Read Mousgoum Esaya 21 Bible Online

Esaya 21 - Mousgoum bible

Esaya 21

¹Miɗi na sini EPIƊ-ƊAI par na burini basga na kaɗataŋ n’a na gobi ɵimani yem-ra n’abai. A halasi edi war basga na kaɗataŋ par, midini afti na mula hunai piɗi ɗai par, Maini berber n’a vuga Negev ɗa nɵa.

²Wala zi siŋki ktai a siŋka ara. A wala zi siŋki na dawaŋni aŋ kai. Tuku zi zi tege, za tegeku ɗa, tuku zi tûûri hlai, tuura hlai ɗa, Elam, hala hitima! Mede, caka hlai ɗa! aga mu vada marava na wiiɗi edi.

³Buri nɵa, wuza paŋ a fuɗaŋa paŋ, ŋiiba a ymaŋa, maini ŋiiba na yimiti muni na te dra te poka nɵa. Haŋgala n’a pra edi ɗa a hinaŋa aŋ ɵina wala kai, hunai na te yimaŋa ɗa, te hinaŋa aŋ tala wala kaalai.

⁴Mu turla marwai, mu jiriya kaw kaw tiɗi hunai, Koskoi na mu diriti gara ɗa, te bunda buriya aŋ wala na mulaŋa hunai pa.

⁵E zizini simi amai midiɗi tabel, ɗai zi giɗimi hlai e ɗiyi war hlaiɗi zi gɗam, ɗai e simi e ci lai. Tizaw ɗuwal a wasi: Fiki amai! Zizini wazagaiki zi gaw! Tiki abakaiɗi askarai!

⁶Buri EPIƊ-ƊAI a muɗaŋa maini nɵa: Hala, Ɗiya ɗif zi giɗimi hlai war hlaini, kapai a ziki heelek.

⁷A tala saretai zi gaw, plasai n’a gidiyaŋ sulu sulu gaini farani ablehökai, gaini farani ɵigini, a tika hangalni ta, a tika hangalni sini gai futini.

⁸Asakal par a ɗuula maini gurnai ɵa a muɗa: EPIƊ-ƊAI, girvudi ɗa, mu yiva war hlaiŋa zi gɗam ɗa ɵa zaw, Duvuk, mu fana ɗa ɵa zaw lai,

⁹Saretai zi gaw a na vuga, gaiɗi ɗai gaini plasai, plasai na gidiyaŋ sulu sulu lai. Nɵa a tika seŋ a muɗa: Babilon te kɵa azumai li, Babilon te kɵa azumai li, alawaiɗi zi rgi paŋ a na azumai gai kukuɗi kuɗ kuɗ.

¹⁰Tiki na gai gɵi war lulufŋa maini ali seyem nɵa, Wala na mu ɵinaŋsi mini EPIƊ-ƊAI zi Spak paŋ, Alaw na wiiɗi Izrayel par ɗa, mu miɗiŋki ta.

¹¹Miɗi na sini EPIƊ-ƊAI par na buriɗi Duma. Ɗai e ɗuuliŋasi a Seyir par ɓa: Tuku ɗif zi giɗimi hlai duvuk, duvuk te za ɗa maɵa ɗa? Tuku ɗif zi giɗimi hlai duvuk, duvuk te za ɗa maɵa ɗa?

¹²Ɗif zi giɗimi a wiyiɗi seŋ ɓa: Gorof par, te na halasi, duvuk te na halasi lai. Na ɓa ki firiyi ki zilbi ɗa, zilbi! Wiyisi mefeŋ zamai, sai ki wiyisi gai wiyi.

¹³Miɗi na sini EPIƊ-ƊAI par na buriɗi Arabiya. Aga ki fini edi war basga na wiiɗi Arabiya, Tiki ɗai na ki hili morkoi piɗi marki waŋ na Dedan par.

¹⁴Tiki ɗai na midini afti na Tema, Kiɗi yem wiiɗi nagai na sai te na ziɗi gara, hili miɗi nagai n’e prisi edi gaini wazagai zi simi.

¹⁵Buri e prisi edi na ɗa wuzani gaw, wuzani kaɵkar na gaini rɗi edi bak wuzani ɓaraw na war taŋ ta ta, gaini gir na wiini hatam lai.

¹⁶Buri EPIƊ-ƊAI a muɗaŋa maini nɵa: A hina buza ktai pal, abai na wiiɗi Kedar aga te vada edi.

¹⁷Ɗai na Kedar n’e ɵiɓi ɓaraw gara ɗa, aga e hini viya kai, a muɗa hanɗa a EPIƊ-ƊAI, Alaw na wiiɗi Izrayel.