Read Mousgoum Esaya 22 Bible Online

Esaya 22 - Mousgoum bible

Esaya 22

¹Miɗi na sini EPIƊ-ƊAI par, na burini huduk na siŋki a za woni. Ku niya amai midini daba zi mili gaiɗi ɗaiku paŋ buri maɗa?

²Tuku fuŋ n’abai zi bakawa, zi suura, na war fet lai. Ɗaiku n’e mri ɗa, e mri mini gaw kai, e mri edi min hatam kaalai.

³Abakaiɗi askaraiku e pri edi piɗi marɗi paŋ, ɗai zi ɵiɓi ɓaraw e yimiɗi yaw, Ɗaiku paŋ, e yimiɗi yaw, won hlai n’e ɗa pri edi ɗa.

⁴Buri nɵa, mu miɗiki: Hiniŋa wiiki mak, hiniŋa mu tuwiti girŋa, ki guziŋa pa gaini arai zi pi ɗa kai, buri gir n’a za siɗi ɗaiŋa ɗa.

⁵Buri hanɗa a mefeŋ zi hunai n’abai, a mefeŋ zi bizi, zi durgizi, n’Epiɗ-ɗai Alaw zi Spak paŋ a ɵinaŋsi mudumu warni huduk na siŋki a za woni: ɵaga a haɗa li ɗa, ɗai e ɗûûli amai sini huwuŋ sek aŋ piyi zinai.

⁶Ɗai na Elam mili ɓarawki: saretai zi gaw na wiiɗi ɗai zi hatam, gaiɗi ɗai zi plasai ɗa, a hala wuzani. Askarai na Kir, milisi gamarki anene.

⁷Yeruzalem, hudokaiku na javai a va li gaini saretai zi gaw ɗai zi plasai e giri siɗi anene min magala par gar, gar.

⁸Yuda wala na te ŋoya duɓani aŋ kir kai. War mefeŋ ni ɗa, aga ku bunda arku sini wazagai zi hatam n’amlai war dilimi n’e yikiti ɓa "Jur" ɗa.

⁹Tiki ki tili baŋa na viya n’a na siɗi ɵagai na sini fuŋ n’abai na wiini David ɗa, ki giɗimi yem war hlai n’e giɗimi yem warni n’azumai ɗa,

¹⁰ki piɵi dalamai na war Yeruzalem ɗa kafa, ki hiɗi dalamai zamai azumai aŋ rgiti ɵagai ɗa gdiŋi gaini.

¹¹Ki zizini hlai zi yem arbani ɵaga na sulu ɗa ta, kapai yem na war hlai zi yem na ɗipar ɗa a bula woni. Amma ki mili arki sini ni n’a za hanɗa kai, ni n’a zasi hanɗa haa aɗipar ɗa, ki siɗiŋ kai.

¹²War mefeŋ ni ɗa, Epiɗ-ɗai Alaw zi Spak paŋ, a firya ɓa ki tûwi, ki ɵi marava siki, ki fiɗi ayir na miɗiki edi, ki wi sapa zi tuwi siki lai.

¹³Paŋ ktai, ɗai e firyi gai firyi, gaini firiyi n’abai e fiɗi ɗa a garakai, e fiɗi adumai gaini haakai. E limi ɗa a neŋ, e ci vin lai, e miɗi: Sumumu, cumu lai, buri ɓa dawai sek ɗa, aga mu mrumu.

¹⁴Amma EPIƊ-ƊAI zi Spak paŋ a siŋkaŋa edi ara gaglai ɓa: Meefeŋ hanɗa aga a haza edi kai, haa ki mri gaini ɵa, -A muɗaŋ a EPIƊ-ƊAI zi Spak paŋ.

¹⁵Epiɗ-ɗai Alaw zi Spak paŋ a na muɗa maini nɵa: hala sini abai na midini wazagai zi gɗam ɗa, sini Sebna, abai na midini wazagai n’ahani pai ɗa, ku miɗini ɓa:

¹⁶Walaku n’aŋ won na ɗa a ma ɗa, zigelku n’aŋ won na ɗa asiya ɗa? Na kapai ku ɓula waŋku won na ɗa? Ɗai e ɓili waŋɗi ɗa amai midini huwuŋ, E zizini hlai n’e tiki kopoŋɗi woni amai sini huwuŋ lai.

¹⁷Ku tala suku ɓa ku gdaŋ, amma EPIƊ-ƊAI aga a bulukuɗi edi won na par gaigai, aga a nuguku gaini sogom maini goro nɵa.

¹⁸aga a lukutuku azumai maini kirnai ɵa, warni afti n’abai, aga ku mri woni, gaini saretaiku zi gaw n’abakai, tuku na ku tikini siyer wiini dalamni Epin-gezaku ɗa.

¹⁹Aga mu burguku edi war sdaku par, aga mu tika sda n’aŋ tuku ɗa edi lai.

²⁰War mefeŋ ni ɗa aga mu yikasi, Eliyakim, n’ahini Hilkiya, na ɵeŋŋa.

²¹Aga mu witini sapaiku zi sda sini, aga mu nigini wuzani gaini sarpa, aga mu sitini abaiku, aga a bunda aŋ api buriɗi ɗai na Yeruzalem aŋ api na wiiɗi ɗi na Yuda lai.

²²Aga mu sini kle na wiini pinzibani David war tini, Miŋ hlai n’a malaŋ li ɗa, ɗif a kiɗa a ŋ kai, na ɓa a ŋ li ɗa, ɗif a kiɗa a malaŋ kaalai.

²³Aga mu ɓalaŋ azumai warni hlai na gai futini, maini luwuŋ n’e ɓiliŋ azumai nɵa, aga a za aŋ wala zi kol na wiiɗi pinzibani.

²⁴Wala paŋ n’a sa kol wiiɗi pinzibani aga a pa amai sini. Zagalakaini paŋ, n’abakai ta ta gaiɗi n’agogoi paŋ aga e higi amai sini maini tasakai gaini grakai gaini koloŋai n’e higiŋ amai sini luwuŋ nɵa. Guma hanɗa!

²⁵War mefeŋ ni ɗa, - A miɗi na sini EPIƊ-ƊAI zi Spak paŋ par- luwuŋ n’e ɓiliŋ azumai war hlai na gai fuutini ɗa, aga a rɗa amai, aga a haɗa a kɵa azumai, jak n’e higiŋ amai sini ɗa aga a tuura edi-A muɗa ɵa na ɗa a EPIƊ-ƊAI.