Read Mousgoum Esaya 25 Bible Online

Esaya 25 - Mousgoum bible

Esaya 25

¹EPIƊ-ƊAI tuku k’Alaw na wiya, Mu suku kol, mu kola yikiku amai, Buri ku za wazagai n’abakai na bunda ɗif hiyak, Wazagai na haa gamai par, na muguza kai, na gdaŋai.

²Buri ku bunda fuŋ n’abai hanɗa aŋ deeɓer, Fuŋ n’abai zi ɵaga ɗa ku tuuraŋ edi dilimi na pɗemi na wiiɗi ɗai n’edi par t'aŋ war fuŋ n’abai ɗa kir kai, aga te rga amai duk kir kai.

³Buri hanɗa pinzibaɗi ɗai zi spak aga a kuluku, fuŋ n’abai na wiiɗi ɗai na kaarasai aga a suku hormo.

⁴Buri tuku ku hlai zi ŋoyai na wiiɗi ɗai na hurafai, ku hlai zi ŋoyai na wiiɗi na murgakai na war gir, ku hlai zi ŋoyai na wuzani faŋ n’a ɵa abai, ku seze na midiyi wuzaɗi futi zi yi, Buri suŋfaɗi ɗai na kaarasai ɗa a na maini faŋ na barawai a ɵiɓaŋ sini ɵaga nɵa.

⁵Tuku ku ɗala suura na miɗi ɗai n’edi par, maini na ku ɗala yuvuguɗi futi midini hlai na kooloŋ ɗa nɵa. Ku ɗala yama na wiiɗi ɗai na kaarasai, maini ɗugul na miɗi futi ɗa nɵa.

⁶EPIƊ-ƊAI zi Spak paŋ aga a ziti fet n’amai, buri pinzibaɗi ɗai paŋ amai midiɗi huwuŋ hanɗa, Te fet na gaini simi na pɗamai miɗi, na gaini vin na pɗem miɗi, na gaini neŋ na kukufuɗ, na kikina huumma gaini vin pɗem, na gaglai yerek.

⁷Midiɗi huwuŋ hanɗa, aga a mula sapa na gai giŋi amai arɗi pinziɗi ɗai paŋ edi, gaini borgo n’aŋ gai biri siɗi ɗai paŋ edi lai,

⁸Aga a vada spakni mri edi marwai, Epiɗ-ɗai Alaw aga a ɵata tuwi n’arɗi ɗai paŋ edi. Aga a vada edi siyer na wiiɗi ɗaini na midini afti paŋ edi, -a muɗa hanɗa a EPIƊ-ƊAI.

⁹War mefeŋ ni ɗa, ɗai aga e miɗi ɓa: Alaw na wiyi ɗa a ni. Tiyi mi biyi war tini, ni a pliyisi edi lai. Hanɗa a EPIƊ-ƊAI na tumu mu biyumu war tini, Firyimu gaini firiyi n’abai, Firyumu buri kûri n’a kurumu edi.

¹⁰Buri tini EPIƊ-ƊAI aga te giɗimiti huwuŋ hanɗa, Amma Mowab aga te kirpa azumai war balamɗi maini efek n’e kirpiŋ azumai warni waŋ zi zilgit ɗa nɵa.

¹¹Woni par, aga te wa tiɗi edi, maini ɗif n’a wa tini edi aŋ hinɵa nɵa, EPIƊ-ƊAI a waya kûlûni-si na wiiɗi azumai, gaini azaw na wiiɗi lai.

¹²Zlagakaiku na ku ŋoya suku gaini, n’amai mogokai, EPIƊ-ƊAI a haɗaŋ azumai, a gzilaŋ azumai, a kukuɗaŋ azumai arni alogodo.