Read Mousgoum Esaya 37 Bible Online

Esaya 37 - Mousgoum bible

Esaya 37

¹Won hlai na pai Ezekiyas a ɵina seŋ hanɗa, a ɓasa sapa na sini edi, a wa sapa zi tuwi sini, a hala alai war tempel na wiini EPIƊ-ƊAI.

²Asakal par a ɵina Eliyakim abai na midini dalam na wiini pai gaini sekreter Sebna gaiɗi paakai zi ɓaka n’e fini ar sda viya sini ɗif na min Alaw Esaya, n’ahini Amots, nagai lai e wi sapa zi tuwi siɗi.

³E miɗini wiini Esaya maini nɵa: Ezekiyas ɓa girna ɗa a mefeŋ kwimi, zi gir, zi siyerlai, maini na ɗai e miɗiŋ ɵa ɗa: Ahi midini edi ta, amma emini gdaŋɗi na te siŋka kapa a wasi edi gaini aŋ kai.

⁴Ablaŋtaŋkai Epiɗ-ɗai Alaw na wiiku a sina seŋ na pai n’Asiriya a ɵinasi abai na midini dalamni aŋ muɗaŋ, aŋ tirka Alaw na karni ɗa ya ɗi! Ablaŋtaŋkai, Epiɗ-ɗai Alaw na wiiku ɗa aga tikini gir midini, burini seŋ n’a ɵinaŋ mini par ɗi! Nɵa ɗa, tuku Esaya, siiwa EPIƊ-ƊAI buri ɗaiku n’e hini karɗi ɗa haw kai ɗi!

⁵Ɗai na pai Ezekiyas a ɵinɗi ɗa, e cû sini Esaya.

⁶Esaya a miɗiɗi: Hili ki miɗini wiini Epin-gezaki ɓa: EPIƊ-ƊAI a na muɗa maini nɵa: seŋ na ku ɵinaŋ, na ɗai na wiini pai n’Asiriya e miɗiŋ sa aŋ meefeŋ aŋ ɗa, ku hunaŋ kai.

⁷Tala aga mu sini hiini ktai, aga a nava labar n’aha par, pin labar hanɗa aga a waya aha midini aftini. A co li aha midini aftini ɗa, aga mu fuɗaŋ edi gaini kaɵkar.

⁸Abai na midini dalam na wiini pai a ɵina ɓa pai n’Asiriya a n’a Lakis kir kai. A ha a Libna aŋ hitima fuŋ n’abai hanɗa. A hala pini woni.

⁹Nɵa pai n’Asiriya, a ɵina ɓa Tirhaka pai n’Etiopiya par a na halasi aŋ hitima gaini. Won hlai n’a ɵini seŋ hanɗa tar ɗa, a ɵina ɗai sini Ezekiyas aŋ miɗini mani nɵa:

¹⁰Aga ki miɗini wiini Ezekiyas, pai na Yuda maini nɵa: Ku tika hiiniku midini Alaw na wiiku gara ta. Ku hiina ɓa aga a ɗalaŋa aŋ tikiti Yeruzalem ɗi ɗa, ku wula ɵa kai.

¹¹Tuku ahini muduku ku siya wala na paakai n’Asiriya e ɗa ziŋ sini afti na zamai paŋ ɗa, e tuuriŋ edi marwai marwai. Tuk ku hiina ɓa aga ku mula miɗi par yaw kir kai ɗi!

¹²Alawai na wiiɗi pinziba na tamaiya na wuza par e turiŋ edi, maini: Gzan, Harran, Resef, gaiɗi ɗai Eden n’e ɗa a Telasar ɵa ɗa, e kiɗi e pliɗi edi tiɗi par ɗi?

¹³Pai na Hamat, pai na Arpad, pai na Layir, pai na Sefarvaiim, pai na Hena gaini pai na Ivva ɗa e ɗi wata ɗa?

¹⁴Ezekiyas a tikiti letre tiɗi ɗai n’e ɵiniɗisi ɗa par, a ŋiti, asakal par a niya amai warni tempel na wiini EPIƊ-ƊAI, a militi letre hanɗa edi wuzani EPIƊ-ƊAI.

¹⁵Ezekiyas a siiwa EPIƊ-ƊAI a muɗa:

¹⁶EPIƊ-ƊAI zi Spak paŋ, Alaw na wiiɗi Izrayel, tuku na ku sumna amai midiɗi kerubimkai, aftiɗi paakai na midiɗi yai paŋ ɗa, Alawni ku tuku ktai, ku rga hlai n’amai gaiɗi yai ɗa, ku tuku lai.

¹⁷EPIƊ-ƊAI, zagasi ɵimaku zak, ziɓira! malasi arku edi mal, tala! Slina seŋ na ɗai na Senakerib a ɵiniɗisi e ɗa miɗiŋ suku tuku Alaw na karku haw ɗa!

¹⁸EPIƊ-ƊAI, a jre ɓa paakai n’Asiriya e vidiɗi pinzibaɗi ɗai edi viya gaini aftiɗi paŋ lai.

¹⁹E pûki alawaiɗi arni afu, amma alawai hanɗa alawai ni ɗa a alawai na jre kai, amma a wazagai n’a rga gaini tini ɗif; zamai ɗa a luwuŋ, zamai ɗa ali-fuŋ lai, paakai n’Asiriya ɗa, e tuuriŋ edi.

²⁰Tiyana ɗa, Epiɗ-ɗai Alaw na wiyi, kurɗiyi edi tin Senakerib par kruɗ, kapai paakai na midini afti paŋ aga e siɗi ɓa Alaw ku tuku ktai.

