Read Mousgoum Esaya 14 Bible Online

Esaya 14 - Mousgoum bible

Esaya 14

¹Buri EPIƊ-ƊAI aga a hiina haw burini Yakob, aga a waya a viriɗi Izrayel pra, aga a wiyiɗisi midini aftiɗi, ɗai n’edi par aga e tipi gaiɗi lai, aga e zi bonu gaini pinzibani Yakob.

²Pinzibaɗi n’edi par, aga e hilisi e miliɗi e kiɗi aha midini aftiɗi. Pinzibaɗi Izrayel aga e bindiɗi aŋ bagakaiɗi, na falakai gaiɗi na maɵagai, aha midini afti na wiini EPIƊ-ƊAI. Nagai n’e miliɗi ka warɗi daŋgai ɗa, e miliɗi war daŋgai, n’e ziɗi ka gir ɗa, aga e ziɗi gir lai.

³Izrayel, mefeŋ na EPIƊ-ƊAI a suku si n’amla li, asakal girku, gaini kaiaiku, gaini gir na ku siɗaŋ war bege par lai ɗa,

⁴nɵa aga ku muɗa seŋ hanɗa burini pai na Babilon, ku muɗa maini nɵa: Ɗif na za gir wiiɗi ɗai ɗa aŋ kir kai! Gir ɗa a tika azumai li! A za ɵa maɵa maɵa ɗa?

⁵EPIƊ-ƊAI a haɗa amaraŋa na wiiɗi ɗai na maafanai edi, a hiɗiti amaraŋai zi pai edi na wiiɗi nagai n’e ŋi ɗa edi.

⁶Ni n’a naka, war suwarni, a ɵiɓiɗi ɗai gaini daɓala wuzani sek, Ni n’a naka, war hiyni ɗa a ŋa midini pinzibaɗi ɗai paŋ, tiyana e ɗa tiki futi pini, e hiniŋ sini amla kaalai.

⁷Afti paŋ a nava si n’amla li, a nava ɵeɗ li, Ɗai e ɗûûli gaini firiyi.

⁸Luwuŋ Sipre gaini luwuŋ Sedre na Liban, a na firiya puku, a muɗa: Hlai na ku kɵa par ɗa, ɗif ktai n’a halasi aŋ biliyi aŋ kir kai.

⁹Hlaiɗi ɗai zi mri, a na muguza azumai burini giziku, a na ɵiyiɗi zi mri amai buriku, n’abakai zi ɵi wuze na midini afti paŋ lai, paakai n’e ɗika ŋi midini pinzibaɗi ɗai paŋ ɗa, a fikiɗi amai midini paramaiɗi par.

¹⁰Gai hlaiɗi paŋ aga e tiki seŋ e miɗi suku ɓa: tuku paŋ gdaŋ puku kai, maiyi tiyi ɵa lai! ku bunda maiyi tiyi ɵa lai koo!

¹¹Abaiku te niyasi li azumai war hlai zi simni na wiiɗi ɗai zi mri, gaini adill puku yaw aŋ tuwi. Matala na puku ɗa, a hlai zi hufi, burgu na muduku, a atla lai.

¹²Ku kɵasi amai war hlai n’amai par maɵa maɵa ɗa? Tuku Maɵiki zi ŋili, Epin Hlai na rum rum, E bulukusi azumai midini afti su ɗi, tuku na ku naka ku ŋa suku midini pinzibaɗi ɗai ɗa!

¹³Ku hiina warku ɓa: Aga mu niya amai war hlai n’amai, mu tikiti paramaiŋa ɗa amai par midini meeɵek na wiini Alaw, aga mu sumna amai midiɗi huwuŋ na alawai na zamai a za diŋgi na wiini midiɗi, edi merfeŋni gal n’azumai sek ɗa.

¹⁴Aga mu niya amai merfeŋni ɗugul n’amai aga mu bunda maini Alaw n’amai ɗa nɵa.

¹⁵Amma e bulukusi li azumai war hlai zi simni na wiiɗi ɗai zi mri, azumai pini waŋ na hulum.

¹⁶Nagai n’e tuluku li ɗa e mili arɗi suku, e ziziruku, e miɗi: Hanɗa a ɗif n’a naka a durguza afti amai, n’aftiɗi paakai lai a jiriya wuzani kai ɗi?

¹⁷N'a naka a ɵa hlai edi su su, a haɗa fuŋ n’abakai azumai, ɗai n’a yimiɗi li min hatam ɗa, a hiniɗi kaalai ɗa kai ɗi?

