Read Mousgoum Esaya 30 Bible Online

Esaya 30 - Mousgoum bible

Esaya 30

¹Haw buriɗi ɗai na hraŋai, -a miɗi na sini EPIƊ-ƊAI par. E niyi war kitini miy n’a za gaya ta kai, e zi bonu n’a halaɗi sa par kaalai, e ɵipi tuwur midini marni.

²E hili war Egipte ɗa e zilbi diriŋa kai, e hili aŋ piyi hlai zi ŋoyai ahani Faraw, aŋ ŋûyi pini sezeɗi Egipte.

³Amma hlai zi ŋoyai n’ahani Faraw ɗa aga a tikiki siyer, simni na pin sezeɗi Egipte ɗa, aga a dugiki gaini siyer lai.

⁴Tiyana, n’abakaiɗi e ɗa a Sowaŋ, ɗai ɗi zi ɵeŋ ɗa e cû a Hanes ya lai.

⁵Nagai paŋ aga e tiki siyer, buri pinzibaɗi ɗai n’aga e zini piɗi war wala ktai kaalai, e luwiiɗi ɗuwal war wala ktai kaalai, Amma aga e bindi buriɗi aŋ wala zi siyer, aga e bindi aŋ wala zi miisi lai.

⁶Miɗi na sin wazagai n’ezini puɗu puɗu na war Negev. A vugasi midini afti z gir gaini hunai n’abai, na gurnai na maɵagai gaini na falakai, kaaɗi gaini wala meefeŋ n’abai zi ɗifli a halasi woni par. E libisi faraiɗi ɗa duɓani ablehökai, e milisi godaiɗi gaini ɵigini aŋ kiŋ wiini pinzibaɗi ɗai n’e kiɗi e zini piɗi war wala ktai kai.

⁷Buri ɓa zinai na wiiɗi Egipte ɗa, a wala n’a nava kai, a smer meere; buri hanɗa, mu sini yiki wiini afti hanɗa ɓa: Rahav n’a kiɗa a muguza kai.

⁸EPIƊ-ƊAI a miɗini wiini Esaya: Halasi tiyana, ɗo seŋ hanɗa, ɗoŋ wuzani arɗi midini alifuŋ na bapɗamai, ku ɗoŋ warɗi maktuɓ lai; kapai a hina wuzamu sek aŋ wala zi zaida.

⁹Buri e ɗi pinzibaɗi ɗai na hraŋai, e ɗi ɗai zi rhai, e ɗi ɗai n’e diri e zi pini gadai na wiini EPIƊ-ƊAI kai.

¹⁰E miɗiɗi wiiɗi ɗai na min Alaw ɓa: A juva ɓa wala a siŋka arki kir kai, E miɗiɗi wiiɗi nagai n’e tili wala na wuze ɗa ɓa: Ki miɗiyi midini wala n’a siŋka arki jre jre ɗa kai, ki miɗiyi ɗa midini wazagai na pɗamai n’a siyi firiyi, koo ɓa a jre kai tekeɗeɗi.

¹¹E miɗi zamai ɓa: Yimi siki edi warɗi futi na ɗikat par, fiki edi warɗi futi na pɗemi par, yimi siki edi miyi par gaini Alaw na sɗik na wiiɗi Izrayel ɗa.

¹²Buri hanɗa, Alaw na Siɗik na wiiɗi Izrayel a na muɗa maini nɵa: Tiki ki bili edi sin seŋ hanɗa, ki tiki hiiniki midini kaarai gaini seŋ zi viyɗi, ki piɵi midini hanɗa lai.

¹³Buri nɵa meefeŋki hanɗa aga a bunda buriki maini baŋa n’a ɓasa arni ɵaga su safai n’agwi paɵani ɵaga a lawasi edi, gai yafai kai ɵaga hanɗa a kɵa azumai ɗa nɵa.

¹⁴Ɗai aga e kukuɗiŋ maini grak z'afti ɗai e rgiŋ nɵa, e giɵiŋ edi, e hini wala pini kai, kolkoɗaini n’a hina pɗem agwi kapai e tikisi afu warni maa aŋ kai, zaw n’e bilisi yem agoɗom par warɗi kiliŋi gaini maa aŋ kai.

¹⁵Buri ɓa, Epiɗ-ɗai Alaw, Alaw na Siɗik na wiiɗi Izrayel a na muɗa maini nɵa: ki bindisi arki li sa, ki simni li gaini hangalki lai ɗa, aga ki kûrɗi, buri gdaŋ na wiiki ɗa a na war simniki na gaini hangal gaini pɵi na ki pɵi mada lai. Amma tiki ki diri hanɗa kai.

¹⁶Tiki ki hiini ɓa: Zaw kai, aga mi pri edi gaini plasai! buri nɵa aga ki pri edi. Ki hiini pra ɓa: Aga mi pri edi gaini plasai n’a kokolakai gara, Buri nɵa nagai n’e birgiki, kokolaiɗi aga a suwa na wiiki pra.

