Read Mousgoum Esaya 45 Bible Online

Esaya 45 - Mousgoum bible

Esaya 45

¹EPIƊ-ƊAI a na muɗa sini ɗif n’e mi emel n’e tiki ɗai war sda gaini midini, Sini Sirus na mu yimaŋ aŋ war ta na wus kapai a sini rɗi n’amai midini pinzibaɗi paŋ, kapai a vada spakɗi paakai edi, kapai a mala min magala na tin sulu edi wuzani, kapai magala na min fuŋ n’abakai a amai kir kai ɗa maini nɵa:

²Ta dama aga mu ɵa wuzaku, hlai na ai zigi zag ɗa, aga mu bundaŋ gai kiti kal kal, minihla zi kiya ɗa aga mu haɗaŋ edi, kawakai n’e ɵi min hlai gaini ɗa aga mu ɗuklaŋ edi lai.

³Aga mu suku der n’aŋ gai pi azumai, gaini der n’aŋ gai ŋûyi cok, kapai a yima muduku ɓa, mu yukukusi gaini yikiku mu ta EPIƊ-ƊAI, ɓa Alaw na wiiɗi Izrayel mu ta lai.

⁴Mu yikkusi gain yikuku, mu zuku aŋ ɗifŋa n’abai lai, won hai ni ku siɗaŋa kai. Mu za hanɗa burini Yakob na ɵeŋa burini Izrayel na mu varaŋ lai. Mu yikiku gaini yikiku, mu sutuku abai, amma paŋ ktai ku siɗaŋa kai.

⁵EPIƊ-ƊAI mu ta, na zamai aŋ kai, Alaw mu ta pal, Alaw zamai aŋ kai, hlai na mu zizinuku min hatam ɗa, tuku maa ku siɗaŋa kai.

⁶Kapai ɗai na midiɗi yai paŋ e siɗi ɓa, Alaw mu ta ktai, na zamai paŋ ɗa a wala kadai, e siɗi ɓa EPIƊ-ƊAI mu ta, na zamai aŋ kaalai.

⁷Mu za gaglai ɗa mu ta, mu za gegeŋ ɗa mu ta lai, Mu za ɵeɗ mu ta, mu za gir ɗa mu ta lai; Mu za wazagai paŋ, mu ta EPIƊ-ƊAI.

⁸Hlai n’amai, tiɗiwasi maɗai azumai, Ɗugul, hinasi jre-ɗikat a ɵasi azumai maini faŋ ɵa, afti a mala mini edi, kapai kûri ɗa a wa tini edi, jre-ɗikat ɗa a diyasi amai hlai paŋ lai, Mu rga wazagai hanɗa paŋ mu ta EPIƊ-ƊAI,

⁹Haw gara burini ɗif n’a sispa gaini ni n’a zaŋ ɗa! Ni a grak z'afti arbani marni na zamai ɗa, a sɗa ɵa kai ɗi? Adiŋkai a kiɗa a muɗa sini ni n’a rgaŋ ɓa: Ku za na ɗa a ma ɗa? Zaw sdaku a nava kai ɗa, a miɗini ɵa ɗi?

¹⁰Haw burini ni n’a muɗa sini api ɓa: ku wa ahi tiɓ buri ma ɗa? Zaw siɗi ami ɓa, ku poka ahi tiɓ buri ma ɗa?

¹¹EPIƊ-ƊAI, Alaw na Siɗik na wiiɗi Izrayel, ni n’a zaŋ ɗa a muɗa maini nɵa: Ki firyi ki zilbiŋa ma midini wazagai n’aga a za avaut sek, ki firiyi ki siŋa gadai midiɗi aliya gaini sda nmu zaŋ gaini ta ɗi?

¹²Mu ziti yai ɗa mu Ta, mu rgiɗi ɗai midiɗi mu Ta lai; mu gaŋa hlai n’amai edi mu Ta, wazagai zi rgi na warni paŋ a za ɗa pin gadai na mu siŋni ɗa.

¹³Mu payaŋsi mu Ta, kapai a siŋka jre-ɗikat edi aga mu zizina futi ɗa paŋ wuzani, Aga a waya a rga fuŋ n’abai na wiya na Yeruzalem ɗa amai, aga a hiniɗisi ɗaiŋa n’e kiɗi edi midini afti zamai ɗai e wiyisi aha, si vrak kaalai, e si katu kaalai, a muɗaŋ a EPIƊ-ƊAI zi Spak paŋ.

