Read Mousgoum Esaya 44 Bible Online

Esaya 44 - Mousgoum bible

Esaya 44

¹Tiyana ɗa, Yakob na ɵeŋa, ɵina pɗem! ɵina pɗem, Izrayel na mu vurukusi edi.

²EPIƊ-ƊAI n’a zuku, n’a zizinuku amlai war gutɗi amuku par, ni n’a zinai na wiiku lai ɗa, a na muɗa maini nɵa: Yakob na ɵeŋŋa, ku huna kai! Yesurun na mu vuruku edi ɗaw.

³Aga mu ma yem midini afti na huleŋ, mu ɓasa arakai midini hlai na kooloŋ lai, aga mu hinasi sezeŋa midiɗi aliku, ɓikiŋa midiɗi pinzibaku lai.

⁴Aga e wili amai arbani evek, maini vayai n’arni yem nɵa.

⁵Ktai aga a muɗa ɓa: Ta mu wiini EPIƊ-ƊAI, na zamai aga a muɗa ɓa: Ta mu na war pinzibani Yakob, Ɗif ni ɗa aga a ɗo war tini ɓa: Mu wiini EPIƊ-ƊAI, aga a kola sini buri e yikiŋ ɓa ɗif na Izrayel.

⁶EPIƊ-ƊAI, pai na wiiɗi Izrayel, ni n’a wûriɗisi edi, EPIƊ-ƊAI zi Spak paŋ, a na muɗa maini nɵa: Ta mu n’avut gaini n’asakal, Alaw zamai aŋ kai, sai mu ta pal.

⁷Na maya ta ɵa ɗa asiya ɗa? A muɗasi edi, Wazagai n’a vugasi haa sin mefeŋ na mu rgiɗi ɗai na ɗipar par, haa tiyana ɗa, a muɗaŋasi edi, a siŋkaŋa lai. A siŋkaŋa wazagai n’a za kai ɓa, n’aga a za dawai sek ɗa lai.

⁸Ki hini hunai a yimiki kai, ki jiriyi kaalai, Mu miɗiki ka seŋ hanɗa ya lai, mi ziki ka labar midini aɗipar ya lai kai ɗi? Tiki ki ɗi zaidakai na wiya: Na ɓa mu ta kai ɗa, Alaw zamai a na ɗi? Huwuŋ na gdaŋ zamai a na ɗi? Zamai aŋ kai!

⁹nagai n’ezizini alawai zi rgi ɗa, gai hlaiɗi e tûûsi edi ɗa a siɗi, sdaɗi na gai futini ɗa a nava wala ktai kai, a wala zi zaida buriɗi, arni a tala kaalai, siɗi midini kaalai, nɵa siyer aga a yimiɗi.

¹⁰Ɗif n’a za alau zi rgi, zaw a yora alaw zi rgi kadai meere nɵa a na ɗi?

¹¹Nagai n’e ɗa pini paŋ siyer aga a yimiɗi, Nagai n’e ziziniŋ ɗa, e ɗi ɗai muɗakai kadai; e diŋgisi kafa, e hilisi wuza haw le: gai hlaiɗi paŋ, hunai aga a yimiɗi, siyer aga a dugiɗi lai

¹²Ɗif zi gɵi faifai, kapai a gzila beŋel ɗa, a za sda gaini morjo, gaini marto lai, a gzila kaai gainigdaŋni, amma wiyamai te yimaŋ li ɗa, gdaŋ warni kai, na ɓa a ca yem kai ɗa, a liliɓa tar.

¹³Ɗif zi kilɗi luwuŋ a mula sogom yau, a kata mogoni luwuŋ ta, a ɓasaŋ azumai gaini lakre, a ɗuklaŋ gaini makasni a kilɗaŋ a zizinaŋ maini ɗif nɵa, a zaŋ kal kal maini ɗif murɗek nɵa, a paŋ amlai war dalamni alaw ktai tiɓ.

¹⁴A bulasi ɗa a luwuŋ na maini Sedre ɵa, zaw luwuŋ Sipre ɵa, zaw luwuŋ ktai n’abai, n’a wulaŋ amai arbani luwoŋai na warni jur, zaw a pa luwuŋ peŋ azumai, faŋ n’a ɵa ɗa a wulaŋ amai lai.

¹⁵Luwuŋ hanɗa, ɗif a bulaŋsi aŋ wala zi yi, a kopa sini gaini lai. Tini kaai a za peŋ gaini lai, tini kaai a za alaw zi rgi gaini, a hurga azumai wuzani lai, a zizina alaw zi rgi ktai, n’a goɓa azumai wuzani lai.

