Read Mousgoum Esaya 29 Bible Online

Esaya 29 - Mousgoum bible

Esaya 29

¹Haw gara buriɗi Ariyel, Ariyel, fuŋ n’abai na Yeruzalem na David a cakaŋ aha, Hini fet ɗa a za war sartini n’a na ta ta ɗa, war buza buza paŋ,

²aga mu kirpiti Ariyel azumai; aga a hina warɗi ɗa a tuwi gaini marava; Fuŋ n’abai hanɗa aga a bunda buriya aŋ hlai n’e yi ɓaka warni.

³Aga mu cukuku aha, mu gunuku amlai gun, maini na David a zaŋ ɗa nɵa, aga mu gunuku amlai gaini kaŋɗi askarai, aga mu ɓula waŋ, mu luba ezini hlai amai siki lai.

⁴Aga mu wuku azumai, wulaku aga a wasi azumai par arni afti, seŋku zi miɗi ɗa, aga a wasi azumai arni alogodo par, Wulaku aga a niyasi azumai arni afti par maini sezeni ɗif zi mri nɵa, aga ku muɗasi war helek azumai arni alogodo par.

⁵Fara na wiiɗi gawku aga e bindi maini alogodo n’arni smer nɵa, faraɗi gawku n’e zuku gir ɗa, aga e bindi maini evek na smer a fanaŋ nɵa, gaini yafai kai, safai n’agwi kadai.

⁶EPIƊ-ƊAI zi Spak paŋ aga a luwuku ɗuwal, aga a halasi war faŋ zi ɓarai, war ziriyini afti, gaini suura n’abai, arbani berber gaini barawai, arbani afu zi yi, n’a ya wazagai paŋ.

⁷Farani pinzibaɗi ɗai n’e hitimiti Ariyel, n’e cikiti aha, na gaini ɵaga na siɗi paŋ aŋ viditi edi lai ɗa, aga e ɵiriɗi edi siɗi par maini weseŋ zi piɵi, maini wala na siŋka sini arni ɗif war duvuk nɵa.

⁸Buri nɵa aga a za maini ɗif na wiyamai te zaŋ, na weseŋ a piɵaŋ ɓa a na suma, amma won hlai n’a ɵiya li amai ɗa, wala warni kai, zaw maini ɗif na sai te zaŋ, na weseŋ a piɵaŋ ɓa a na ca yem, amma hlai n’a ɵiya li amai ɗa, wulani gaini siiti siyat, gdaŋ warni kaalai, aga a za sin farani pinzibaɗi ɗai, n’e hitimiti huwuŋ na Siyon ɗa maini nɵa lai.

⁹Bindi hiyak, ki miɗi seŋ kai, dûgi arki, bindi malvanai, ciini, amma gaini suul kai, kiɵiŋi, amma burini cini suul kaalai.

¹⁰Buri EPIƊ-ƊAI a hinasi seze zi weseŋ miɗiki, Tiki ɗai na min Alaw ɗa, a arki dug, tiki ɗai na ki tili wala na wuze ɗa, a bara wala miɗiki bar lai.

¹¹Wala n’a siŋka arki hanɗa, a na buriki maini seŋ n’aŋ war maktuɓ na gaini tampoŋ midini ta, n’a siŋni wiini ɗif n’a siɗa ŋi ya, e miɗni ɓa: Za barka, ŋiyi wala hanɗa ta, amma ni a waya seŋ ɓa: Mu kiɗa kai, buri aŋ gaini tampoŋ midini nɵa.

¹²Zaw maini maktuɓ n’e siŋni wiini ɗif na siɗa ŋini kai, e miɗini ɓa: Za barka, ŋiyi wala hanɗa ta, amma a waya seŋ ɓa: Mu siɗa maktuɓ zi ŋi kai ɗa nɵa.

¹³EPIƊ-ƊAI a muɗa: Ɗai hanɗa e hilisi li sa ɗa, e kûliŋa gaini miɗi n’amai kadai. Amma agulɗi te na gaigai gaya, hormo n’e siŋa ɗa, a gadai n’e niviŋsi siɗi ɗai par, n’e hitriŋsi lai.

¹⁴Buri nɵa, aga mu za wazagai n’a bindiɗi ɗai hanɗa hiyak wuza sek, aga mu za wazagai zi hilla amai pra, zamai pra, haa yel na wiiɗi na yalakai a vada edi, siɗi na wiiɗi zi siɗi ɗa aga a aya hlai sini lai.

¹⁵Haw gara buriɗi ɗai n’e zi seŋɗi azumai ɗaw, gaini EPIƊ-ƊAI kai, kapai a siɗa hiii na warɗi kai! E zi sdaɗi ɗa war gegeŋ, e miɗi lai ɓa: N'a na tiliyi ɗa asiya ɗa? N'a siɗiyi ɗa asiya ɗa?

¹⁶Ki wili edi ɵa maɵa maɵa ɗa? Ɗif zi rgi grak ɗa e kitiŋ gaini adiŋkai n’a rga graki gaini ɗi? Na kapai sda a kiɗa aŋ muɗa sini ɗif n’a zaŋ ɗa ɓa: A zaŋa ɗa a ni kai ɗa? Zaw na kapai grak a kiɗa aŋ muɗa sini ɗif n’a rgaŋ ɓa: A siɗa wala kai ɗa?

¹⁷Mefeŋ aŋ kai agwi kadai, Liban aga te bunda aŋ zardeŋ, zardeŋ ɗa aga a bunda aŋ jur lai kai ɗi?

¹⁸War mefeŋ ni ɗa, ɗai na ganaŋai aga e ɵini seŋ n’aŋ warni maktuɓ ɗa, warni gegeŋ na tikiɗim par, arɗi na mavanai aga a tala.

¹⁹Ɗai na haw aga e firiyi gara war EPIƊ-ƊAI, na murgakai aga e firiyi abai burini Alaw na Siɗik na wiiɗi Izrayel.

²⁰Buri ɓa, na kaarasai ɗa aga e vidi edi, ɗai n’e ɵini seŋ kai ɗa ga e vidi edi lai. Nagai n’e piyi aŋ zi meefeŋ wiiɗi marɗi ɗa, aga e vidiɗi edi lai.

²¹-Nagai n’e ɗika e rgiɗi ɗai wuzaɗi sariya, n’e gini azaw wuzaɗi ɗai n’e hilisi aŋ ɗûûli war faada, n’e ɗika e tuuriti sariya na wiini ɗif na jre kadai meere lai.

²²Buri hanɗa, EPIƊ-ƊAI, ni n’a plasi Abraham edi, a na miɗini wiini pinbani Yakob maini nɵa: Tiyana par, pinzibani Yakob ɗa, siyer aga a ŋ kai, Tiyana par, siɗi ga a pla edi.

²³Buri won hlai n’aliɗi aga e tili sda na mu zaŋ gaini ta arbaɗi ɗa, aga e siɗi ɓa ta mu na Siɗik, aga e siɗi ɓa m’Alaw na Siɗik na wiini Yakob, aga e hûni Alaw na wiiɗi Izrayel ɗa lai.

²⁴Nagai n’e sirɓi edi pin meefeŋ ɗa, aga e tiki piɗi aŋ siɗi, nagai n’e ɵini seŋ kai ɗa aga e bindi e yimi gadai.