Read Mousgoum Esaya 28 Bible Online

Esaya 28 - Mousgoum bible

Esaya 28

¹Haw gara buriɗi bogorai zi kulini -si na wiiɗi ɗai n’e ciini gaini suul na midini afti na wiini Efrayim, haw gara burini fler n’a kwimra, wala zi gan zi juf na wiini abaiɗi, na te na amai par midini hlai na huduk z'alam, buriɗi nagai na vin a suwa gdaŋɗi ɗa.

²Tili ɗif ktai na gdaŋ, zi spak lai a na halasi, a ɵinaŋsi ɗa a EPIƊ-ƊAI, sdani a na maini faŋ n’abai zi wutiŋ, maini berber zi tûûri wala, maini faŋ n’a ɵa abai, haa tika hlai paŋ ɵa; A haɗa wazagai ɗa paŋ azumai gaini gdaŋ.

³Bogorai zi kulin-si na wiiɗi nagai n’e ciini gaini suul na midin afti na Efrayim, aga te kirpa azumai pini eziɗi ɗai;

⁴flerɗi zi kwimri, wala zi gan zi juf na wiini abaiɗi ɗa, amai par midini hlai na huduk z'alam aga te bunda maini ali luwuŋ Fige n’a naiya wuzani hlai, na ɗif n’a navaŋ li ɗa, a rawaŋ, a yimaŋ li tini tar ɗa, a sumaŋ tar nɵa.

⁵War mefeŋ ni ɗa, EPIƊ-ƊAI zi Spak paŋ aga a bunda aŋ bogorai zi juf, aŋ kadamul zi ŋili buriɗi ɗaini n’e hini ɗa.

⁶Ni aga a za aŋ seze na wiini jre ɗikat burini ni n’aga a sumna azumai aŋ ziti sariya, aga a za aŋ gdaŋ, buriɗi nagai n’e wiyiɗi gawɗi edi gai duɓaɗi, haa edi min magalani fuŋ ɗa ta.

⁷Amma nagai ɗa, suul a tuura humokɗi kok, suul na ɗewek a bindiɗi e kiɵiŋi gai kiɵiŋi, Paakai zi ɓaka gaiɗi ɗai na min Alaw paŋ suul na ɗewek tuura humokɗi kok, suul a ŋiɗi ta, Suul na ɗewek a bindiɗi e kiɵiŋi gai kiɵiŋi, wazagai n’a siŋka arɗi ɗa, a tuura humokɗi kok, seŋɗi zi ɗiyi ɗa a ɗiya cir kai

⁸Tabelai paŋ midini a huŋvi sal, gaini selte lai hlai na pɗem a hina kir kai.

⁹E miɗi: Esaya a firya a hitra ɗa asiya ɗa? A firiya a hitra wazagai na siŋka arni ɗa wiini asiya ɗa? Wiiɗi aliogoi n’e tikiɗi edi mini fiyaw par zaw, zaw wiiɗi akoɗokokai n’e niyisi edi warni gutɗi tamaiɗi par girna ɗi?

¹⁰Tili wala n’a na hitraŋ ɗa haw le: b. a -ɓa, b. a -ɓa, d. a -da, d. a -da na zaw lai, na zaw lai.

¹¹Pɗem, EPIƊ-ƊAI aga a miɗiɗi wiiɗi ɗai hanɗa war miɗi n’a ɵina kai, war mime na wiiɗi ɗai n’edi par.

¹²A miɗiɗi ka ya ɓa: Hanɗa a hlai zi si n’amla, ni n’a tala sini ɓa a kaya su ɗa, ki hiniŋ sini a mla; Hanɗa a hlai na huwyi woni kai! Amma e diri e ɵini kai.

¹³Nɵa buriɗi, seŋ na wiini EPIƊ-ƊAI aga a hina a: b. a -ɓa, b. a -ɓa, d. a -da, d. a -da. na zaw lai, na zaw lai ɗa ɵa. Kapai, war hiliɗi ɗa, e kɵiŋi, e kɵi gaini daŋdaŋaiɗi, e hiɗi lai, kapai e pi war azaw, ɗai e yimiɗi lai.

