Read Mousgoum Esaya 49 Bible Online

Esaya 49 - Mousgoum bible

Esaya 49

¹Slini pɗem, tiki wudi na gaigai, tiki hangalki ta, tiki ɗai na gaigai, EPIƊ-ƊAI a yikaŋasi haa warɗi ama par, a yika yikiŋa mini hlai na mu na warni gutɗi ama par hai.

²A bunda ma maini kaɵkar na suma gara nɵa, a ŋoyaŋa zumai piɗi tini, a seze mada; a bundaŋa aŋ ɓaraw na miɗi suweɗ, a ŋoyaŋa war guloŋni.

³A muɗaŋa: ɵeŋŋa ɗa ku tuku, Izrayel, aga mu siŋkiti abaiŋa edi gaiku tuku.

⁴Amma Ta mu muɗa ɓa: mu kaya sa edi na ɗa kadai meere mu vada gdaŋ edi na ɗa, pin wala ktai ta kai, pin wala na nafani aŋ kai, a jre, jreŋa ɗa a na tini EPIƊ-ƊAI, vrakŋa ɗa aŋ tini Alaw na wiya lai.

⁵Tiyana ɗa, EPIƊ-ƊAI a na muɗa: ni n’a zizinaŋasi amlai warɗi ama par, kapai mu bunda aŋ ɵeŋni, kapai mu wiyiɗisi pinzibani Yakob ɗa sini, kapai Izrayel te diŋgasi amai sini; Tiyana ɗa EPIƊ-ƊAI a saŋa kol li, buri Ala na wiya ɗa gdaŋ na wiya.

⁶A muɗa: Zi na ku za aŋ ɵeŋ na wiya kapai ku yimiɗi pinzibani Yakob ɗa amai, ku wiyiɗisi aliɗi Izrayel n’e hini karɗi aha lai ɗa, a wala n’agwi kadai, n’a kiɗa kai, Aga mu zuku aŋ gaglai na wiiɗi nzibaɗi ɗai, kapai kûri na wiya a ga haa edi war koŋɗi yai na puɗu paŋ.

⁷EPIƊ-ƊAI, ni n’a kurɗiɗisi Izrayel edi, Alaw na Siɗik na wiiɗi Izrayel a na muɗa sini ni n’e ŋiŋ miɗi kai, sini ni n’a tala arɗi ɗai aŋ wala na hi-hir, aŋ bege na wiiɗi nagai n’e ŋi lai maini nɵa: paakai aga e tiliku, e fiki amai wuzaku, n’abakai lai aga e hûrgi azumai wuzuku, burini EPIƊ-ƊAI na sɗa aŋ nava kol, burini Alaw na Siɗik na wiiɗi Izrayel n’a vuruku ɗa lai.

⁸EPIƊ-ƊAI a na muɗa maini nɵa: war sarti na ku firya zinai ɗa, mu zina puku, war mefeŋ na ku paya pli n’edi ɗa, mu luwuku ɗuwal; mu giɗmuku, buri mu zuku aŋ wala na mu za bonu arbaɗi ɗai gaya ta gaini, aŋ zizina afti na Izrayel, aŋ ɓuruwa afti zi bulum n’a tuura edi wiiɗi ɗai,

⁹aŋ muɗa wiiɗi ɗai zi daŋgai ɗa ɓa: niyisi edi! Wiiɗi nagai na war gegeŋ ɗa ɓa: hilisi war gaglai! E kiɗi e nivi kuzum zi simi ɵimaɗi futi, e nivi hlai na farai a suma woni ɵimani futi n’agogoi paŋ lai.

¹⁰Wiyamai aga te ziɗi kir kai, sai aga te ziɗi ki kaalai; aga e siɗi gir na wiini yuvugiɗi futi gaini hlai z'afu kir kai, Buri ni n’a na hiina haw buriɗi ɗa aga a ɵa wuzaɗi, aga a kiɗi piɗi sini hlai zi liiwi yem.

¹¹Aga mu bunda huwaŋai na ya paŋ aŋ futi, futiŋa paŋ aga a luba amai.

¹²Tili e ɗi na, e hilisi gaigai par, e hilisi na ɗa, zamai war gal n’azumai par, zamai piɗi futi na koskoi par, na zamai midini afti na Sinim par lai.

¹³Hlai n’amai ɗuula gaini firiyi, Tuku afti, firiya abai gara, Tiki huwaŋai sûûri suura zi firiyi, Buri EPIƊ-ƊAI a na sa arai zi pi wiiɗi ɗaini, a na hiina haw buriɗi na murgakai na wiini.