¹⁶Galni luwuŋ ɗa, a yaŋ, a da neŋni gaini, a sisilaŋ, a luma haa a va; a kopa sini, a muɗa lai ɓa: Kaai! luwuŋ hanɗa a kopa si gai futini, afuni ɗa a ya pɗem gara lai.

¹⁷Gai pini luwuŋ n’a hina ɗa, a za alau gaini, alaw zi rgi na wiini a goɓa azumai wuzani, a hurga azumai wuzani, a siiwaŋ lai, A muɗa: plaŋa edi, buri tuku k’Alawŋa.

¹⁸E siɗi wala kaalai, yel midiɗi kaalai, arɗi gai ŋilvi tik, e kiɗi e tili wala kai, agulɗi gai diŋri, e hiini wala na pɗem kir kaalai.

¹⁹Ktai n’a waisi hiinini sini, n’aŋ gaini siɗi midini, gaini yel midini lai n’a muɗa ɓa: Galni luwuŋ hanɗa mu yaŋ yi, mu za peŋ gaini morjoni ta, mu sisila neŋŋa gaini sel, mu lumaŋ ta lai; pini n’a hina ɗa, mu za gaini na ɗa a wala na hi-hir, mu goɓo fu na azumai wuzani luwuŋ lai maɵa ɗa aŋ kai.

²⁰Ɗif hanɗa a va hiinini na ɗa gaini bono meere, hiinini na ga tirɗi edi a na wulaŋ edi, alaw ni ɗa aga a plaŋ edi kai; Aga a zilba sini ɓa: aŋ ta na ɗa, a wala na jre kai sike! Nɵa kaalai.

²¹Hina muduku a kɵa gaini seŋ hanɗa, tuku Yakob, Hina muduku a kɵa, Izrayel, buri tuku ku ɵeŋ na wiya; mu zuku ɓa kapai ku za aŋ ɵeŋ na wiya, Izrayel, mada aga a wula gaiku kai.

²²Mu haza hi n’amai midini gadai na wiiku edi maini ɗugul zi faŋ n’a giyha nɵa, tuwurku lai, maini hlai zi digi na gorof par nɵa. Wayasi sa, buri mu wurukusi edi ya.

²³Hlai n’amai, ɗuula gani firiyi, buri EPIƊ-ƊAI a za sda ta, Hlumni hlai n’azumai, ciriya, Huwaŋai, ɗûûli gaini firiyi, Tiki jur gaini luwoŋai na warki paŋ lai, buri EPIƊ-ƊAI a wûriɗisi pinzibani Yakob edi ya, a siŋkiti abaini aha war Izrayel ya.

²⁴EPIƊ-ƊAI na wurukusi edi, Ni n’a zuku amlai war gutɗi muku par, a na muɗa maini nɵa: Ta EPIƊ-ƊAI mu za wazagai paŋ; Mu gaŋa hlai n’amai ɗa edi kiiya, mu ɵiti yai ɗa azumai kiiya lai, ɗif a zina pa kai.

²⁵Seŋ na wiiɗi ɗai zi siɗi wuti, mu mulaŋ edi piɗi, nagai n’e miɗi seŋ na wuze ɗa, mu bindiɗi e miɗi ɗar kadai, na yalakai ɗa mu tusiɗi edi, siɗi na wiiɗi ɗa mu bundaŋ aŋ duuli kadai lai.

²⁶Aga mu va seŋ na ɵeŋ na wiya a muɗaŋ ɗa amai, aga mu va amai, wala na ɗaiŋa na mu ɵiniɗiɗi e miɗi midini ɗa. Mu muɗa ɓa: Yeruzalem ɗa ɗai aga e zi fuŋ warɗi, Fun n’abakai na Yuda ɗa aga rga amai, Hlaiɗi n’a haɗa azumai ɗa, aga mu rgaŋ amai lai.

²⁷Aga mu muɗa sini yem na hulum ɓa: huula amai! aga mu hiɗika rakaiku n’a kasi yem warku amai.

²⁸Sirus ɗa, mu yikaŋ ɓa 'ɗif giɗimi farai na wiya', aga a va diriŋa paŋ amai, aga a muɗa ɓa Yeruzalem te rga amai, aga a muɗa lai ɓa tempel ɗa a rga amai pra lai.