¹⁷Gawki ktai a ɓara li ɗa, ɗai dubu ɗaw aga e luwi maini ɗif ktai nɵa, na ɓa e zi li ɵim ɗa, won hlai n’e biri li ɗa, aga ki pri edi kafa, haa ki bindi maini luwuŋni drapo n’e piŋ amai merfeŋni huwuŋ nɵa, maini drapo n’amai midini hlai na boŋor nɵa.

¹⁸Buri hanɗa EPIƊ-ƊAI a na baiya sarti n’aga a hiina haw buriki warni buri nɵa aga a fakasi amai aŋ za yim siki, Buri EPIƊ-ƊAI a Alaw na jre, ɵeɗ midiɗi nagai n’e ɗa biyi war tini.

¹⁹Buri ɓa, pinzibaɗi ɗai zamai aga e simi war Siyon, war Yeruzalem, tiki aga ki tuwi kir kai. EPIƊ-ƊAI aga a ziki yim, won hlai n’aga ki tuwi sini, a ɵina li wulaki tar ɗa, aga a wiyiki seŋ.

²⁰War mefeŋ zi gir ɗa, EPIƊ-ƊAI aga a siki wala zi simi, won hlai na ɗai aga e sɗiki gir arki ɗa, ni aga a ski yem lai. Epin-gezaki ɗa aga a ŋoya sini wuzani arki kir kai, Aga ki tilaiŋ gaini arki.

²¹Aga ki ɵini wule a muɗasi duɓaki par ɓa: Ki tikiti te futi hanɗa, won hlai na ki diri ki hili war gal na wus zaw war gal na muni ɗa.

²²Arzaŋ n’e yimiŋ sini alawai zi rgi ɗa, aga ku tiliŋ maini wala na hi-hir ɵa, or n’e yimiŋ sini alawai zi rgi n’e ziŋ gaini kawai zi hiliyi ɗa, aga ki pukiŋ edi maini wazagai zi selte nɵa. Aga ki miɗi sini ɓa: Yimi siki edi won na par.

²³Nɵa EPIƊ-ƊAI aga a ɵa faŋ midini seyem na ki biliŋ arni afti ɗa, wala zi simi n’afti a waŋ ɗa, aga a za viya, pɗamai gara lai; war mefeŋ ni ɗa, farani farai aga a hala a suma kusum war hlai na farai a suma woni n’abakai.

²⁴Garakai gaini ablehökai zi hirmi hlai ɗa, aga a luma kuzum na pɗamai, n’e yimiŋ azumai midini afti gaini mancakai.

²⁵Midini huwaŋai na mogokai, gaini boŋorai na mogokai lai, klurai gaini rakai, aga a za viya, war mefeŋ na wiini fiɗi n’edi n’abai na wiiɗi ɗai, war mefeŋ na hlai zi gɗam paŋ aga a haɗa azumai.

²⁶War mefeŋ ni ɗa, gaglai na wiini tile aga a ŋala maini na wiiɗi futi ɗa nɵa, ŋili na wiiɗi futi ɗa, aga aza a suwa n’avut azi muguzak, -maini gaglai na wiini mefeŋ muguzak nɵa, war mefeŋ n’EPIƊ-ƊAI aga a rga mini wuruk na wiiɗi ɗaini ɗa, won hlai n’aga a zuula wurukni ɵiɓi n’a ɵibiɗi lai.

²⁷Tili! EPIƊ-ƊAI a na halasi gaigai par, hiyni ɗa abai gara, guma gara lai, a niyasi war mini par ɗa a suwar, alisini maini afu n’a ya wala nɵa;

²⁸Smer na min par a na maini yem zi na gdaŋ, n’a yima ɗif haa amai wulani ta nɵa, aga a siriɗi ɗai gaini wala zi siri na wiini ɓilki n’edi, aga a mla eleŋje zi rhai war miɗi ɗai aŋ kiɗi war hlai n’e diriŋ kai.

²⁹Tiki aga ki zini yama, maini na war duvuk zi fet nɵa, agulki aga a va gaini firiyi, maini ɗif na yawa mini algaita nɵa, aŋ hilisi amai midiɗi huwuŋ na wiini EPIƊ-ƊAI, sini Alaw, na Huwuŋ na wiiɗi Izrayel.

³⁰Wule zi spak na wiini EPIƊ-ƊAI aga a wa edi, spakni aga a siŋka edi, war hiyni na gdaŋ gara, war eles n’afu na gdaŋ gara n’a ya wazagai edi, gaini faŋ n’a ɵa abai gaini barawai pini gaini wutiŋ lai.

³¹Nɵa, won hlai na wulani EPIƊ-ƊAI a wa li ɗa, ɗai na Asiriya hunai aga te yimiɗi. Aga a ɵiɓiɗi gaini amaraŋa a wiini.

³²Sliɓi na ɵiɓiti li Asiriya paŋ ɗa, gaŋga gaini gaŋgraŋ a suura pini aga a wiiɗi muguzak wiiɗi Asiriya, aga a hitimiti lai.

³³Tiyana, luwuŋ zi yi aŋ gaini zizini ta, a zizina burini paiɗa lai, A na warni waŋ na hulum, na bruk lai, E tipi luwuŋ zi yi mini viya, buri e ɵi afu pini, Smer na mini EPIƊ-ƊAI par aga a tika afu pini maini yem zi ki na wiini Sufre nɵa.