Read Mousgoum Esaya 26 Bible Online

Esaya 26 - Mousgoum bible

Esaya 26

¹War Mefeŋ ni ɗa, ɗai aga e zini yama hanɗa warɗi Yuda, Mi ɗa gaini gɗam warɗi fuŋ n’abai na gidiŋi, EPIƊ-ƊAI a gûniti amlai gaini ɵaga sulu.

²Mili mini hlai paŋ edi, Hiniɗi ɗai na hûni Alaw aŋ niyi amlai, ɗai zi yimi na karɗi.

³Buri agulɗi a na hilu, tuku EPIƊ-ƊAI ku siɗi ɵeɗku, buri nagai e biyi tuku.

⁴Ki biyi tini EPIƊ-ƊAI kureɗ nkam, tini EPIƊ-ƊAI, ni a huwuŋ na vadakai.

⁵Nagai n’e ɗi ka amai midini hlai n’amai mogo ɗa, a pukiɗisi azumai a wayaŋsi haa azumai, fuŋ n’abai n’a naka haa amai ɗa, a wayaŋsi haa azumai, a wayaŋsi haa azumai arni alogodo.

⁶A sa futi buri e kirpiŋ azumai A kirpa azmai pin eziɗi nmurgakai gaiɗi na hurofai lai.

⁷Futi na wiini ɗif na jre ɗa, a jre-ɗikat, Tuku na ɗikat, ziziniti futi na wiini ɗif na je ɗa;

⁸Pra, futi na ku siŋkitiyi aŋ tikiti ɗa, EPIƊ-ƊAI mi ɗa biyi tuku par, N'agulyi a daraŋ a suwa paŋ ɗa, a yiki na mi yiki yikiku ɗa.

⁹Duvuk ɗa, mu piyukuku, mu piyuku gaiɗi agula paŋ, Buri ɓa won hlai na ku faka li aŋ ziti sariya na wiiku azumai midini afti ɗa, ɗai na midiɗi yai e hitri jre ɗa lai.

¹⁰Na ɓa ɗif a za yim sini ɗif na meefeŋ ɗa, aga a siɗiti jre kai, koo midini afti na ɗai e zi meefeŋ woni kai ɗi, ni a za meefeŋ bas, a siɗiti abai na wiini EPIƊ-ƊAI kai.

¹¹EPIƊ-ƊAI tuku t'aŋ gai yimi amai gara, e kiɗi e siɗiti kai, amma aga e tili diri zi sile na wiiku na buriɗi ɗaiku, siyer aga a yimiɗi, nɵa afu aga a yiɗi gawku edi.

¹²EPIƊ-ƊAI, ku siyi ɵeɗ na ɗa ku tuku, bur sda na mi ziŋ paŋ ɗa, ku vaŋ amai buriyi ku tuku.

¹³Epiɗ-ɗai Alaw na wiyi, Ɗai n’abakai zamai zamai e ŋi midiyi lai amma na mi yiki yikini miyi ɗa, ku tuku ktai.

¹⁴Zi mri ɗa, e wiyisi karɗi kir kai, zi mri ɗa, aga e fikisi amai kir kai, e bindi aŋ seze, Tuku ku fakasi amai siɗi, ku vidiɗi edi, Ku vidiɗi edi, haa midini ɗif a kɵa gaiɗi kir kai.

¹⁵EPIƊ-ƊAI ku riya pinzibaiɗi amai ta, Ku iya pinibaii amai ta, ku s kol sin yikuku ku waya hagai aftiyi edi duɓani wai wai.

¹⁶EPIƊ-ƊAI e piyuku, won hlai n’e ɗika war gir. E siiwi war helek, won hlai na ku na ziɗi gir ɗa.

¹⁷Maiɗi muni zi ziyi na te dara te poko, te sɗa gir, te ɗuula lai war ŋiibaɗi, Tiyi mi ɗa wuzku na ɗa mai hanɗa nɵa EPIƊ-ƊAI.

¹⁸Tiyi mi tiki fel, mi siɗi gir, amma won hlai na mi pûki ɗa, mi pûkû ɗa a smer: tiyi mi zi sda pɗem midini afti kai, mi kisi ɗai na warɗi yai par sin suŋfa kaalai.

¹⁹Ɗaiŋa a zuva ɓa ɗai ku zi mri ɗa e wiyisi karɗi, kopoŋɗi a fakasi amai, Fikisi amai, ɗûûli ɗuwal zi firiyi, tiki na ki fini azumai arni alogodo! Buri maɗai na wiiku, a maɗai zi gaglai, gaini hanɗa, afti aga a wiyiɗisi ɗai zi mri karɗi pra.

²⁰Ɗaiŋa, hili, niyi amlai war dalamaiki, dûgi mini portekai amai miki; ŋûyi siki buri hlai n’agwi, haa suwarŋa a vuga vig haw.

²¹Buri EPIƊ-ƊAI a na niyasi edi war hlaini zi simni par, buri a ziɗi gir wiiɗi ɗai na midini afti paŋ, burini meefeŋɗi; afti aga siŋkasi felɗi ɗai n’a ma edi ɗa edi, aga a ŋuyiɗi ɗai n’e nivi fiɗi n’edi kaalai.