Read Mousgoum Esaya 48 Bible Online

Esaya 48 - Mousgoum bible

Esaya 48

¹Slini pɗem, tiki pinzibani Yakob, tiki na yikiki ɓa Izrayel, na ki nyisi edi warni yem na wiini Yuda par; tiki na ki hi miki gaini yikini EPIƊ-ƊAI na ki yiki miki ɗa a Alaw na wiiɗi Izrayel, amma war jre kai, war ɗikat kaalai.

²Buri e yiki siɗi gaini fuŋ n’abai na sɗik ɗa, e piɵi midini Alaw na wiiɗi Izrayel, na yikini ɓa EPIƊ-ƊAI zi Spak paŋ ɗa lai.

³Wazagai n’a vuga ɗa, mu muɗa edi midini haa gamai par, a niyasi edi ma par ya, mu miɗiŋki ya lai; tizaw tar mu za sda, wala hanɗa a za lai,

⁴Mu siɗa ɓa muduku gdaŋ gara, pin jakku gdaŋ mai kawai ɵa, midini arku gdaŋ maini kiya ɵa lai,

⁵Mu zuku zaida midini wazagai hanɗa wuzani hlai par, mu muɗuŋku wuzani hlai na wala hanɗa a za kai hai, kapai ku muɗa kai ɓa: A za hanɗa a alaw zi rgi na wiya, a sinisi futi aŋ za ɗa a alaw zi rgi na wiya, zaw a wala na mu zizinaŋ maini ɗif ɵa gaini kawai zi hiliyi ɗa kai.

⁶Slina pɗem, Tala wazagai hanɗa paŋ, Tiki ɗa aga ki miɗi edi midini wazagai hanɗa kai ɗi? Mu dara mu miɗiki midini wazagai na hahakai tiyana par. Wazagai n’a nafu gai ŋûyi cok wuzani arku, ku siɗaŋ kai.

⁷A wazagai n’a zasi avut par kai, amma a za na ɗa tiyana, amma haa aɗipar na ɗa, ku ɵina ka seŋ hanɗa duk kai, kapai ki miɗi kai ɓa: A na ɗa ɵa, ta mu sɗaŋ ɵa ya lai kai.

⁸Ku ɵina ka wala hanɗa kai, ku sɗa ka hanɗa kai, ɵimaku a ɵina ka wala na mai hanɗa ɵa wuzani hlai par kaalai. Buri mu sɗa ɓa tuku ku ɗif na jreku aŋ kai, mu sɗa ɓa haa amlai warɗi amuku par yuuku ɓa ɗif zi fiki seŋ amai.

⁹Amma burini yikiŋa, mu ɗiya hiy na wiya zaw; burini kol na ɗai e ɗa siŋa ɗa, mu waya hangala azumai sa, kapai mu vuduku edi kai.

¹⁰Tala mu hiliyiku edi, amma aŋ arzaŋ kai, mu titimuku tam, war waŋ zi fai fai na wiini gir.

¹¹Ta dama, ta dama aga mu za sda. Aga mu hina sa aŋ wala kadai nɵa maɵa maɵa ɗa? Kol na wiya ɗa, mu dara mu hinitini wiini wala zamai kai.

¹²Slina pɗem, Yakob, Izrayel tuku na mu yikukusi, Edi avut ɗa mu Ta, sai mu Ta, Edi asakal tar ɗa, mu Ta lai.

¹³Gaini ta mu tûûriti yai azumai, hlai n’amai ɗa mu ziznaŋ gaini spakŋa lai: Mu yikaŋsi: a halasi aŋ bonu pini marni a ɗiya wuza lai.

¹⁴Tiki paŋ, diŋgisi, ɵini pɗem! N'arbaki n’a muɗa edi midini hanɗa wuzani hlai asiya ɗa? Ni n’EPIƊ-ƊAI a daraŋ ɗa, aga a za siɗi Babilon maini n’a firya ɵa, aga a siŋka spakni edi siɗi ɗai na Babilon.

¹⁵Mu muɗa mu Ta, mu Ta ktai, mu yikaŋsi; mu kaŋsi, sdani aga a ɵa edi gai futini lai.

¹⁶Turisi sa, ɵini pɗem! Haa war pi zi tiki par, mu muɗa ka seŋ war kuɗuhai kai, wuzani pi zi tiki na wiini wazagai hanɗa paŋ, mu nafu. Tiyana ɗa, Epiɗ-ɗai Alaw a ɵinaŋasi gaini Seze na wiini.

¹⁷EPIƊ-ƊAI, ɗif zi kûri na wiiku, Alaw na sɗik na wiiɗi Izrayel a na muɗa main nɵa: Ta Epiɗ-ɗai Alaw na wiiku, mu hitiku na ɗa buri pɗem na wiiku, mu ɵa wuzaku warɗi futi n’aga ku hala warɗi.

¹⁸Kaai! Ku tika fu hangalku sin gadaiŋa ɗa, ɵeɗ na wiiku aga a bunda maini ra nɵa, jre na wiiku maini maiau na war yemra n’abai nɵa lai;

¹⁹Pinzibaku aga e bindi maini kai kai n’agoɗom nɵa, aliku maini kaikai na keɓles keɓles nɵa; yikiɗi aga a tika edi kai, aga haza edi wuzani ara par duk kai.

²⁰Niyisi edi war Babilon par, Prisi edi arbaɗi ɗai na Babilon ɗa par, gaini ɗuwal zi firiyi, miɗi labar hanɗa edi, miɗiŋ edi siɗi ɗai paŋ; labar hanɗa edi haa sin koŋni afti na puɗu paŋ, ki miɗi edi ɓa: EPIƊ-ƊAI a kurɗasi Yakob na ɵeŋni li edi.

²¹War hlai na kooloŋ n’aga a kiɗi warni ɗa, sai aga te ziɗi kir kai, aga a hinasi yem a ka buriɗi, edi sin huwuŋ par, aga a ɓisiti huwuŋ, yem ag a kasi edi.

²²Amma buriɗi na maafanai ɗa, EPIƊ-ƊAI a muɗa: ɵeɗ aŋ kai.