Read Mousgoum Esaya 42 Bible Online

Esaya 42 - Mousgoum bible

Esaya 42

¹Hanɗa a ɵeŋ na wiya, n’aga mu zina pini, Na mu varaŋsi edi, na mu daraŋ gara lai. Mu hina sezeŋa midini; aga a kasi jre-ɗikat arbaɗi ɗai lai.

²Aga a ɗuula kai a muɗa gdaŋ kai, ɗif aga a ɵina wulani edi war futi kai

³Vayai na gai humki ɗa aga a haɗaŋ kai, mini afu n’a na ya ɗus ɗus ɗa, a fuɗaŋ edi kaalai. Amma aga a siŋkiti sariya na jre edi gai futini.

⁴Aga a kɵiŋa kai, a haɗa azumai kaalai, haa a kitisi sariya na jre midini afti paŋ. Wudi a baiya na ɗa a gadai zi ɗû na wiini.

⁵Epiɗ-ɗai Alaw a na muɗa maini nɵa: Ni n’a rga hlai n’amai, a gaŋaŋ edi lai, ni n’a ɵiti yai ɗa azumai maiɗi ginai ɵa, gaini wazagai na warni paŋ, n’a sa smer warɗi ɗai na warɗi paŋ, a sa suŋfa wiiɗi ɗai n’e ɗa hili warɗi paŋ lai.

⁶Ta EPIƊ-ƊAI mu yikukusi buri jre-ɗikat, Aga mu yimuku tuku, mu ɵa wuzaku, aga mu giɗmuku, mu zuku aŋ bonu na wiiɗi ɗaiŋa, aŋ gaglai na wiiɗi pinzibaɗi ɗai na zamai paŋ lai.

⁷Aŋ mala arɗi ɗai na malvanai edi, aŋ miliɗi ɗai zi daŋgai edi warɗi daŋgai par, aŋ miliɗisi nagai n’e ɗa war gegeŋ ɗa edi war dilimi n’e dugiɗi amlai warɗi par.

⁸Ta m’EPIƊ-ƊAI, hanɗa a yikiŋa; Aga mu sa kol na wiya ɗa wiini wala zamai kai, hormo na wiya ɗa wiini alawai zi rgi kaalai.

⁹Wazagai n’a vuga ɗa a vuga ya, mu miɗiki na ɗa gaini wazagai na hahakai; wuzani hlai n’aga a za ɗa, mu frya ɓa ki ɵini ɓa.

¹⁰Zini yama na hehe burini EPIƊ-ƊAI, Kuuliŋ gaini yama edi mini koŋɗi yai ɗa paŋ par, tiki na ki piyi midini yem-ra n’abai, gaiki tiki na warni paŋ, Wudi gaiki tiki na midini paŋ lai.

¹¹Basga na kaɗataŋ gaini fuŋ n’abakai, ɗûûli! fuŋ n’agogoi na Kedar t'aŋ woni lai, Ɗai na Sela ɗa, ɗûûli ɗuwal zi friyi, amai par merfeŋni huwaŋai, e ɗûûli ɗuwal zi rɗi n’amai.

¹²A juva ɓa ɗai e sini kol wiini EPIƊ-ƊAI, juva ɓa wudi a kolaŋ gaini yama lai.

¹³EPIƊ-ƊAI a na hala edi min hatam maini gaŋgalaŋ nɵa, warni a dara hatam maini ɗif zi hatam nɵa; a ɗuula ɗuwal zi gaw, a ɵa tini mini lai, a rɗa amai midiɗi gawni

¹⁴Haa aɗipar, mu muɗa seŋ kai, mu ma dug, mu rodo sa rod, mu siŋka maiɗi munina te dara te zi poka nɵa, suŋfaŋa a dara a wula wara, a halasi ɗa amai ma sek sek.

¹⁵Huwaŋai gaini hlai na boŋorai aga mu budaŋ aŋ hlai na kadai su, aga mu hula wazagai n’a goɗa paŋ, aga mu bunda rakai aŋ wudi, aga mu hula avakai ama lai.

¹⁶Aga mu ɵa wuzaɗi na malvanai warɗi futi, na nagai e siɗiti kai, aga mu ɵa wuzaɗi warni futi na leuh leuh na nagai e siɗiŋ avut par kai. Aga mu bunda gegeŋ na wuzaɗi aŋ gaglai, afti na darɓazilai, aŋ hlai na plas lai; Hanɗa a wala n’aga mu zaŋ ɗa, aga mu hiniɗi edi kai.

¹⁷Aga e wiyi gai dubaɗi, aga e tiki siyer, nagai n’e pɵi midini alawai zi rgi, n’e miɗi sini alawai zi rgi na gaini kawai zi hiliyi ɗa ɓa: Tiki ki ɗi alawai na wiyi.

¹⁸Tiki na ganaŋai ɵini! Tiki na malvanai mili arki, tili!

¹⁹Ɗif na melveŋ ɗa asiya ɗa? A ɵeŋ na wiya kai ɗi? Na ganiŋ maini ɵeŋ na mu na ɵinaŋɗi na ɵa ɗa asiya ɗa? Ɗif na melveŋ maini ni n’a nava ɵeɗ ɵa ɗa asiya ɗa? Na melveŋ maini ɵeŋ na wiini EPIƊ-ƊAI ɵa ɗa asiya ɗa?

²⁰Ku tala wazagai viya amma ku tika hangalku sini kai, E mili ɵimaɗi mal mal, amma ktai n’a ɵina aŋ kai.

²¹A tala arni EPIƊ-ƊAI pɗem, buri a bunda gadai zi ɗû na wiini abai, juf gara lai burini jre-ɗikat na wiini.

²²Tili, ɗai hanɗa e hili wazagaiɗi hil, e virimiɗi vram lai! Ɗai e ɓili waŋ wuzaɗi, e yimiɗi warni, e miliɗi warni daŋgai; E hili wazagaiɗi, amma ɗif n’a pliɗi edi aŋ kai, e virmi wazagaiɗi, amma ɗif n’a muɗa ɓa: Wiyiɗi wazagaiɗi aŋ kaalai.

²³Arbaki ɗa, n’aga a tika hangalni sini seŋ hanɗa asiya ɗa? N'aga a tika hagalni ta, kapai dawi sek a ɵina ɗa asiya ɗa?

²⁴N'a sa Yakob tiɗi ɗai aŋ virmi wazagani asiya ɗa? Zaw Izrayel tiɗi ɗai zi vram ɗa asiya ɗa? A EPIƊ-ƊAI na mu zumu tuwur sini kai ɗi? Na mu ɵunumu mini kai ɗa kai ɗi? Na mu zumu pini gadaini zi ɗû kai ɗa kai ɗi?

²⁵Nɵa EPIƊ-ƊAI a hinasi hiyni n’abai, gaini gaw zi tûûri wazagai edi midiɗi Izrayel, Gaw hanɗa te tikasi piɗi Izrayel maini afu ɵa aŋ yitisi war gal paŋ par, amma a yima midiɗi Izrayel kai, a yiti edi, amma te hiina seŋ hanɗa ktai.