Read Mousgoum Esaya 32 Bible Online

Esaya 32 - Mousgoum bible

Esaya 32

¹Buri nɵa, pai aga a ŋa war jre, n’abakai ɗa aga e ɵi wuzaɗi ɗai maini n’a na ɗa ɵa lai.

²Ɗif paŋ aga a bunda burini maini, aŋ wala n’a caka smer edi, aŋ hlai zi ŋoyai na wuzani faŋ n’abai, aŋ yem n’a ka edi war basga na kaɗataŋ, aŋ sezeni huwuŋ n’abai midini afti na futi te ya woni viya nɵa lai.

³Arɗi nagai n’e tili ɗa aga a siika kadai ca kir kai, ɵiaɗi nagain’e ɵini ɗa, aga a ziɓira seŋ gai futini.

⁴Hangalɗi ɗai na gomoŋai aga a tika azumai, e tiki piɗi e ɵini lai, ɗai n’alisiɗi guma, aga e bindi e miɗi kokolai, gaglai lai,

⁵Aga e miɗi wiiɗi ɗai zi duulakai ɓa: 'Tiki kiɗi ɗai n’abakai' kir kai, wiiɗi nagai n’e rihi ɗai ɓa: 'Tiki kiɗi ɗai na gai futiki' kir kaalai.

⁶Buri ɗif zi duuli a muɗa ɗa a seŋ zi duuli, a hiina warni a zini meefeŋ: a za ɗa a wazagai na haharai, a muɗa seŋ na maafanai sini EPIƊ-ƊAI, a sini simi wiini ɗif na wiyamai te zaŋ ɗa kai, a ɗala ni na sai te zaŋ ɗa ɓa a ca yem kaalai.

⁷Ɗai n’e rhi marɗi, sdaɗi ɗa maafanai gara, e rgi warɗi a sda n’e ziŋ aŋ meefeŋ kapai e wûliɗi na murgakai edi gaini seŋ z'eles, koo ɓa jre ɗa a wiini ɗif na murga tekeɗeɗi.

⁸Amma ɗif na hangalni pɗem a rga warni ɗa a sda na pɗamai, a tika hangalni sini lai.

⁹Tiki falakai na huwyi siki kai, ɵini pɗem! Tiki ɓulamai na wala a sûwiki kai, tiki hangalki ta, ɵini seŋ na mu dara mu miɗiŋki!

¹⁰Buza aŋ kai daw gaini mefeŋ agwi kadai, aga ki jiriyi, tiki na wala a sûwiki kai ɗa; buri ruwiini ali luwuŋ zi vin ɗa a vada vat, hiɗi aga za kir kaalai.

¹¹Jiriyi tiɗi hunai! tiki na huwyi ki kai, jiriyi! tiki na ala a sûwiki kai ɗa, Wi sapa na iki edi, hini ganala kadai, rigi sapa zi tuwi wuzaki ɓak bak!

¹²Siŋki kwimiki edi, tuwi midini juf na wiini vowai, gaini luwuŋ zi vin na wa ali viya gara ɗa.

¹³Midini afti na wiiɗi ɗaiŋa ɗa a bunda a diya a hedek gaini duvuɗvuɗ, haa amlai warni dalamai zi firiyi na warni fuŋ n’abai zi fet ɗa.

¹⁴Buri ɓa, dalam na wiini pa ɗa a hina edi kadai, fuŋ n’abai naɗai e sûûri aha warni gara ɗa a hina edi kadai lai hlai na Ofel gaini poriyo zi gɗam ɗa, aga a bunda aŋ waŋ na sini huwuŋ; aga a bunda aŋ hlai ablehökai n’edi buza a ɵa dawaŋni woni, aŋ lai na farani farai a suma kuzum woni lai.

¹⁵... haa, EPIƊ-ƊAI a masi Sezeni midiyi amai par, haa basga na kaɗataŋ a bunda aŋ zardeŋ, zardeŋ ɗa a bunda aŋ jur lai.

¹⁶Nɵa ɗai na war basga na kaɗataŋ ɗa aga e zi pin gadai zi ɗû jre-ɗikat aga te sumna war zardeŋ ɗa lai.

¹⁷Jre-ɗikat aga a te sa ɵeɗ, sdani jre-ɗikat, a simni na gaini hangal gaini simni na ɵeɗ na haa kureɗ.

¹⁸Ɗaiŋa aga e simni war hlai na huwyi warni kai. Amlai war dalam na gai futini, war hlai zi si n’amla na huwyi warni kai.

¹⁹Wutiŋ aga a haɗa jur ɗa azumai, Fuŋ n’abai ɗa aga a waya azumai marwai.

²⁰Sleɗ miɗiki, tiki n’aga ki bili seyem ɵimani hlai zi yem, woɗi woɗi paŋ, n’aga ki hini ɵaakaiki gaini ablehökaiki a paya maini n’a dara nɵa.