¹⁴Slini seŋ na wiini EPIƊ-ƊAI ɗa, tiki na ki zi yewere, tiki na ki ɵi wuzaɗi ɗai na Yeruzalem hanɗa,

¹⁵Tiki ki miɗi ɓa: Mi zi bono gaini mri ta, mi kiti miyi gaini hlai zi simi na wiiɗi zi mri ta, won hlai na gir zi ɓilki n’edi, a cosi li ɗa, aga a niviyi kai, Buri ɓa eles a dalam na wiyi, wala na jre kai paŋ ɗa, a hlai zi ŋoyai na wiyi lai.

¹⁶Buri hanɗa, Epiɗ-ɗai Alaw a na muɗa maini nɵa: Mu tika ahi-fuŋ ktai a Siyon, na mu tora eziɗi midini, a ahi-fuŋ na gai titimi tam, a ahi-fuŋ na war koŋni dalam na wûrini caŋ gara, n’a ɗiya azumai piɗi par gai futini lai, ɗif n’a ɵa duɓani li sini ɗa, aga a muguza kai.

¹⁷Mu ɗiya zi na pin gadai ɗa maini sogom n’e ɗupi wala n’a rga cir gaini nɵa, jre ɗikat ɗa, maini sogom n’e kiti ɗiyini n’amai cir gaini nɵa lai, wutiŋ aga a mula dalam na wiiɗi z'alasakai ɗa edi, yem aga a suma hlaiɗi zi ŋoyai ɗa edi.

¹⁸Bonuki na gaini mri aga a ɓilki edi, kitini miy na gaini hlai zi simni na wiiɗi ɗai zi mri aga a sumna haa kai, won hlai na gir zi ɓiki n’edi aga a vugasi, aga a siriki edi.

¹⁹A vugasi li paŋ ɗa, a yimiki paŋ, a vuga dawai par, girvudi, duvuk ɗi ɗa, sai a yimiki, vugumni kiini tekeɗe a mula hunai pini ɗif.

²⁰Li n’e fini midini ɗa, aga a bunda gulai, ɗif a kiɗa a maɗa edi kai Borgo, n’e briŋ midiɗi ɗa, a bunda nɵa serra, a kiɗa a bara midini ɗif kai.

²¹Buri EPIƊ-ƊAI aga a faka amai maini n’a zaŋ amai midiɗi huwuŋ Perasim ɗa nɵa, aga a muguza sini maini na war huduk na Gabawon ɗa nɵa, aŋ za sdani, sdani na pini kiini ta ɗa, aga a va sdani amai, sdani na bunda ɗif hiyak ɗa.

²²Tiyana ɗa, ki zi siki aŋ ɗai n’e ɵini seŋ kai kai, kapai jaɓ n’e rgiki gaini ɗa, e rgiŋ amlai zamai gdaŋ a suwa kai, buri seŋni ɓilki n’edi na wiini afti ɗa, aŋ gai ɗiyi zaw. Mu ɵina hanɗa mini Epiɗ-ɗai Alaw zi Spak paŋ par.

²³Ziki ɵimaki, ɵini pɗem! Tiki hangalki ta, ɵini seŋŋa!

²⁴Ɗif n’a hirma vowai buri a bla wai woni ɗa, a hirmaŋ wuzani sek ɗi? A teɓe ɵa teɓ aŋ ɓasa hlaini amai lai, aŋ gzila deeɓer ɗa lai ɗi?

²⁵Asakal n’a zizina hlaini li paŋ ɗa, a suuɗa alini Nigel gaini Kumin ɗa azumai, a gara algama ɗa gar gar, a bula orge ɗa war hlai ktai ta, Epotre ɗa, a bulaŋ edi mini hlai par ɗawwa lai.

²⁶Hanɗa a yel n’Alaw na wiini a yimiŋni midini, a hitiriŋni lai.

²⁷E giɵi Nigel ɗa, e sipi wala na guma midini gai sipi kai Kumin ɗa e likti ezini saret midini kaalai, amma e gɵi Nigel ɗa gaini amaraŋa, Kumin ɗa gaini alini amaraŋa.

²⁸Algama ɗa e siriŋ gai siri kapai e di simi gaini, E fiki li aŋ giɵiŋ ɗa, e giɵiŋ wuzaɗi sek kai. E sipi ezini saret gaini garakai ɗa midini ɗaw, amma algama ɗa a kiɗa a sara edi kai.

²⁹Yel hanɗa lai a halasi sini EPIƊ-ƊAI zi Spak paŋ par, na yelni ɗa a bunda ɗif hiyak, yelni n’a za wala gaini ɗa abai gara lai.