¹⁴Yeruzalem te naka te muɗa ɓa: EPIƊ-ƊAI a hinaŋa edi mak. EPIƊ-ƊAI midini a wula gaya cikeŋ.

¹⁵Amma EPIƊ-ƊAI a na waya seŋ maini nɵa: Muni midiɗi a kiɗa a wula gaini ahiɗi ɗi? Ahi n’a niyasi warɗi par ɗa, aga te hiina haw burini kai ɗi? Koo ɓa midiɗi a kiɗa a wula wala gaini kaw, Ta ɗa, mada aga a wula gaiku kai.

¹⁶Tala mu ɗo yikiku aŋ war bobur ta. Zlaga na wiiku a na wuni ara kureɗ.

¹⁷Yeruzalem, aliku e ɗa na luwisi aha aŋ rguku amai, amma nagai n’e huduku azumai, e zuku aŋ greŋ ɗa aga e yimi warɗi edi suku par gaigai.

¹⁸Yima arku amai, tala arku ɵimaku pɗem! tala, aliku paŋ e ɗa diŋgisi, e ɗa hilisi aha suku, Jre jaŋ, -a miɗi na sini EPIƊ-ƊAI par, aga ku wiiɗi suku maini wazagai zi gan nɵa. Aga ku rgiɗi wuzaku maini saŋtir na ɓulumi n’e diri e sitini wiini wus te rgaŋ wuzaɗi nɵa.

¹⁹Nkam, greŋ na k’aŋ warni, gaini hlaiku na gai tûûri edi, gaini afti zi deeɓer hanɗa, wuzamu sek ɗa, aga a tika ɗai kai, nagai n’e ɗika e kirpuku ɗa, aga e yimi siɗi edi suku par gaigai.

²⁰Aliku n’e ɓirwuku edi gaiɗi ɗa, aga e muɗuku kureɗ ɓa: Hlai ɗa aŋ siyi gai hiɵi gara, a kiɗiyi kai, siyi hlai zamai, kapai mi simni warni.

²¹Aga ku zilba suku ɓa: ali hanɗa a siɗaŋa ɗa asiya ɗa, Buri mu nafu ali ta kai, mu nafu mɗaŋ. Mu nafu edi midini afti zamai, gai birgi edi su: a wûliɗi ali hanɗa amai ɗa asiya ɗa? Mu nafu kiya ktai, ali nagai e ɗifu wata ɗa?

²²Epiɗ-ɗai Alaw a na muɗa maini nɵa, aga mu yima ta amai wiini pnzibaɗi ɗai, mu yimiɗi drapo na wiya amai wiiɗi ɗai, aga e libiɗisi aliku na maɵagai amai tiɗi ɗaw ɗaw, e libiɗisi aliku na falakai amai wulaɗi lai.

²³Paakai aga e bindi aŋ ɗai na maɵagai n’e suku simi muku, mairamai aga e bindi aŋ falakai n’e suku simi muku lai. Aga e hûrgi azumai wuzaku, arɗi gai pi azumai arni afti, e hiŋgi alogodo n’azuku edi; kapai a yima muduku ɓa Ta m’EPIƊ-ƊAI, nagai n’e pɵi mada ɗa, siyer aga a yimiɗi kai.

²⁴Der na min hatam na wiini ɗif zi hatam ɗa, ɗif a kiɗa a waisi a mulaŋ tini par ɗi? Ɗif na jre a nava wala li ɗa, a kiɗa a tika edi tini par ɗi?

²⁵Buri nɵa EPIƊ-ƊAI a na muɗa maini nɵa: wala na ɗif zi hatam a navaŋ li ɗa, a kiɗa a tika edi, der na min hatam na wiini ɗif zi kaarai ɗa, a kiɗa a mula tini par lai Nagai n’e hitimuku ɗa, aga mu hitimiɗi, aga mu kurɗiɗisi aliku edi lai.

²⁶Ngai n’e kuruku ɗa aga mu ziɗi dewele midiɗi aŋ lmi neŋɗi dama, aga e ciini gaini felɗi, maini gaini vin na hehe nɵa, nɵa ɗai paŋ aga e siɗi ɓa ta m’EPIƊ-ƊAI, ɗif n’a kurɗuku edi, ni n’a wurukusi edi, Alaw zi Spak na wiini Yakob.