Read Mousgoum Esaya 33 Bible Online

Esaya 33 - Mousgoum bible

Esaya 33

¹Haw gara buriku tuku na ku tuura wazagaiɗi ɗai, amma ɗif a tuura walaku tuku kai, haw gara buriku tuku na ku za tege piɗi na zamai amma ɗif a za tege puku tuku kai. Won hlai na ku vada li gaini tuurini wazagaiɗi na zamai paŋ ɗa, tuku aga ku tuura edi lai, won hlai na ku vada li gaini tege na piɗi na zamai paŋ ɗa, aga e zi tege puku tuku lai.

²EPIƊ-ƊAI, za yimu siyi ta, mi piɵi na ɗa muduku, Gorof par paŋ za aŋ gdaŋ na wiyi, war mefeŋyi zi gir paŋ, za aŋ pli n’edi na wiyi lai.

³Won hlai na ɗai e ɵini vugumku li ɗa, e pri edi, won hlai na ku faka li amai ɗa, ɗai paŋ e ɵiri edi.

⁴Derki na pin gaw ɗa, aga a fara midini marni, maini aiiwi n’a fara ɗa nɵa, Ɗai aga e ɵiɵipisi midini der ɗa maini farani aiiwi n’a daga midini wala nɵa.

⁵EPIƊ-ƊAI a na haa amai, buri hlaini zi simni a na ɗa amai; a viti Yeruzalem gaini jre-ɗikat gaini jre lai.

⁶Tiki ɗai na wiini EPIƊ-ƊAI, aga ki simni jam, yel gaini siɗi ɗa a der na kurɗa ɗif, hormo na wiini EPIƊ-ƊAI, hanɗa zi godai na wiiki.

⁷Gangalaŋai e ɗa ɗûûli anene; nagai n’e miɗi midini ɵeɗ ɗa, e ɗa war tuwi n’abai.

⁸Futi n’abakai ɗa a hina kadai su su, ɗai e vigi war futi n’agogoi kir kai. Bonu ɗa, a duklaŋ daf, a Fuŋ n’abakai ɗa, a pɵaŋ mini kai, a ŋa ɗif mini kaalai.

⁹Afti paŋ aŋ war kwimi, a tika pini a siita. Huwaŋai na Liban ɗa siyer a ŋ li, a na huula, wulani hlai na plas na Saron ɗa a bunda maini hlai na kooloŋ nɵa. Luwuŋai na midini huwaŋai na Basan gaini na Karmel ɗa, ɵimani a yaka edi kafa.

¹⁰EPIƊ-ƊAI a muɗa, tiyana ɗa aga mu faka amai, tiyana ɗa, agamu ɗiya amai, tiyana ɗa, aga mu siŋkiti abaiŋa edi.

¹¹Na ki hiiniŋ warki ɗa, a na maini hoso na huuleŋ nɵa, haa a va li amai ɗa, a tala maini evek na mogokai nɵa, suŋfaki tiki dama aga a bunda aŋ afu buriki, aga a yiki edi,

¹²Pinzibaɗi ɗai na zamai ɗa aga yi edi, e bindi aŋ laso, aga e bindi maini hedek n’e biliŋ azumai, e pukiŋ arni afu nɵa.

¹³Tiki na ki ɗa gaigai ɗa, ɵini wala na mu zaŋ ɗa, tiki na ki ɗa gobi, siɗi spakŋa ɗa lai.

¹⁴War Siyon ɗa, ɗai na tuwarai hunai a mula piɗi ca, Ɗai na maafanai ɗa e tiki piɗi e jiriyi e miɗi: Arbamu ɗa, n’aga a kiɗa a ɗiya mini afu zi yi wazagai ɗa asiya ɗa? Arbamu ɗa n’aga a kiɗa a ɗiya mini morjo n’a mra kai ɗa asiya ɗa?

¹⁵A ni n’a paya war jre, n’a muɗa seŋ war jre, n’a bula edi sini der n’e miliŋsi gai gdaŋ, n’a ɗiya sini katu n’e siŋni aŋ vrak ɗa kai, n’a zaga ɵimani miɗi nagai n’e miɗi midini fiɗini ɗif kai, n’a rga wala arni ɓak, kapai a tala meefeŋ kaalai.

¹⁶Ɗif ni ɗa aga a sumna amai midini hlai n’amai mogo, hlaini zi ŋoyai ɗa, a huwaŋai na futi na pɗemi midini kai, e hili woni sek gai gir, aga a nava simini kureɗ, a nava yem kureɗ lai.

¹⁷Aga ku tala pai gaini arku warɗi abaini, aga ku tala afti gaini abaini paŋ lai.

¹⁸Muduku aga a kɵa gaini wazagai n’a naka a muluku hunai puku ɗa, aga ku zilba suku ɓa: nagai n’e ɗû wazagai ɗa e ɗi wata ɗa? Nagai n’e yimi tar amai ɗa e ɗi wata ɗa? Nagai n’e giɗimi poriyo zi gɗam ɗa e ɗi wata ɗa?

¹⁹Aga ku tiliɗi ɗai n’e kûli siɗi gara ɗa kir kai, n’e yiki wazagai edi gaglai kai ɗa.

²⁰Tiliti Siyon, fuŋ n’abai na mi zi diŋgiyi zi fet woni ɗa, aga ku tiliti Yeruzalem gaini arku, aga te tala arkuɗa aŋ hlai na liyik, aŋ gumu n’aga a rɗa amai kir kai, na luwoŋai n’e ɓiliŋ azumai gaini aga a rɗa amai kir kai zaŋ, na sogom n’e rgiŋ gaini ɗe a pla kir kaalai.

²¹EPIƊ-ƊAI aga a siŋkitumu pɗemini war hlai ni ɗa, aga bunda burimu aŋ ra, aŋ klurai n’abakai, na hulamai n’abakai zi gaw a vuga woni kai, na hulamai n’abakai gara aga a vuga warni kaalai.

²²Buri EPIƊ-ƊAI a ni n’a ziti sariya na wiimu ɗa, EPIƊ-ƊAI a abai na wiimu, EPIƊ-ƊAI a pai na wiimu lai: a kurɗumu edi ɗa a ni.

²³Sogomku aŋ gai pli su, a kiɗa a rga luwuŋ na pin hulum n’abai ɗa gdaŋ kir kai, a kiɗa a gaŋa sapa n’e higiŋ amai ɗa edi gdaŋ kir kaalai Buri nɵa, aga e ɓûrwi der na pin gaw viya war hlai hanɗa, na daŋalaŋai paŋ aga e virmi wazagai lai;

²⁴Ɗai na Yeruzalem ɗa, ktai n’aga a muɗa ɓa: Mu na veglek aŋ kai, ɗai na woni ɗa, meefeŋɗi aga a nava girdi n’edi.