²¹Nɵa Esaya n’ahini Amots a ɵina ɗai aŋ miɗini wiini Ezekiyas ɓa: EPIƊ-ƊAI, Alaw na wiiɗi Izrayel na ku siiwaŋ burini Senakerib, pai n’Asiriya ɗa a na muɗa maini nɵa:

²²Seŋ n’EPIƊ-ƊAI a muɗaŋ burini Senakerib a na maini nɵa: Siyon na juvi te na miisiku, te na zuku yewere, Yeruzalem na juvi te na riya puku, te na gigiza midiɗi puku.

²³Ku tirka ɗa asiya ɗa? Ku muɗa seŋ na meefeŋ na da sini asiya ɗa? Ku muɗa gaini wule na gdaŋ na ɗa wiini asiya ɗa? Na ku talaŋ maini ɗif na nafani aŋ kai la ɗa, asiya ɗa? K zaŋ na sa ta Alaw na Siɗik, Alaw na wiiɗi Izrayel.

²⁴War miɗi ɗai na ku ɵiniɗisi ɗa, ku tirkiŋa ta EPIƊ-ƊAI. Ku muɗa ahini warku ɓa: Gaini saretaiŋa zi gaw na viya hanɗa, ta Senakerib, mu niy haa amai merfeŋni huwaŋai, haa amlai arbani jur na Liban, aŋ ɗukla luwuŋ Sedre n’abakai gaini luwuŋ Sipre na mogokai lai. Mu hala haa amai merfeŋɗi huwuŋi na mugwi gara ɗa ta, haa sin jur na gaini futini gara ɗa ta lai.

²⁵Mu ɓula kalaŋ, mu ca yem na warni lai aga mu hiɗika arakaini Nil ɗa paŋ amai, hlai mu tikaɗi aza li midini aft n’Egipte ɗa.

²⁶Senakerib, ku sɗa ɓa sda hanɗa, mu kataŋsi haa avut par mu ta kai ɗi? Haa gamai par mu hiinaŋsi ta, tiyana ɗa mu vaŋ li amai, mu tukuku ɓa kapai ku haɗa fuŋ n’abakai zi zaga ɗa azumai, ku bundaŋ aŋ greŋ

²⁷Ɗai na war fuŋ hanɗa, gdaŋɗi a vada vat, e ɗa war hunai gain siyer lai. E bindi maini evek na buza nɵa, maini sugoi n’a goɗa nɵa, maini sugoi n’a diya amai midini dalam zi mili nɵa, maini algma na neme neme a yimaŋ wuzani buzuguni nɵa

²⁸Won hlai na ku sumna azumai won hlai na ku niya anene, hlai na ku niyasi amlai lai, mu sɗa hanɗa, won hlai na ku faka suwar amai sa lai.

²⁹Buri ku faka suwar amai sa miɗiku na viya zi tirki a cosi ɵima, amma tiyana aga mu wa adoŋo merfiŋku, aga mu wa eliŋze muku lai, aga mu wuyuku a ha a haku, warɗi futi na ku halasi warɗi ɗaw.

³⁰Hanɗa aga a za aŋ wala zi siŋki buriku tuku Ezekiyas: war buza hanɗa lai ɗai aga e simi algama na diya amai kiiyani, war buza na zamai pra, amma war buza n’ag'aŋ hu, aga ki bili wai aga ki hiɗiŋ a ha lai ki luwoŋai zi vin ki simi alini lai.

³¹Nagai n’e hini karɗi a ha warni afti na Yuda, aga e bindi maini luwoŋai na sirdaini a niya azumai arni afti gaigai, na amai midini par a wa ali viya nɵa.

³²Nagai na e hini a Yeruzalem n’e ɗa karɗi a Siyon ɗa aga e niyisi anene, Tili hanɗa a wala na EPIƊ-ƊAI zi spak paŋ aga a zaŋ gaini dirini n’abai gara ɗa.

³³Buri nɵa EPIƊ-ƊAI a na muɗa sini pai na Asiriya: Aga a niyasi a ha war fuŋ n’abai hanɗa duk kai zaŋ, a ɵiɓiti gaini ɓaraw kaalai, aga a himiti a ha gaini gamar tini kaalai,

³⁴Aga a waya a ha warɗi futi n’a halasi warɗi ɗaw ɗa, aga a niyasi a ha won hlai hanɗa duk kai zaŋ, hanɗa mu muɗaŋ muta EPIƊ-ƊAI.

³⁵Aga mu giɗimiti Yeruzalem, aga mu pliti edi lai, buri yikiŋa ta Alaw buri ɗifŋa zi sda David lai.

³⁶Ɗif zi ɵeŋ na wiini EPIƊ-ƊAI niya anene a fuɗa ɗai war kaŋ na wiiɗi Asiriyakai, ɗai e mri dubu doogo doogo mitwis pi ɵim. Won hlai na ɗai e fiki amai war dawai par, e nivi ɗa a kopoŋ na wiiɗi ɗai zi mri,

³⁷Nɵa lai Sankerib pai na wiiɗi Asiriya a riɗa amai dugokai z'amur na war kaŋ, a waya a Ninive a sumna woni lai.

³⁸Yivai ktai a hurga azumai warni tempel na wiini alau Nisrok, alini na maɵagai Adrammelek gaini Sareser e fiɗiŋ edi gaini kaɵkar e rivi walaɗi war yai na e yikiti Ararat. Ahini na Asarhadon a suma pai war balamni.