Read Mousgoum Esaya 2 Bible Online

Esaya 2 - Mousgoum bible

Esaya 2

¹Seŋ na muɗa sin Isai, n’ahini Amots, buriɗi Yuda gaiɗi Yeruzalem, war siŋki.

²Wuzamu sek, mefeŋ ktai ɗa, huwuŋ na tempel na wiini EPIƊ-ƊAI aŋ midiɗi ɗa aga te za aŋ huwuŋ n’amai midini huwaŋai paŋ, aga te suwa boŋorai amai paŋ lai. Pinzibaɗi ɗai paŋ aga e diŋgisi siɗi sek.

³Ɗai viya aga e hili woni, aga e miɗi: Hilisi, niyumu amai midiɗi huwuŋ na wiini EPIƊ-ƊAI, Amai warni tempel na wiini Alaw na wiini Yakob. Ni aga a hitirimu futini, aga mu piyumu war futini n’agogoi Buri gadai zi ɗû, aga a halasi a Siyon par, seŋ na wiini EPIƊ-ƊAI ɗa a Yeruzalem par lai.

⁴Aga a ziti sariya, arbaɗi pinzibaɗi ɗai paŋ, Aga a tika arbaɗi ɗai viya azumai lai. Gaini kaɵkarɗi, aga e giɵi hidikai, gaini kawakaiɗi aga e giɵi maharamai. Hatam aga a za arbani pinzibaɗi ɗai kir kai. Ɗif aga a ɵina labarni gaw kir kai.

⁵Hilisi, pinzibani Yakob. Piyumu war gaglai na wiini EPIƊ-ƊAI.

⁶EPIƊ-ƊAI, Ku hiniɗi pinzini Yakob, na ɗaiku edi mak, Buri ɓa e tirɗi edi pin sda na wiiɗi ɗai zi siɗi wuti na piɗi futi na dawai-par, gaini sda na wiiɗi ɗai n’e tili sin wazagai zi rgi n’arbani hlai n’amai, maiɗi Filistrekai nɵa. Buri e ɵini miɗi marɗi gaini pinziba n’edi par gara.

⁷Aftini a va gaini arzaŋ, gaini or lai. Derni ɗa a pɵa kai. A va gaini plasai, saretaini zi gaw a pɵa kaalai.

⁸Aftini a va gaini alawai na jrekai kai; e hûrgi azumai wuzani wazagai n’e ziŋ gaini tiɗi, wuzani wazagai n’ali tiɗi a zaŋ ɗa.

⁹Ɗai murɗakai, e tiki siyer ɗaw, e wi siɗi azumai marwai, ku hiniɗi meefeŋɗi kai.

¹⁰Ñuyi siki arbani huwaŋai, niyi azumai pini afti, wuzani suwar na wiini EPIƊ-ƊAI gaini ŋiliɗi abai na wiini.

¹¹Kûlûni-si na wiiɗi ɗai ɗa aga a hosa azumai, Abai na wiiɗi ɗai ɗa aga te homka azumai, War mefeŋ ni ɗa, aga a nava kol a EPIƊ-ƊAI ktai pal.

¹²Buri hanɗa a mefeŋ na wiini EPIƊ-ƊAI zi Spak paŋ Buri aga a faka amai sini wazgai zi kol paŋ, n’a siɗa sini ɓa a suwa paŋ, n’a zila sini amai lai, buri a hosaŋ azumai.

¹³Aga a faka amai sini luwuŋ Sedre na Liban, n’amai mogokai, gaini luwuŋ Sene na Bazaŋ paŋ lai.

¹⁴Aga a faka amai sini huwaŋai na mogokai, gaini boŋorai n’amai mogokai lai.

¹⁵Aga a faka amai sini poriyo na mogokai, gaini ɵaga n’e ɵiŋ amai sin hlai lai.

¹⁶Aga a faka amai sini hulamai n’abakai na Tarsis, gaini hulamai n’abakai na juvai paŋ.

¹⁷Kûlûni-si na wiiɗi ɗai ɗaaga a hosa zumai, Abai na wiiɗi ɗai ɗa aga te homka azumai, War mefeŋ ni ɗa, aga a nava kol ɗa a EPIƊ-ƊAI ktai pal.

¹⁸Alawai na jrekai kai paŋ aga a vada edi.

¹⁹Ñuyi siki war waŋ na sini huwaŋai, azumai war hulumni afti, burini hunai na wuzani EPIƊ-ƊAI, gaini ŋiliɗi abai na wiini, Won hlai n’aga a fakasi amai aŋ mula hunai pini afti ɗa.

²⁰War mefeŋ ni ɗa, ɗai aga e pûki alawaiɗi najrekai kai zi arzaŋ gaini zi or ɗa edi wiini kusum gaini kirfe-kirfe alawai n’e rigiŋ buri e hûrgi azumai wuzani.

²¹Ɗai aga e niyi war waŋ na sini huwaŋai gaini baŋa na ɓasa sini huwaŋai lai, burni hunai na wuzani EPIƊ-ƊAI, gaiɗi ŋilina wiiɗi abai na wiini Won hlai n’aga a fakasi amai aŋ mula hunai pini afti ɗa.

²²Hiniɗi ɗai murɗakai mak: suŋfaɗi a smer kadai meere, E nivi wala ktai kai sam.