Read Mousgoum Esaya 19 Bible Online

Esaya 19 - Mousgoum bible

Esaya 19

¹Miɗi na sini EPIƊ-ƊAI par na buriɗi Egipte. Tili, EPIƊ-ƊAI a sumnasi midini ɗugul na kokolai, a na halasi warɗi Egipte. Alawai na jrekai-kai na war Egipte ɗa a na jiriya wuzani, ɗai n’Egipte ɗa, gdaŋɗi a na vada edi.

²Aga mu fikiɗi ɗai n’Egipte ɗa amai siɗi marɗi, Ɗif paŋ a hitima gaini tawalni, gaini marmaini, fuŋ n’abai a hitima gaini fuŋ n’abai, aftini pai gaini aftini pai lai.

³Yel na wiiɗi ɗai n’Egipte aga a vada edi, aga mu turla seŋɗi n’e kitiŋ ɗa; aga e hili mini alawai na jrekai-kai, e zilbi sezeɗi ɗai zi mri, e zilbi seze na jrekai kai, gaiɗi ɗai zi siɗi wuti lai.

⁴Aga mu siti Egipte war tiɗi ɗai na hiinini haw warɗi kai, pai zi spak n hiinini haw warni kai, aga a ŋa midiɗi, -A miɗi na sini EPIƊ-ƊAI par, EPIƊ-ƊAI zi Spak paŋ.

⁵Yem na war yem-ra n’abai aga a hiɗika amai, ra ɗa aga a hiɗika amai, a huula amai.

⁶Yem na war ra ɗa aga a hofa, tini ra Nil, na war Egipte, aga a waya azumai, aga a huula amai lai, vayai gaini evek papirus aga a gumruga.

⁷Wulani ra Nil ɗa aga a hina gulɓu kadai su, hlai na ra Nil a niya agoɗom war yem-ra n’abai sek woni ɗa, aga a hina edi gulɓu lai, Seyem n’e biliŋ ɵimani ra Nil paŋ ɗa aga a ya edi, smer aga a fanaŋ, a vadaŋ edi lai.

⁸Ɗai zi yimi hilif aga e ɵi marava siɗi, nagai n’e ɵi zuuti agoɗom war ra Nil ɗa aga e tuwi, nagai n’e ɵi ava ɗa, gdaŋɗi aga vada edi.

⁹Nagai n’e zi sda gaini leŋ ɗa, siyer aga a yimiɗi, falakai n’e pisiɗiŋ edi gaiɗi maɵagai n’e hiŋ ɗa, siɗi aga yima edi kai.

¹⁰Nagai paŋ n’e zi sda kapai afti a wula wuzani, aga e giɵiri, nagai paŋ n’e tiki farai war tile ɗa, aga e kwimi.

¹¹N'abakai na war fuŋ n’abai na Sowaŋ, e ɗi ɗai na hangalɗi a kiɗa kai, ɗai na yalakai n’e sini gadai wiini Faraw ɗa, a vok na wiiɗi ɗai na yel midiɗi kai, Asiya ɗi paŋ a miɗini wiini Faraw ɓa: Ta m’ahini ɗif zi yel, Mu pinzibaɗi pai Ki miɗini ɵa maɵa aɵa ɗa?

¹²Tuku pai n’Egipte, ɗaiku na yalakai e ɗi wata ɗa pra! E siŋkuku wazagai n’aga a za ɗa haw kir ka! n’EPIƊ-ƊAI zi Spak paŋ a rgaŋ warni aŋ zaŋ siɗi Egipte ɗa! kapai ɗai e siɗi hanɗa.

¹³N'abakai na Sowaŋ ɗa e ɗi ɗai na tatalakai, nagai na Nof ɗa jre ktai arɗi kai, abakaiɗi pinziba hanɗa e ɗa wiliti Egipte edi

¹⁴EPIƊ-ƊAI a hinasi seze zi turli midiɗi, kapai e wiliti Egipte edi war sdaɗi na te zaŋ ɗa paŋ, maini ɗif n’a ciina gaini suul n’a titiɓa arni huŋvini nɵa.

