Read Mousgoum Esaya 34 Bible Online

Esaya 34 - Mousgoum bible

Esaya 34

¹Pinziba n’edi par, tipisi sa aŋ ɵini, Tiki ɗai, tiki haŋgalki ta, A zuva ɓa yai paŋ te ziɓira gaini wazagai na warɗi paŋ, Duniya gaini wazagai n’a za warɗi paŋ lai

²Buri hiy na wiini EPIƊ-ƊAI aga a yorasi midini pinzbaɗi n’edi par paŋ, suwarni midiɗi askaraiɗi paŋ lai. Aga a vidiɗi edi marwai, a siɗi edi min fiɗiɗi kafa lai.

³Ɗai ɗi n’e mri ɗa e hini puk puk, kopoŋɗi a tika pini a luguza, felɗi a tika pini a hiliya huwaŋai lai.

⁴Wazagai zi rgi n’arbani hlai n’amai ɗa paŋ a hofa hlai n’amai ɗa aga a faɗa amai maini maktuɓ nɵa, wazagai zi rgi na warni, aga a faɗa amai maini ɵimani luwuŋ zi vin ɗa nɵa, maini ɵimani luwuŋ Fige nɵa lai.

⁵Buri kaɵkar na wiya, aŋ gaini siini su amai war hlai n’amai par. Tili, a na kɵasi azumai midiɗi Edom, midiɗi ɗai na sariya na wiiɗi ɗa, a vidi n’edi marwai.

⁶Kaɵkarni EPIƊ-ƊAI ɗa, aŋ gai vi gaini fel gai didiɓi gaini emel gdaŋ, gaini fel na wiini alini adumai gaini ali haakai, gaini emel gdaŋ na sini ɓlaɓlamai na wiini adumai na maɵagai, buri ɓaka na burini EPIƊ-ƊAI a na za war Botsra, Fiɗi n’edi n’abai a na za war Edom lai.

⁷Hiluw ɗa a poko azumai gaiɗi aŋ bonu ɵaakai gaini garakai lai; Afti na wiiɗi aga a ca fel, alogodo na wiiɗi a kikina tini emel gdaŋ lai.

⁸Buri ɓa hanɗa a mefeŋ n’EPIƊ-ƊAI a waya meefeŋ midini meefeŋ warni, a buza na EPIƊ-ƊAI a ziɗi gir wiiɗi ɗai buri meefeŋ n’e ziŋ siɗi Siyon ɗa.

⁹Avakai zi yem na wiiɗi Edom aga a bunda aŋ gudroŋ, alogodo na wiiɗi aga a bunda aŋ sufre, afti na wiiɗi aga a bunda aŋ gudroŋ n’a na ya lai.

¹⁰Afu na warɗi aga a mra kai, a ya duvuk gaini girvudi paŋ, n’agiyiŋni a ɗuguda amai kureɗ, Aga a hina aŋ grŋ ɵa haa kurɗ lai, na ɗif a kiɗa aŋ vuga warni kir kai gamai.

¹¹Aga a hina aŋ hlai na wiini dram gaini akusokuso, tuktruk gaini zeleke aga a za fuŋni woni, EPIƊ-ƊAI aga a tuura aftiɗi edi, aga a bunda aŋ hlai na baŋa n’abai na kadai su war piɗi yai zi tiki par nɵa.

¹²Ɗai ɗi n’abakai zi ɵi wuze n’e viri pai amai ɗa aga e zi kir kai, abakaiɗi aga e hini kir kaalai.

¹³Aha war dalamaiɗi na juvai hedek aga a diya, hlai zi ŋoyai ɗa aga a hina edi arni evek n’a luma si gaini duvuɗvuɗ, aga a bunda aŋ hlai na wiini belemke, aŋ hlai n’aliket a sumna woni lai.

¹⁴Wazagai n’edi war basga na kaɗataŋ ɗa aga a nava gaini adoliyo woni haakai na maɵagai a buza, aga a yikasi marni woni, seze na hi-hir na war duvuk n’e yikiŋ ɓa Lilith aga a sumna warni gai hangalni, aga a nava si n’amla woni lai.

¹⁵A hlai na wala meefeŋ aga a za gutni, aga a wa eɵeni woni, a blaŋ woni, a tapa alini azumai pini woni lai; woni, bagasakai aga a tapasi marni lai.

¹⁶Piyi maktuɓ na wiini EPIƊ-ƊAI ta, ki ŋiŋ lai, wazagai hanɗa n’aga ki niviŋ woni kai aŋ kai, na wus gaiɗi na muni, aga a ɓurwa edi kai, Buri a muɗa seŋ hanɗa a EPIƊ-ƊAI, aga a diŋgiɗisi ɗa a Sezeni lai.

¹⁷A yimiɗi hlai pin wala zi vili ɗa a ni, a yima sogom aŋ kitiɗi hlaiɗi a ni gaini tini dama, Aga e tiki hlai hanɗa aŋ wiiɗi gamai, aga e simni warni ɵa haa kureɗ.