini meefeŋɗi lai, aga mu ɗiya kûlûni-si na wiiɗi nagai n’e kûli siɗi ɗa, kol na wiiɗi nagai n’e ŋi gaini gdaŋ ɗa, aga mu haɗaŋsi azumai.

¹²Aga mu bindiɗi ɗai murɗakai e niviɗi gai gir, maini or na gai futini nɵa, aga mu bindiɗi gir maini or na Ofir par nɵa.

¹³Buri hanɗa, aga mu muguza hlai n’amai, yai aga te muguza midini piɗi n’azumai. Aga a za nɵa burini suwar na wiini EPIƊ-ƊAI zi Spak paŋ, burini mefeŋ na wiini hiyni n’abai ɗa.

¹⁴Nɵa ɗif paŋ aga a lawa midini aftini, ɗif paŋ a waya siɗi ɗaini, maiɗi wudrai na ɗai e birgiti nɵa, maini adumai gaini haakai na ɗif n’a tapaŋ amai aŋ kai ɗa nɵa.

¹⁵Ɗif n’e niviŋ li paŋ ɗa, e zini wuruk ta ta, ɗif n’e yimiŋ li paŋ ɗa, e fiɗiŋ edi gaini kaɵkar.

¹⁶Aga e kirpiɗi aliɗi n’agogoi wuzani arɗi, aga e virmi dalamɗi, aga e fini gaiɗi falakaiɗi gai gdaŋ wuzani arɗi.

¹⁷Aga mu fikiɗisi ɗai na Medes amai siɗi, nagai ɗa jaaɗi gaini arzaŋ kai, miɗi pini or kaalai.

¹⁸Gaini ɓarawɗi, e vidiɗi aliogoi n’agogoi edi, aga e hiina haw buriɗi akoɗokokai kai, aga e hiini haw buriɗi aliogoi kai.

¹⁹Babilon, afti na juf n’a suwa afti na wiiɗi paakai na zamai ɗa paŋ, wala zi gan na juf, na ɗai Babilon e kûli siɗi gaini, aga a za suku maini n’a za siɗi Sodoma gaiɗi Gomora n’Alaw a tuuraŋ edi nɵa.

²⁰Babilon aga ku hina edi kadai ɵa gamai, ɗai aga e zi fuŋ warku kir kai, haa kureɗ Ɗai zi giɗimi na gaini eziɗi yaw yaw maa, aga e pi gumuɗi warku kai, ɗai zi giɗimi, aga e simni warku gaini farani faraiɗi, aŋ nivi si n’amla kai.

²¹Aga a sumna warku ɗa a wazagai n’edi buza; tuktruk aga va dalamaiku, alket aga a sumna woni, haakai na maɵagai n’edi buza aga a bolo woni.

²²Adoliyo aga a tuwa amlai war dalamaiku na pɗamai par, belemke warni na juvai par lai. Babilon, mefeŋku zi dibi a ŋasi ya, a na gobi; Mefeŋ ni aga a pra edi kir kai.