¹⁵Arbaɗi ɗai na warɗi Egipte ɗa, Sin humok par haa sin n’asakal ɗa ta, ktai n’a za wala na pɗem buriɗi Egipte, aŋ kai.

¹⁶War mefeŋ ni ɗa, ɗai n’Egipte aga e bindi maiɗi falakai nɵa, aga e jiriyi, hunai aga te yimiɗi, won hlai n’aga e tiliti tini EPIƊ-ƊAI zi Spak paŋ te muguza, hlai n’aga a yimitisi amai midiɗi.

¹⁷Afti na Yuda, aga a bunda aŋ wala zi mili hunai, buriɗi Egipte. Hlai paŋ n’e yiki yikiɗi li wuzaɗi ɗa, aga te jiriya, buri wala n’EPIƊ-ƊAI zi Spak paŋ a rgaŋ warni buriɗi.

¹⁸War mefeŋ ni ɗa, fuŋ n’abakai ɵim midini afti n’Egipte aga e miɗi war mime na wiiɗi Hebrekai, aga e hi miɗi gaini EPIƊ-ƊAI zi Spak paŋ lai: ktai arbani fuŋ hanɗa yikini Ir-Heres.

¹⁹War mefeŋ ni ɗa, aga e rgi gûwiŋ zi ɓaka burini EPIƊ-ƊAI aha war Egipte, aha arba; aga e ɗiyi ahi-fuŋ ktai amai zaw aŋ wiini EPIƊ-ƊAI, gobi edi min hagani sek.

²⁰Hanɗa aga a za aŋ wala zi siŋki, aŋ wala zi zaida na wiini EPIƊ-ƊAI zi Spak paŋ, aha war Egipte: Won hlai n’aga e tuwi in EPIƊ-ƊAI, buriɗi ɗai n’e ɗa ziɗi gir ɗa, aga a ɵiniɗisi ɗif na kûrɗiɗi edi, n’aga a ɵa pini piɗi par aŋ pliɗi edi.

²¹EPIƊ-ƊAI aga a siŋka sini arɗi ɗai n’Egipte, ɗai n’Egipte aga e siɗi EPIƊ-ƊAI lai war mefeŋ ni ɗa. Nagai aga e zini ɓaka, e sini like, e zi ɵinini-ha wiini EPIƊ-ƊAI, e viŋ amai lai.

²²EPIƊ-ƊAI aga ziɗi gir wiiɗi ɗai n’Egipte mai hanɗa ɵa. Aga a ziɗi gir, amma asakal par aga a zuliɗi, aga e wiyisi sini EPIƊ-ƊAI, ni aga a waisi miɗi, a zuuliɗi lai.

²³War mefeŋ ni ɗa, futi ktai aga te ɵaɗi war Egipte par, a Asiriya sek. Ɗai n’Asiriya aga e hili war Egipte, ɗai n’Egipte aga e hilisi war Asiriya lai. Ɗai n’Egipte gaiɗi ɗai n’Asiriya aga e zi ɵeŋni EPIƊ-ƊAI aŋ bonu.

²⁴War mefeŋ ni ɗa, Izrayel aga te pɵa aŋ n’ag'aŋ hu, asakalɗi Egipte gaiɗi Asiriya par, n’aga te za aŋ afti zi ɓiki na midiɗi yai,

²⁵n’EPIƊ-ƊAI zi spak paŋ aga a ɓakaŋ maini nɵa: Ɓiki a sumna miɗiki, tiki ɗaiŋa n’Egipte, gaiki tiki ɗai na Asiriya, ma mu rgiki gaini ta, gaiki tiki ɗai na Izrayel, na ki ɗi bulum na wiya lai.