Read Mousgoum Esaya 40 Bible Online

Esaya 40 - Mousgoum bible

Esaya 40

¹Siɗi arai zi pi, si arai pi wiiɗi ɗaiŋa, Alaw na wiiki a na muɗa mai hanɗa ɵa.

²Miɗi seŋ n’agulɗi Yeruzalem a firya burini, siɗi labar ɓa hatam na wiiɗi a vada li gir na pin meefeŋ na wiiɗi te vada gaini vat, Te vurga azi sulu burini meefeŋɗi na te zaŋ paŋ ya wiini EPIƊ-ƊAI.

³Mu ɵina wule a ɗuula maini nɵa: Edi war basga, ɓisiti futi wiini EPIƊ-ƊAI! Zizinitini futi wiini Alaw na wiimu midini hlai na plas na kooloŋ.

⁴Hlai na huduk ɗa paŋ a ŋaɗa amai, huwaŋai gaini hlai na boŋorai ta ta ɗa, a waya azumai, hlai na diŋdiŋ ɗa a bunda kalɓas, hlai na gai yuri yor ɗa a bunda aŋ n’ali hudokai.

⁵Abai na wiini EPIƊ-ƊAI aga te siŋkasi edi, ɗai paŋ aga e tiliti, -a miɗi n’a niya mini EPIƊ-ƊAI par.

⁶Mu ɵina wule a muɗa ɓa: Ɗuula! Na zamai a waya seŋ: Mu ɗuula ɓa maɵa ɗa? A wiyini seŋ ɓa: Neŋ-si paŋ a na maini evek nɵa, jufni ɗa a na maini fler n’edi war basga nɵa.

⁷Evek a siita li ɗa, flerni ɗa a huula, won hlai na smer na wiini EPIƊ-ƊAI a vuvuwa midini. Gazi, ɗai ɗa e ɗi evek:

⁸Evek a siita, fler ɗa a huula lai; amma seŋ na wiini Alaw a na ɵa haa hlai n’a vada kai.

⁹Siyon, tuku na k’aŋ gaini labar na pɗem muku, niya amai midiɗi huwuŋi na muguwi, Yeruzalem, tuku na k’aŋ gaini labar na pɗem muku, ɗuula gaini gdaŋku ɗuula, ku huna kai, miɗini wiini fuŋ n’abakai na Yuda ɓa: Alaw na wiiki a na.

¹⁰Tili, Epiɗ-ɗai Alaw, a na halasi gaini spak, a kiɗa a ŋa buri ɓa a na gdaŋ, derni aŋ war tini, vrak na pin sda aŋ wuzani su lai;

¹¹Aga a giɗima farani maini ɗif zi giɗimi nɵa, aga a diŋga alini adumai war hlai ktai gaini tini, aga a libaŋ amai didikni aga a ɵa wuzani adumai n’alini a na ca fiyaw pini lai.

¹²N'a kiɗa aŋ ŋa yem-ra n’abai amai war tini kof asiya ɗa? N'a kiɗa aŋ kata mogoni gaini brukni hlai n’amai gaini tiy zi ŋi ɗa asiya ɗa? N'a kiɗa aŋ ŋa alogodo na midini afti gaiɗi daram ɗa asiya ɗa? N'a kiɗa aŋ tika kilo na wiini huwaŋai gaini na wiini hlai na boŋorai lai midini wala n’e tiki kilo midini ɗa asiya ɗa?

¹³N'a kata mogoni hiini na wiini EPIƊ-ƊAI ɗa asiya ɗa? N'EPIƊ-ƊAI a zilba yel tini par ɗa asiya ɗa?

¹⁴Ɗif n’a za ka diŋgi gaini EPIƊ-ƊAI piɗi marɗi, kapai EPIƊ-ƊAI a ɵina ezini wala n’a na za, sini par ɗa asiya ɗa? N'a siŋkitini futi na wiini jre-ɗikat ɗa asiya ɗa? N'a hitrini siɗi ɗa asiya ɗa? N'a siŋktini futi na wiini siɗi ɗa asiya ɗa?

¹⁵Pinzibaɗi ɗai e ɗa wuzani arni EPIƊ-ƊAI maini yem na tiɗiwasi warni co par nɵa. E tili arni maini kaikai ktai n’e tikiŋ midini wala n’e tili kilo gaini nɵa, wudi lai, a na maini alogodo na smer a fanaŋ nɵa.

