Read Mousgoum Esaya 43 Bible Online

Esaya 43 - Mousgoum bible

Esaya 43

¹Tiyana ɗa, EPIƊ-ƊAI, n’a ruguku tuku Yakob, na zuku tuku Izrayel ɗa a na muɗa maini nɵa: Ku huna kai, buri mu wurukusi edi ya, mu yikukusi gaini yikiku, tuku ku wiya!

²Ku haawa arni yem na hulum maa, mu na gaiku, ku hawa ɗa a rakai maa, a kiɗa a tikuku kai, ku niya ɗa arni afu ɗi, kiɗa a yuku kai, koo alesni afu tekeɗe, aga a yiku kai.

³Buri ta m’EPIƊ-ƊAI, Alaw na wiiku, m’Alaw na Siɗik na wiiɗi Izrayel, ni n’a kurɗuku edi, Mu siti Egipte aŋ vrak na muduku, Etiopiya gaɗi Seba azuku lai.

⁴Buri ɓa ku na ara caŋ gara, ku tala ara ɗa abai gara, mu duruku gara lai ɗa, Mu sa ɗai edi azuku, mu sa pinziɗi ɗai edi azuku lai kapai ku mra kai.

⁵Ku huna kai, buri mu na gaiku; aga mu wiyiɗisi pinzibaku na piɗi futi na dawai par aha, aga mu tipiɗisi nagai na piɗi futi na koskoi sek ɗa aha lai.

⁶Aga mu muɗa sini gal n’azumai sek ɗa ɓa: Wiyiɗisi. Sini gal n’amai sek ɗa ɓa: Ku blai midiɗi kai, wiyiɗasi aliya na maɵagai n’e ɗa edi gaigai ɗa, wiyiɗasi aliya na falakai n’e ɗa edi war koŋɗi yai ɗa paŋ aha lai.

⁷Kiɗiŋasi nagai paŋ n’e yiki siɗi ɓa e ɗi na wiya, na mu rgiɗi, mu ziɗi, mu ziziniɗi lai buriɗi abai na wiya.

⁸Miliɗisi ɗai na malvanai anene, koo ɓa e ɗa gaini arai piɗi, miliɗisi nagai na ganaŋai anene, koo ɓa e ɗa gaini ɵime piɗi.

⁹Pinzibaɗi ɗai paŋ e diŋgisi, ɗai paŋ e tipisi lai. Arbaɗi ɗa, n’a muɗa ka seŋ hanɗa asiya ɗa? Arbaɗi, ɗa, n’muɗumu ka wazagai n’a za hanɗa asiya ɗa? E kiɗisi zaidakaiɗi ɗa, kapai e siŋki jreɗi ɗa edi. E muɗumu, kapai mu ɵinumu, mu muɗumu ɓa a jre lai ɗa!

¹⁰Tiki ki ɗi zaidakaiŋa, -a miɗi na sini EPIƊ-ƊAI par, ki ɗi ɵeŋa, na mu varaŋ edi, kapai ki siɗi, ki yimi wara lai, kapai a yima miɗiki ɓa Alaw muta: wuza par Alaw zamai a za ka kai, asakala par zamai aga za kaalai.

¹¹EPIƊ-ƊAI mu ta, mu ta pal, ɗif na kurɗa ɗai zamai aŋ kai, sai mu ta.

¹²Ta, mu kasi pli n’edi mu ta, mu muɗa edi midini ɗa mu ta, mu siŋkaŋ edi mu ta lai. Mu zaŋ ɵa ɗa mu ta, a alaw zamai n’edi par kai. Tiki ki ɗi zaidakaiŋa, -a miɗi na sini EPIƊ-ƊAI par- Alaw ɗa mu ta.

¹³Haa war pi zi tiki par, Alaw mu ta ɵa, ɗif a kiɗa aŋ hulta wala edi war ta par kai; Na mu dara mu zaŋ ɗa, a cakaŋ ta ɗa asiya ɗa?

¹⁴EPIƊ-ƊAI, ni n’a wirikisi edi, Alaw na wiiɗi Izrayel ɗa a na muɗa maini nɵa: Mu ɵinaɗi ɗif midiɗi Babilon na ɗa buriki tiki. Ɗai na Babilon n’e ɗa prisi edi gaini hulamai n’abakai n’e rɗisi amai gaini ɗa aga mu biɗi agoɗom.

¹⁵Ta m’EPIƊ-ƊAI, Alaw na Siɗik na wiiki, ni n’a rgiɗi Izrayel, pai na wiiki.

¹⁶EPIƊ-ƊAI, n’a ɓisiti futi agoɗom arni yem-ra n’abai, n’a ɵiti futi arni yem naka gdaŋ gara a na muɗa maini nɵa.

¹⁷A ɵina plaai gaini saretai zi gaw edi min gaw, askarai gaiɗi gaŋgalaŋai zi hatam lai aŋ bonu. E yiki azumai, e kiɗi e fiki amai kir kai, E mri, e vidi edi maini afu n’a ya ɗus ɗus nɵa.

¹⁸Ki hini miɗiki a kɵa gaini wazagai n’a vuga ɗa kai, ki tili sini wazagai n’a za ɗa kaalai.

¹⁹Mu a wazagai na hahakai, Tiyana a tika pini a na siŋkasi edi lai, ki siɗiŋ ɵa kai ɗi? Aga mu ɓasa afti edi war basga na kaɗataŋ, Aga mu ɓasa rakai midini afti na kooloŋ ɗa lai.

²⁰Wazagai n’edi buza paŋ aga a saŋa kol, belemke gaini elket lai, buri mu kasi yem edi war basga na kaɗataŋ, mu ɓasa rakai idini aftina kooloŋ ɗa lai. Kapai ɗaiŋae ci yem, Ɗaiŋa na u viriɗisi edi ɗa.

²¹Ɗaiŋa na mu ziɗi ɗa, aga e kuliŋa gaini yama lai.

²²Yakob, ku yikaŋa aŋ zina puku mu ta kai, Izrayel, ku kaya ta su.

²³Ku fuɗaŋa adime zaw hek aŋ ɓaka zi yi kai, Ɓakaku na ku zaŋ ɗa, a zi saŋa kol kai; mu zuku dewele muduku aŋ saŋa ɓaka na gaini ahini seyem kai, mu kiyuku gaini wazagai zi ɗûgûdi zi lûgûzi kaalai.

²⁴Ku wuraŋa ka sugoy zi ɗûgûdi zi lûgûzi aŋ wiya gaini sulai kai, ku vaŋa ka gaini emel gdaŋ na wiini farai zi ɓaka kaalai, amma ku zaŋa dewele mada aŋ bunda aŋ bege gaini tuwurku na ku zaŋ ɗa, ku kaiaŋa gaini meefeŋku lai.

²⁵Mu ta, ta pal na mu kiɗa mu haza hi n’amai midini gadai na wiiku edi, na ɓa mu dara ɗa, mu hina mada a kɵa gaini tuwur na wiiku kir kaalai.

²⁶Slaŋa mada haw! kapai mu zumu sariya gaiɗi marmu, Tuku dama muɗa jreu edi haw ɗa, kapai ku siŋkiyi ɓa meefeŋku aŋ kai ɗa.

²⁷Tiyku n’avut ɗa a za tuwur, ɗaiku na mini ɗa e fiki amai sa.

²⁸Nɵa mu miliɗi n’abakai na war sda n’amlai war hlai na sɗik ɗa edi, mu siɗi pinzibani Yakob aŋ vidiɗi edi, mu siɗi aliɗi Izrayel edi min tirki na wiiɗi gawɗi lai.