Read Mousgoum Esaya 38 Bible Online

Esaya 38 - Mousgoum bible

Esaya 38

¹War sarti ni ɗa, Ezekiyas veglek na gdaŋ a yimaŋ. Ɗif na min Alaw Esaya n’ahini Amots a halasi sini a miɗini: EPIƊ-ƊAI a na muɗa maini nɵa: Muɗa seŋ n’aŋ muku na ku firya ku miɗiŋɗi wiiɗi ɗai n’ahaku ta ta, buri ɓa aga ku sumna karku kai.

²Ezekiyas a bunda arni amlai sini hlai sek a siiwa EPIƊ-ƊAI a muɗa:

³Hai! EPIƊ-ƊAI hina muduku a kɵa buriya, buri mu paya payai na ɗikat wuzani arku, gaiɗi agul ktai lai. Mu za ɗa a wazagai n’a tala arku pɗamai lai. Asak hanɗa Ezekiyas a tuwa gara.

⁴Nɵa EPIƊ-ƊAI a muɗa sini Esaya maini nɵa:

⁵Hala, ku miɗini wiini Ezekiyas ɓa: EPIƊ-ƊAI, Alaw na wiini David na tiyku a na muɗamaini nɵa: Mu ɵina siiwaku ya, mu tala tuwi n’arku ya lai; aga mu mulasi buza katawai amlai buza doogo pi ɵim.

⁶Tuku gaini fuŋ n’abai hanɗa paŋ aga mu kûrɗiki edi tin pai n’Asiriya par. Aga mu giɗima fuŋ n’abai hanɗa lai.

⁷Esaya a miɗini: Wala n’EPIƊ-ƊAI aga a zaŋ n’a siŋka ɓa aga a va seŋni n’a muɗaŋ ɗa amai ɗa a hanɗa:

⁸Ɓok na wiini Akaz ɗa, a nafu arni futi, nɵa seze a halasi midini. Tiyana ɗa EPIƊ-ƊAI a waya seze asakalni sek ɓok doogo zaw a kaŋ wuzani sek ɓok doogo ɗi? Nza futi te wayasi midini ɓok na doogo na seze a nafu midini ɗa pra.

⁹Hanɗa a seŋ zi miɗi na wiini Ezekiyas, pai na Yuda. A ɗo hanɗa, asakal veglekni par, won hlai na zuula li.

¹⁰Mu muɗa gaiɗi agula ɓa: Mu ɓurwa na ɗa a mefeŋa na mu zaŋ warɗi yai ɗa hai, A dewele buriya ɓa mu hala, min magala na wiini hlaɗi ɗai zi mri. Warɗi yai na wiiɗi ɗai zi mri, Galni buzaŋa n’a hina ɗa, mu navaŋ a nivi kir kai.

¹¹Mu hiina wara ɓa: Aga mu tala EPIƊ-ƊAI kir kai, Mu tala EPIƊ-ƊAI midini afti na wiiɗi ɗai na karɗi kir kai. Aga mu tala ɗif murɗek kir kai, arbaɗi ɗai na warɗi yai hanɗa kir kai.

¹²Dilimiŋa na mu sumna warɗi ɗa, a rɗiti amai bak, a kiti edi gaigai sa par, maini gumu na wiini ɗif zi giɗimi haakai nɵa. Mu faɗa suŋfaŋa amai, maini ɗif zi hi sapa n’a faɗa sapa n’a vada gaini hini li ɗa nɵa. A tikaŋasi edi war sda n’aŋ ta par. Hlai a siɗasi edi haa futi te nawa ta ɗa ku vada gaya vat.

¹³Mu pa sa ɵa haa gorof ta, EPIƊ-ƊAI a kirpa keɵkeŋa paŋ, maini gurnai nɵa. Hlai a siɗasi zedi haa futi te nawa ta ɗa, ku vada gaya vat.

¹⁴Mu ɗuula, wula a wa amai kai, maiɗi muguɗi muguɗi na te na ɗufla nɵa, Mu nuuma maini dere nɵa. War girŋa, mu bundaɗi ara amai suku sek, EPIƊ-ƊAI, gir ɗa a suwaŋa li, pa tuku mada.

¹⁵Mu muɗa zamai ɗa a ma ɗa? A wayaŋa seŋ ya, a za paŋ na ɗa a ni. Aga mu paya gaini hangal, haa sin dibini mefeŋa ta, burini gir n’aŋ sa ɗa.

¹⁶EPIƊ-ƊAI, mu sumna kara na ɗa buri pɗem na wiiku, Mu cuŋfana ɗa burini ku zuulaŋa, ku hinaŋa kara pra.

¹⁷Simniŋa zi gir ɗa a bunda aŋ simni zi muluk. Tuku ku daraŋa gara, ku yimaŋasi amai war waŋ na wiini ɓiki n’edi par buri ku poko tuwurŋa paŋ edi duɓaku sek.

¹⁸Buri ɓa a kuluku ɗa a hlai zi simni na wiiɗi zi mri kai, a kuluku gaini yama ɗa a mri kaalai, Nagai n’e mri ɗa, e kiɗi e pɵi midini pɗem na wiiku kir kai

¹⁹Ni n’a na karni, ni n’a na karni ɗa, a kuluku a ni, maini na ta mu nakuluku girna na ɗa nɵa; api aga a hiriɗi pɗem na wiiku wiiɗi alini.

²⁰EPIƊ-ƊAI a kurɗaŋasi kruɗ. Aga mi kuluku gaini wazagai n’e zini yama gaini, mefeŋ paŋ, haa sin dibini suŋfaii amlai war tempel na wiini EPIƊ-ƊAI.

²¹Esaya a muɗa: Kisi gato zi Fige, girdiŋ min wuruk ɗa, Ezekiyas aga sumna karni.

²²Ezekiyas a ɵba ɓa: Wala na siŋka ɓa aga mu hala amai warni tempel na wiini EPIƊ-ƊAI ɗa a ma ɗa?