Read Mousgoum Esaya 24 Bible Online

Esaya 24 - Mousgoum bible

Esaya 24

¹Tili EPIƊ-ƊAI a tuura afti edi, a vada wazagai na warni paŋ edi, a durguza hlai paŋ amai, a ɵiriɗi ɗai na midini paŋ edi:

²Paakai zi ɓaka gaiɗi ɗai na doogo paŋ, ɗif gaini begeni paŋ, Muni gaiɗi bagaiɗi paŋ, ɗif n’a wura wala edi gaini ɗif n’a wura wala paŋ ɗif na tufa wala gaini ni n’a tufiŋni paŋ. Ɗif n’a tumuŋni a na edi, gaini ni na tumuŋ aŋ midini paŋ lai.

³Afti n’aŋ war tuwi a na tuura edi, hlai paŋ gai virimi kafa lai, A muɗa hanɗa a EPIƊ-ƊAI.

⁴Afti n’aŋ war tuwi, gdaŋni a vada edi vat, afti na gdaŋni vada edi ɗa, a na tuura edi, ɗai n’abakai na midini afti ɗa, gdaŋ warɗi kir kaalai.

⁵Ɗai na midin afti ɗa e bindi afti ɗa hi-hir, buri e zi pini gadai zi ɗû kai, e viyɗi gadai zi ɗiyi viyeɗ viyeɗ, Bonu n’a vadakai n’arbaɗi gaini Alaw, e ɗukliŋ daf.

⁶Buri nɵa tusa aga a vada afti ɗa edi, ɗai na midini afti ɗa, aga e siɗi gir; nɵa ɗai na midini afti paŋ aga e vidi edi, aga e hini agwi kadai.

⁷Vin na hehe ɗa aŋ war kwimi, buri sul na hehe aŋ kai, luwuŋ zi vin ɗa a mra edi su, nagai paŋ n’agulɗi a naka war firiyi ɗa e bindi e nuumi gai nuumi.

⁸Tuwi na juf na wiini gaŋga ɗa a ɗiya zaw, Suura na wiini fet ɗa a vada vat, tuwi na juf na wiini adill ɗa a ɗiya zaw lai.

⁹Ɗai e ci vin ɗa gaini yama kir kai, sul na pɗem ɗa a bunda miɗi ɗewek.

¹⁰Fuŋ n’abai na kadai su ɗa a ho li azumai. Mini dalamai paŋ a li. Ɗif a kiɗa a niya aha sek kir kai.

¹¹Ɗai e ɗûûli war futi, buri ɓa vin aŋ kai, firiyi aŋ kir kai, Fet ɗa joogo edi midini afti ɗa par jog.

¹²War fuŋ n’abai ɗa, a hina ɗa a deeɓer, mini hlai a haɗa azumai ɓaw ɓaw, a tuura edi kok.

¹³Midini afti, arbaɗi ɗai ɗa, wala aga a hina viya kai, Maini ali luwuŋ olive, n’e ruwi ali n’avut ɗa yaw nɵa, maini ali luwuŋ zi vin, n’a hina ktai ktai asakal ruwiini ali n’a naiya avut ɗa nɵa.

¹⁴Amma nagai n’e hini karɗi, aga e ɗûûli gaini wulaɗi amai, e ɗûûli ɗuwal zi firiyi, E ɗuulisi gaini firyi n’abai piɗi futi na koskoi par buriɗi abai na wiini EPIƊ-ƊAI.

¹⁵Buri nɵa, kûli EPIƊ-ƊAI, piɗi futi na dawai par par, Kûli yikini Epiɗ-ɗai Alaw na wiiɗi Izrayel edi midini wudi n’arbani yem-ra n’abai ɗa par.

¹⁶Edi min koŋni yai par, mi ɵini yama a na zina maini nɵa: "Kol sin Alaw na jre, Amma ta, mu muɗa: mu ɓa ta, mu ɓa ta, haw gara buriya, Ɗai z'alasakai e ɗa zi eles mada, asiya ɗi paŋ a fuɗa was gai gdaŋni.

¹⁷Hunai n’abai gaini waŋ gaini azaw, hanɗa paŋ a na biyiki, tiki ɗai na ki ɗa midiɗi yai.

¹⁸Ɗif n’aga a pra edi wuzani suura zi hunai ɗa, aga a kɵa warni waŋ, Ni n’aga a niyasi azumai warni waŋ par ɗa, aga a yima warni azaw, buri fenetir n’arni hlai n’amai par aga malasi edi, ezini afti zi tûri n’azumai aga jiriya.

¹⁹Afti aga a ɓasa, aga a haɗa, aga a muguza lai,

²⁰Afti aga a kiɵiŋa maini ɗif zi ciini nɵa, ezini aga a pa kir kai maini gumu na smer a tikaŋ nɵa. Hini n’amai midini gadai ɗa a yimaŋ guma, a kɵa, a kiɗa a faka kir kai.

²¹War mefeŋ ni ɗa, EPIƊ-ƊAI aga a ziɗi gir wiiɗi askarai n’amai arbani hlai n’amai. Aga a ziɗi gir wiiɗi paakai n’azumai midini afti ɗa lai.

²²Aga e tipiɗi war hlai ktai maiɗi ɗai zi daŋgai ɵa, aga e duugiɗi amlai duk, feŋ yaw asakal par, aga e zilbiɗi miɗi wuzaɗi sariya.

²³Tile aga a tika siyer, Futi aga te gaini siyer lai, Buri EPIƊ-ƊAI zi Spak paŋ, a na aŋ pai, midiɗi huwuŋ Siyon a Yeruzalem, abaini te na wuzaɗi n’abakai na war fuŋ n’abai ɗa lai.