¹⁸Paakai na wiiɗi piniziba paŋ ɗa, e mri war hormo, gai hlaiɗi paŋ, pai paŋ war waŋni waŋni.

¹⁹Amma tuku ɗa, e buluku edi kadai, edi gaigai sini waŋku par. Maini arwagwi n’e wiŋsi gai mri su nɵa, maini kopoŋɗi ɗai n’e fiɗiɗisi gaini kaɵkar, n’e hugiŋ azumai midini ali-fuŋ na warni waŋ ɗa nɵa, maini kopoŋ na gai kirpi azumai pini aziɗi ɗai nɵa.

²⁰Kopoŋku aga a diŋga gaini kopoŋ na wiiɗi war waŋ ɗa kai, buri ku tuura afti na wiiku edi, ku fiɗiɗi ɗaiku edi lai. Pinzibaɗi ɗai na maafanai hanɗa, ɗif aga a yika yikiɗi war mini kir kai.

²¹Zizini siki aŋ fiɗiɗi aliogoi edi, burini meefeŋ na wiiɗi tamaiɗi, kapai e wiyisi katawai aŋ tiki afti kai, kapai e vi afti gaini meefeŋ kir kaalai.

²²Aga mu faka amai siɗi ɗai na Babilon, -A miɗi na sini EPIƊ-ƊAI zi Spak paŋ par, aga mu haza yikiɗi edi, mu vidiɗi nagain’e hini karɗi edi, aliɗi gaini pinzibaɗi n’asakal sek ɗa lai, -A miɗi na sini EPIƊ-ƊAI zi Spak paŋ par.

²³Aga mu bunditi aŋ hlai na wiini kusokuso, aŋ avai lai aga mu dûgûti edi gaini suruk na wiini ɓilki n’edi, -A miɗi na sini EPIƊ-ƊAI zi Spak paŋ par.

²⁴EPIƊ-ƊAI zi Spak paŋ a ha wala mini maini nɵa: jre jaŋ, aga a za maini na mu hiinaŋ zila, na mu rgaŋ wara ɗa aga a va amai.

²⁵Aga mu vidiɗi ɗai na Asiriya edi midini aftiŋa par, aga mu kirpiɗi azumai pini aza amai midini huwaŋai na wiya, jugɗi n’e tikiŋ wulaɗi ɗaiŋa ɗa, aga mu tikaŋ edi, Jakɗi n’e tikiŋɗi midiɗi ɗa, ga a tikaŋ edi midiɗi par lai.

²⁶Hanɗa a wala n’EPIƊ-ƊAI a rgaŋ warni burini afti ɗa paŋ, Hanɗa a gir n’a zaŋ sini pinzibaɗi ɗai paŋ.

²⁷EPIƊ-ƊAI zi Spak paŋ, a rga seŋ hanɗa warni ya, n’aga a ɗalaŋ tini asiya ɗa? Tini t'aŋ gai miɗi edi meɗ, n’aga a wiyitisi azumai ɗa asiya ɗa?

²⁸War buza na pai Akaz a mra ɗa, miɗi ktai a halasi sini EPIƊ-ƊAI par maini nɵa:

²⁹Tiki Filistrekai paŋ, ki firiyi buri na ɓa daɓala n’e ɵibiki gaini a haɗa edi ɓaw ɗa kai, Buri ɓa, sini wala meefeŋ na gai mri ca par, maakai te kiɗa te niyasi edi, makai hanɗa te kiɗa te wa wala meefeŋ n’abai, zi ɗifli lai.

³⁰Nɵa aliɗi ɗai na horofai n’e wi avut ɗa aga e nivi simiɗi, na murgakai aga e simni ɵeɗ, Tiki, Filistrekai gawki aga e fiɗiki edi gaini wiyamai. Ɗai n’e hini karɗi piki ɗa aga e nivi fiɗi n’edi lai.

³¹Tiki magla na min min fuŋ n’abakai, ɗûûli, tiki fuŋ n’abakai, ɗûûli lai, Tiki ɗai na Filistre paŋ, gdaŋki a yima edi. Buri agiyiŋ a na halasi war gal n’azumai par. Arbaɗi gawki ɗa, ktai na ɓasa edi kiini aŋ kai.

³²Wiyini seŋ n’aga a sa siɗi ngai na Filistrekai e ɵiniɗisi ɗa a na wata ɗa? Seŋ aga a waya siɗi ɓa a tûûriti Siyon azumai ɗa a EPIƊ-ƊAI na horafai n’arbaɗi ɗaini aga e nivi simni na ɵeɗ woni.