Read Mousgoum Esaya 41 Bible Online

Esaya 41 - Mousgoum bible

Esaya 41

¹Wudi, bi hiyak, ziɓiriŋa, Tiki ɗai, pisi siki amai, hilisi sa, miɗi seŋki ɗa! Ɗiyumu miɗi marmu wuzaɗi sariya,

²N'a fakasi ɗif amai piɗi futi na dawai par par, Na jre-ɗikat te yikasi ɗai buri e hili pini ɗa asiya ɗa? N'a siɗini pinzibaɗi ɗai war tini, a wiyiɗi paakai azumai wuzani lai ɗa asiya ɗa? Na kaɵkarni a bindiɗi maini alogodo nɵa, ɓarawni a bindiɗi maini hoso na smer a fanaŋ nɵa lai ɗa!

³Ɗif hanɗa a tika futi piɗi a hala wuzani sek gai hangalni warni futi n’ezini a tika ka warni duk kai.

⁴N'a za sda hanɗa asiya ɗa? N'a vaŋ amai ɵa ɗa asiya ɗa? A ni na haa war pi zi tiki par, a za vna vna paŋ ɗa. Ta EPIƊ-ƊAI mu n’avut, gaiɗi n’asakal debe ɗa, mu na lai.

⁵Wudi paŋ a tala hanɗa a hunai lai, koŋni afti ɗa paŋ a jiriya lai. Gai hlaini a torasi sini, a halasi sini.

⁶E zini piɗi marɗi, asiya ɗi paŋ a miɗini wiini maini ɓa: Pa arku!

⁷Ɗif zi rgi wazagai ɗa, a sini arai zi pi wiini ɗif n’a hilya kawakai ɗa, Ɗif n’a zizina kawakai na bapɗamai gaini marto ɗa, a sini arai zi pi wiini ɗif n’a gizilaŋsi bapɗamai ɗa a muɗa buriɗi fai fai ɓa: "Sdaɗi pɗem gara" Asakal par a ŋala alaw zi rgi azumai gaini ɓere ɓal ɓal kapai a muguza kai.

⁸Amma tuku, Izrayel na ɗifŋa, Yakob na mu vuruku, pinzibani Abraham, na marmaya!

⁹Tuku na mu yimukusi edi war koŋɗi yai ɗa par, na mu yikukusi edi war hagaɗi par, na mu muɗuku ɓa: Tuku ku ɗifŋa, mu vuruku li, aga mu hinuku edi kir kai ɗa!

¹⁰Ku huna kai, buri mu na gaiku, ku ɵiɓa vulai suku kai, buri ta m’Alaw na wiiku, aga mu suku gdaŋ, aga mu luwuku ɗuwal, aga mu zina puku gaini spakŋa n’abai n’a sa rɗi n’amai ɗa

¹¹Nagai n’e zi hiy suku ɗa, aga e tiki siyer, arɗi aga a yima amai kai. Nagai n’e ɗa piyuku muku ɗa, aga e vidi edi kadai, aga e mri edi.

¹²Aga ku piyiɗi, amma aga ku niviɗi kir kai, gawku ɗa; aga e bindi aŋ wala kadai, aŋ hlai kadai su, nagai n’e ɗi ka e hitumuku ɗa.

¹³Buri ta m’EPIƊ-ƊAI, Alaw na wiiku, mu ni n’a yimiti tuku na wus ɗa, na muɗuku lai ɓa: Ku huna kai, mu na luwukuɗi ɗuwal ɗa.

¹⁴Ku huna kai, Yakob, tuku k’atla n’agwi kadai n’arni afti Izrayel, tuku k’ahini atla n’a bulasi na ɗa a bili hai, Mu na luwukuɗi ɗuwal, a miɗi na sini EPIƊ-ƊAI par, Ta na mu wurukusi edi ɗa, ta Alaw na Siɗik na wiiɗi Izrayel.

¹⁵Tala, mu zuku aŋ wala na guma, n’e giɵi seyem gaini, na kawakai na mini sweɗ sweɗ gai pi sini tiɓ tiɓ, na hehe kaŋ, aga ku haɗa huwaŋai, ku saraŋ lai aga ku bunda hlai na boŋorai ta ta ɗa maini evek nɵa,

¹⁶Aga ku fulaŋ, smer aga a tikaŋ, berber aga a ɵaraŋ edi lai. Amma tuku aga ku firiya war EPIƊ-ƊAI, aga ku kola suku war Alaw na Siɗik na wiiɗi Izrayel.