¹⁴EPIƊ-ƊAI a na muɗa maini nɵa: der na wiiɗi Egipte paŋ, gaini farai na wiiɗi ɗai zi Sakala na Etiopiya par paŋ gaini na wiiɗi ɗai na Saba par, n’e wili mogokai gara lai, aga a bundasi tuku, a hina aŋ wiiku. Ɗai hanɗa ag e hilisi puku, gaini nigi gaini jaɓ, aga e hûrgi azumai wuzaku, aga e siiwuku lai ɓa: Alaw a n’a haku bas, na zamai aŋ kai, alawai zi rgi ɗa a wala kadai.

¹⁵Fakat, tuku k’Alaw na ŋoya sini, tuku Alaw na wiiɗi Izrayel na ku kurɗ ɗif edi.

¹⁶Siyer a yimiɗi kafa, arɗi yima amai kai, nagai n’e kilɗi alawai zi rgi paŋ ɗa, e hili sek na ɗa war siyer n’abai.

¹⁷Amma Izrayel ɗa, EPIƊ-ƊAI aga a kurɗiti edi gamai. Duk kir kai, ɵa gamai, aga ki dûgi gaini siyer kir kai.

¹⁸EPIƊ-ƊAI, ni n’a rga hlai n’amai Alaw ni n’a ziti yai, n’a ziziniti a ɗiyiti gdiŋi lai a na muɗa. A rgiti ɗa ɓa kapai te hina kadai su kai, a ziti ɓa kapai ɗai e simni warɗi. Nɵa a na muɗa ɓa: EPIƊ-ƊAI ɗa mu Ta, Alaw zamai aŋ kai.

¹⁹Mu muɗa hanɗa war kuɗohoi kai, mu muɗaŋ ɗa war hlai na gegeŋ kaalai. Mu miɗiɗi wiiɗi pinzibani Yakob ɗa buri e piyiŋa war hlai na kadai su ɗa kai, Ta EPIƊ-ƊAI mu muɗa ɗa edi gaglai, wala na mu muɗa midini ɗa, a na ɗa maini na mu muɗaŋ ɗa ɵa.

²⁰Tiki na ki hini karki piɗi pinzibaɗi ɗai ɗa, hilisi, diŋgisi, Hilisi piɗi marki paŋ. Nagai n’e ɗa libi alawaiɗi zi luwuŋ, zaw n’e ɗa siiwi Alaw n’a kiɗa a kûrɗiɗi edi kai ɗa, ɗai nagai ɗa wala midiɗi kai.

²¹Miɗi seŋki n’a na ɗa, piyisi wala n’a siŋka edi ɓa seŋki a jre ɗa lai. Kitisi miki wiiki aŋ bonu. N'a na za girna na ɗa, a muɗasi ka wuzani hlai par ɓ'aga a za ɵa ɗa asiya ɗa? N'a muɗasi ka midini wuzani hlai ɗa asiya ɗa? Mu Ta EPIƊ-ƊAI kai ɗi? Alaw mu Ta ktai, a zamai aŋ kai, m’Alaw na jre, Alaw n’a kiɗa a kurɗa ɗai lai ɗa, zamai aŋ kai, sai mu Ta ktai.

²²Tiki ɗai na midiɗi yai paŋ, wiyisi sa aga ki kûrɗi, buri ɓa Alaw mu Ta ktai, zamai aŋ kai.

²³Jre jaŋ, Ta Alaw mua hiki wala ma, seŋ n’a niyadi edi war ma par na ɗa a jre, aga mu bundaŋ kai zaŋ, Ɗai paŋ aga hûrgi azumai wuza, mime paŋ aga a ha wala mini ɗa gaya.

²⁴Jre-ɗikat gaini spak ɗa, a na ɗa war EPIƊ-ƊAI ktai, nagai paŋ n’e zi hiy sini ɗa, aga e hilisi wuzani, war siyer.

²⁵Pinzibaɗi Izrayel ɗa aŋ aga e zi edi aŋ ɗai na jrekai burini EPIƊ-ƊAI, aga e kûli siɗi gaini lai.