Read Mousgoum Esaya 3 Bible Online

Esaya 3 - Mousgoum bible

Esaya 3

¹EPIƊ-ƊAI, Epiɗ-ɗai Alaw zi Spak paŋ, aga a vada pinzibani zinai paŋ edi Zinai na piɗi Yeruzalem gain na piɗi Yuda. Zinai na wiini wala zi simi gaini na wiini yem zi ci lai.

²Gaŋgalaŋ gaini askar zi hatam paŋ ɗif zi ɗûkliti sariya gaini ɗif na min Alaw, ɗif zi siɗi wuti gaini n’abai n’arbaɗi ɗai lai.

³Abakaiɗi askarai na doogo doogo ɵim, gaini ŋari na wiini pai, ɗif zi si gadai gaini ɗif n’a sɗa rgini wazagai gaini ɗif n’a sɗa zini hiila gaini evek gara.

⁴Aga mu miliɗi aliyagoi midiɗi aŋ paakai, Aliyagoi n’agogoi aga e ŋi midiɗi.

⁵Arbaɗi ɗai ɗa, zamai aga e kiri marɗi; ɗif paŋ a baza maini Gawlakai aga e ziɗi gir wiiɗi na walakai, ɗif na nava kai ɗa, aga a huwya ɗif na gai hormoni lai.

⁶Ɗif aga a yika zigelni, na piɗi humunini tar, aga a miɗini ɓa: tuku k’aŋ gaini sapa na pɗem suku, ku sumna midiyi aŋ pai, Tika hangalku sin vok n’a na turla na ɗa.

⁷War mefeŋ ni ɗa ɗif ni aga waya seŋ ɓa: Mu kiɗa mu za wala ktai buriki kai, ahaya simi aŋ kai, sapa aŋ kaalai, ki kiɗi ki tikiŋa mdiɗi ɗai aŋ pai kai.

⁸Yeruzalem te na kɵiŋa, Yuda te na hiliya, buri ɓa war seŋɗi zi miɗi gaini sdaɗi n’e ziŋ ɗa e fiki amai na ɗa sini EPIƊ-ƊAI, e fiki amai na ɗa siɗi abai na wiini lai.

⁹E zi ɓraw arɗi ɗai, wala hanɗa a pa seŋ midiɗi lai, E ŋûyi tuwurɗi kai, e siŋkiŋ edi gaglai maiɗi ɗai na Sodoma ɗa nɵa. E glisi midiɗi na ɗa a gir.

¹⁰Ki kiɗi ki miɗi ɓa: Nagai n’e ɵini mini Alaw ɗa e niviti pɗemi ya, buri aga e nivi alini sdaɗi na pɗamai n’e ziŋ.

¹¹Gir gara buriɗi ɗai na maafanai Buri wala na pɗem aga a za buriɗi kai. Ɗai aga e zi siɗi pin sdaí n’e ziŋ ɗa lai.

¹²EPIƊ-ƊAI a muɗa: E ziɗi gir wiiɗi ɗaiŋa na ɗa e ɗi aliyagoi n’agogoi, e ŋi midiɗi na ɗa e ɗi falakai, Ɗaiŋa, nagai n’e ɵi wuzaku ɗa e wuluku na ɗa edi sek, e tukuku puku na ɗa warɗi futi na mafini.

¹³EPIƊ-ƊAI a faka amai ya, aŋ pa seŋ midiɗi ɗai, a ɗiya amai ya aŋ ziti sariya wiini pinzibaɗi ɗai.

¹⁴EPIƊ-ƊAI a na za sariya, gaiɗi abakai n’arbaɗi ɗai gaiɗi n’abakai n’e ɵi wuzaɗi ɗai. A muɗa siɗi maini nɵa: ki tûri vowaiŋa zi luwuŋ zi vin vin edi kok, ki vi dalamki gaini wazagai, na pɗamai na ki miliŋsi tiɗi na murgakai par ɗa lai.

¹⁵Ki kirpiɗi ɗaiŋa buri maɗa? Ki biziɗi na murgakai ɵa buri maɗa? -A miɗi sin Epiɗ-ɗai Alaw zi Spak paŋ par.

¹⁶EPIƊ-ƊAI a na muɗa maini nɵa: Falakai na javai na Siyon ɗa, e kûli siɗi gara. E hili wulaɗi gaini ɗikiti-ɗikat, e tiniɗi maɵagai ɗa gaini arɗi, e yiwi gaini hangal, E dibi eziɗi azumai, kapai girliŋ na wulani eziɗi a suura.

¹⁷EPIƊ-ƊAI aga a kulta humokɗi edi, aga a hina wuzani arɗi edi kadai lai

¹⁸War mefeŋ ni ɗa, EPIƊ-ƊAI aga a mula wazagai zi gan n’aŋ siɗi, n’e zi siɗi juvai gaini ɗa edi: Girliŋ na wulani azi, aidaw na wule, gaini aidaw n’a siɗa maiɗi futi gaini tile ɵa.

¹⁹Wazagai na ɵime, wazagai na wulani ti, gaini alfai,

²⁰adiko, jaɓ na wulan azi, santir wazgai n’e mili yitir warni, kopokai,

²¹adoŋo zi tampon, gaini wazagai n’e wiŋ merfeŋɗi.

²²Sapakai zi fete, sapakai na mogokai, kaput, sak na ti kai kai,

²³kotrom, semis zi leŋ, sarpa n’agogoi gaini n’abakai lai.

²⁴Lugos na hurmuk aga a tika balamni yitir, war balamni saŋtir ɗa a sogom war ayir zi tirɗi na gai futini ɗa a humok na gi fiɗɗi edi war balamni sapa na gai futni ɗa a sapa zi groho Sda zi siyer ɗa aga a tika balamni wazagai zi juf ɗa.

²⁵Yeruzalem, ɗaiku na maɵagai aga e vidi edi mini gaw, gaŋgalaŋaiku aga e mri edi mini gaw lai.

²⁶Min magalaku aga a nuuma aga a ɵa marava sini lai, aga ku hina gainipuku dam maiɗi muni na wazagaiɗi paŋ a ɓa ta nɵa.