¹⁷Na murgakai gaiɗi na haw aga e piyi yem, amma yem aŋ kai; alisiɗi aga te hula amlai miɗi tini sai. Amma ta EPIƊ-ƊAI aga mu wiyiɗi seŋ, Ta, Alaw na wiiɗi Izrayel aga mu hiniɗi edi kai.

¹⁸Aga mu hinasi ra a ka ɵimani futi n’agogoi su su ɗa, Mu hina hlai zi liiwi yem a kasi zumai war hudokai par lai, aga mu bunda basga na kaɗataŋ aŋ avai, hlai na kooloŋ ɗa aŋ hlai zi liiwi yem lai.

¹⁹Aga mu pa luwuŋ Sedre, luwuŋ Akasiya, luwuŋ Mirte gaini luwuŋ Olive lai edi war basga na kaɗataŋ, mu pa luwuŋ Sipre gaini luwuŋ Orme gaini luwuŋ Buwi lai war hlai ktai midini afti na kooloŋ

²⁰Kapai ɗai e tiliŋ, a yima midiɗi, kapai e tiki hangalɗi sini, e siɗi gai hlaiɗi paŋ ɓa a za hanɗa a EPIƊ-ƊAI gai tini, a rga hanɗa a Alaw a Siɗik na wiiɗi Izrayel.

²¹EPIƊ-ƊAI a muɗa: Miɗi jreki edi haw ɗa! Pai na wiini Yakob a muɗa: Siŋkiyi wala na siŋka edi ɓa jeki a na ɗa haw ɗa?

²²E hilisi e siŋkiŋ edi haw! E muɗumu midini wazagai n’aga a za dawai sek ɗa haw ɗa! Wazagai n’a vuga ɗa, a za maɵa maɵa ɗa? Kapai tiyi mi hiini midini, mi siɗi n’aga a za asakal sek ɗa lai; Zaw miɗiyi midini wazagai n’aga a za dawai sek ɗa haw ɗa?

²³Miɗiyi midini wala n’aga a za dawai sek ɗa, kapai tiyi mi siɗi ɓa tiki ki ɗi alawai; Zi wala ktai na pɗem zaw na meefeŋ ta, kapai aryi a mala edi sini, Kapai tiyi gai hlaiyi paŋ mi tiliŋ haw ɗa!

²⁴Tiki ki ɗi wala ktai kai sam, sdaki na ki ziŋ paŋ ɗa ɗe, a wala ktai kaalai ɗif n’a viriki li aŋ n’alawaini ɗa, a za ɗa a wala na hi-hir.

²⁵Mu yikaŋsi war gal hlai na azumai sek ɗa par, a halasi lai. Haa, piɗi futi na dawai par par, a na yika yikiŋa; a kirpiɗi n’abakai n’e ɵi wuze azumai maini ŋurɓok nɵa, a tiyiɗi azumai maini adiŋkai na ɗif zi ɵi grak a taiaŋ azumai ɗa nɵa.

²⁶Ɗif n’a muɗa ka midini wala hanɗa war pini zi tiki par, kapai mu siɗiŋmu ɗa asiya ɗa? N'a muɗaŋ ka avut par wuzani hlai, kapai mu kiɗumu aŋ mu muɗumu ɓa: seŋ hanɗa a jre ɗa asiya ɗa? Ɗif ktai a muɗa midini kaalai, ktai a sa labar hanɗa edi kaalai, ktai a ɵina seŋ hanɗa war miki par kaalai.

²⁷Ni n’a cosi a Siyon avut ɗa a muɗa: Tili, e ɗi na! Mu ɵina ɵeŋ aŋ ka labar na pɗem wiiɗi Yeruzalem lai.

²⁸Mu tala ara haa, ɗif ktai kai, Arbaɗi ɗa, ktai n’a zina pa gaini hiini na pɗem aŋ kai. Ktai a nafu ɗa, aga mu zilbaŋ, a wayaŋa seŋ lai.

²⁹Gai hlaiɗi paŋ e ɗi wala kadai, sdaɗi paŋ a wala kadai lai; alawai zi rgi na wiiɗi ɗa, a smer, a hlai kadai su lai.