Read Mousgoum Esaya 16 Bible Online

Esaya 16 - Mousgoum bible

Esaya 16

¹Slinini ahini-adume wiini epin-gezani afti ɗa, A Sela edi war basga na kaɗataŋ par, kiŋni wiini pai na Yuda amai midiɗi huwuŋ Siyon na juvi ɗa.

²Ɗai na Mowab e ɗiyi agoɗom mini hlai zi hiwi na wiini ra Arno, maini wala-zi-ɗifli n’e birgiŋ a pra edi nɵa, maini ali fiini n’a zilarasi edi war gutni par nɵa lai.

³Ɗai na Mowab e zilbiɗi ɗai na Yeruzalem e miɗiɗi: Kiti miki, ɗiyi seŋ ktai zaw, girvudi n’arba ɗa, ki wi tiki edi midiyi maiɗi duvuk na te ŋuyiyi nɵa, ŋuyiɗi nagai n’e ɵiriɗi edi ɗa, ki wiiɗi piɗi nagai n’e pri edi amai kai.

⁴Hiniɗi ɗaiyi n’e priɗi edi e simni ahaki, Za aŋ hlai zi ŋoyai na wiiɗi buri ni n’a ɓilka hlai edi ɗa. Buri ni n’a za gir wiiɗi ɗai, dibini a ŋasi gobi; ɓilki n’edi aga a vada ni n’a kirpa hlai aga a vada edi midini afti par lai.

⁵Paramaiɗi-paiku aga te ɗiya gdiŋi war jre. Midiɗi Paramai hanɗa, war pinzibani David par, ɗif na jre aga a sumna midiɗi. A ɗif zi ɗûkliti sariya n’a za maini n’a na ɗa ɵa, a purma aŋ ziti sariya war jre lai.

⁶Tiyi mi ɵini labarni kûlinisi na wiiɗi Mowab ɗa ya, -a kûlûni-si n’a suwa suwai, Hiini n’aŋ warɗi ɓa te kiɗa ta ɗa, kûli na te kola siɗi, ŋi na te ŋa siɗi, gaini yaŋgaɗi n’a meere kadai lai.

⁷Amma tiyana ɗa ɗai na Mowab e ɗa tuwi midiɗi Mowab, gai hlaiɗi e tuwi paŋ, Midini greŋ na wiiɗi Kir-Hereset ɗa, gdaŋ warki kai, amma ki ɗa ɵi hama.

⁸Buri afti na Hesbon a na tuura edi, Abakai n’e ŋi midini afti, e ɗûkli luwoŋai zi vin na gai futini na Sibma ɗa edi, na naka a diya haa a Yazer, edi war basga na kaɗataŋ lai: Tini ɗa a wa edi haa a edi midini yem-ra n’abai zi Manda par.

⁹Buri nɵa, aga mu tuwa aŋ bonu gaiɗi ɗai na Yazer, midini zardeŋ zi vin na Sibma. Aga mu siki tuwi n’ara aŋ yem zi ci, tuku Hesbon gaiku tuku Eleyale: buri midini hiɗini seyemku gaini ruwiini alini luwuŋ zi vin na wiiku, ɗuwal zi firiyi na wiini hiɗi ɗ'aŋ kir kai.

¹⁰Firiyi gaini firiyi n’abai na war zardeŋki a vada edi vat, war zardeŋki zi vin ɗuwal zi firiyi gaini suura zi firiyi aŋ kir kai, Ɗif n’a sipiɗa vin war grak aŋ kir kai, ɗuwal zi firiyi na burini ruwiini ali luwuŋ zi vin ɗa aŋ kir kai.

¹¹Buri nɵa, wazagai na wara a suura maini adill nɵa midiɗi Mowab agula te tuwa midiɗi Kir Heres nɵa lai.

¹²Tili, ɗai na Mowab, aga e kiyi siɗi aŋ hili amai midini zi ɓaka. Aga e niyi amlai war hlai na sɗik aŋ siiwi, amma e kiɗi e nivi wala ktai kai.

¹³Hanɗa a seŋ n’EPIƊ-ƊAI a muɗaŋsi haa avut par buriɗi Mowab.

¹⁴Amma tiyana EPIƊ-ƊAI a na mu, ɗa seŋ zamai maini nɵa: Tiyana par haa buza hu kas ɗa, kol na wiiɗi Mowab ɗa aga a vda edi. Gai vokɗi na viya paŋ tekeɗeɗi, piɗi n’aga a hina agwi ɗa, aga apɵa aŋ wala kai, a nava kaalai.