¹⁶Luwuŋai na war Liban paŋ ɗa a kiɗa a pa afu ta kai, wazagai n’ezini puɗu puɗu na warni ɗa a kiɗa ɓaka zi yi na wiini EPIƊ-ƊAI ta kai, luwoŋai na wiiɗi foraiɗi lai a kiɗa kai buri yini wala zi ɓaka.

¹⁷Pinzibaɗi ɗai paŋ e ɗa wuzani arni maini wala kadai nɵa, e pɵi aŋ wala ktai kai, maini hlai na kadai su nɵa.

¹⁸Ki kiti Alaw na ɗa gaini asiya ɗa? Wala na ki kitiŋ arki n’a tala maini ɵa ɗa a ma ɗa?

¹⁹Alaw zi rgi ɗa a yoraŋ ɗa a ɗif zi rgi wazagai, Ɗif zi hiliyi or a maŋ gaini or, a zizina jaɓ n’e wiŋ wulaɗi zi arzaŋ, a duɓukaŋ sini lai.

²⁰Ɗif na murga gara, na gdaŋni a kiɗa midini sda hanɗa kai ɗa, a paya luwuŋ na foto a sumaŋ kai ta, a paya ɗif n’a siɗa kilɗini luwuŋ gai futini lai, kapai a pini alaw zi rgi hanɗa amai gai futini tiɓ, a muguza kai.

²¹Ki siɗi hanɗa kai ɗi? Wi ɵini ka seŋ hanɗa kai ɗi? E miɗiŋki ka war pi zi tiki par kai ɗi? Ki ɵini ka labar midini piɗi yai zi tûûri ɗa kai ɗi?

²²A ni na sumna amai par midini afti na wulla, na ɗai na midini e tili arni maini ayuwi nɵa, a gaŋa hlai n’amai ɗa edi maini sapa na lef lef nɵa, a gaŋaŋ amai maini gumu n’e simni warni nɵa.

²³A ni n’a bindiɗi paakai edi aŋ wala kadai, paakai zi ɗûkliti sariya na midini afti lai aŋ hlai na kadai su;

²⁴Nagai maa gai pi azumai kai, gai bli azumai kaalai, sirdaiɗi maa gai rivi azumai kaalai, Amma na ɓa, EPIƊ-ƊAI a yiba smer li midiɗi EPIƊ-ƊAI ɗa, e huuli edi. Berber a finiɗi maini hoso nɵa.

²⁵Alaw na Siɗik a na zilba maini nɵa: Ki kitiŋa gaini asiya ɗa? Mu tala arki maini asiya ɵa ɗa?

²⁶Yimi arki amai, tili haw ɗa! N'a rga wazagai hanɗa paŋ asiya ɗa? A ni n’a yikasi vokɗi askraiɗi anene paŋ ɗa. A yikiɗisi gaini yikiɗi ktai ktai paŋ, gaini spakni n’abai, gaini gdaŋni n’abai ɗa lai. Ktai n’a hinasi edi pini aŋ kai.

²⁷Pinzibani Yakob, ku na ɵa marava, Izrayel, ku na waya pini pra pra lai ɓa: N'a na za sa na ɗa, EPIƊ-ƊAI a na talaŋ kai, Jreŋa ɗa, Alaw na wiya a na mula arni midini kai. Ku muɗa nɵa buri ma ɗa?

²⁸Ku siɗa ɵa kai ɗi? Ku ɵina ka ɓa Epiɗ-ɗai Alaw n’a vada kai, a ni n’a rga koŋni afti ɗa, ku ɵina ka ɵa duk kai ɗi? A kaya kai, a liliɓa kaalai; yelni ɗa, ɗif a kiɗa midini kaalai.

²⁹A sini gdaŋ wiini ni n’aŋ gai kiyi su, a riya gdaŋ na wiini ni na gai liliɓi ɗa amai lai.

³⁰Aliyagoi n’agogoi ɗa e kiyi, e liliɓi lai, gawlakai ɗa e tiki piɗi e kiɵiŋi warɗi futi lai.

³¹Amma nagai n’e biyi tin EPIƊ-ƊAI ɗa, e nivi gdaŋ zamai pra pra, E ɗifli haa amai gaigai maini muka nɵa, e luwi ɗa, e liliɓi kai, e hili ɗa e kiyi kaalai.