Read Mousgoum Esaya 27 Bible Online

Esaya 27 - Mousgoum bible

Esaya 27

¹War mefeŋ ni ɗa EPIƊ-ƊAI aga a zini gir wiini Leviatan, wala meefeŋ n’a pra edi, wiini Leviatan, wala meefeŋ zi yel, gaini kaɵkarni n’a suma gara, n’abai, zi spak lai, aga a fuɗa wala meefeŋ n’abai n’agoɗom war yem-ra n’abai ɗa edi.

²War mefeŋ ni ɗa, aga ki zini yama, burini luwuŋ zi vin, na vinni pɗem gara.

³Ta EPIƊ-ƊAI, mu ɗif na mu giɗimaŋ, mu ma yem pini kûreɗ-kûreɗ, mu giɗimaŋ girvudi gaini duvuk paŋ, Kapai ɗif a za wala na meefeŋ sini kai.

⁴Hiy wara sini kai. Na ɓa mu nava li hedek gaini duvuɗvuɗ pini ɗa, aga mu faka amai sini, mu kirpaŋ azumai, mu yaŋ edi lai.

⁵Sna na ɓa ɗif a yimaŋa li aŋ hlaini zi ŋoyai, sna na ɓa a paya ɵeɗ li gaya, sna na ɓa a za ɵeɗ li gaya.

⁶Wuzamu sek ɗa, pinzibani Yakob sirdaiɗi aga a pa azumai: Izrayel aga te goɗa, te civiya lai, aga te tika hlai gaini aliɗi lai.

⁷EPIƊ-ƊAI a ɵiɓiɗi ɗaini na ɗa maini n’a ɵiɓiɗi nagai n’e ɵiɓiɗi ɗaini ɵa ɗi? A fiɗiɗi na ɗa, maini n’a fiɗiɗi nagai n’e fiɗiɗi ɗaini ɵa ɗi?

⁸Zaw kai, a zitiɗi sariya na wiiɗi ɗa, gaini birgi n’edi gaini ki n’edi aŋ bege midini afti na zamai. A birgiɗi edi gaini smer na gdaŋ na mini, na maini smer gdaŋ na piɗi futi na dawai par nɵa.

⁹Meefeŋ na wiini Yakob ɗa aga a haza edi mai hanɗa nɵa, Alini hinini meefeŋ na wiini ɗa aga a za maini nɵa, aga a bunda ali-fuŋ n’e rgi gûwiŋ zi ɓaka gaini paŋ maini ali-fuŋ laso n’e sriŋ edi aŋ avdi nɵa. Luwuŋai zi pi z'alaw gaini wazagai n’e yi wazagai zi ɗûgûdi zi lûgûzi gaini, aga a pa amai kir kai.

¹⁰Buri fuŋ n’abai zi ɵaga a hina edi kadai, a hina aŋ hlai na kadai su, na ɗif warni kai, maini basga na kaɗataŋ nɵa; ali garakai aga a halasi a suma woni, a fana woni, aga a luma ɵimani luwoŋai na woni lai.

¹¹Won hlai na tini luwuŋ a hula li ɗai e hiɗiŋ, falakai e hilisi e ɵi afu pini. Buri e ɗi ɗai n’e siɗi wala kai, ni n’a ziɗi ɗa, hiini haw warni midiɗi kai, ni n’a rgiɗi ɗa, a za yim siɗi kaalai.

¹²War mefeŋ ni ɗa EPIƊ-ƊAI aga a gigiza luwoŋai Sin ra na Öfrata par haa sin yem zi ki n’Egipte ta. Aga e vrikisi amai, ktaiya ktaiya, tiki ɗai na Izrayel.

¹³War mefeŋ ni ɗa aga e yibi faana n’abai; nagai n’e ɗisi edi midini afti na Asiriya, gaiɗi nagai n’e birgiɗi edi midini afti n’Egipte aga e wiyisi aha Aga e hûrgi azumai wuzani EPIƊ-ƊAI, amai midiɗi huwuŋ na sɗik, a Yeruzalem.