Read Mousgoum Esaya 5 Bible Online

Esaya 5 - Mousgoum bible

Esaya 5

¹Hiniŋa aŋ zina yama burini marmaya, a yama na marmaya zi diri gara a zinaŋ burini zardeŋ zi vin na wiini. Marmaya zardeŋni zi vin naka amai ezini boŋor z'alam.

²A hirma hlai amai, a vara kiryitai edi, a pa ali luwuŋ na ai futini woni, a rga poriyo zi gɗam amlai arba, a zizina hlai n’e cipiɗi vin warni lai. A baiya ɓ'aga a wa ali na pɗamai, ammaa wa ɗa a na maafani.

³Tiyana, tiki ɗai na Yeruzalem gaiɗi na Yuda zitiyi sariya n’arba gaini zardeŋ zi vinŋa ɗa!

⁴A hina zamai ɗa ma ɗa? Na mu za siɗi kai ɗa a ma ɗa? Won hlai na mu baiya ɓ'aga te wa ali na pɗemai ɗa, te wa ɗa a na maafanai buri maɗa?

⁵Pɗem, mu dara mu miɗiki wala na mu dara mu zaŋ sini zardeŋ zi vinŋa ɗa. Aga mu mula ɵaɓ na sini edi, kapai wazagai a lumaŋ wiini, aga mu co baŋa arni ɵaga ɗa co kapai ɗai n’e vigi ɗa e kirpiŋ azumai pin eziɗi.

⁶Aga mu bundaŋ aŋ basga na kadai su, Ɗif aga a caw tini edi kai, a hirma pini kaalai, aga a diya wiini ɗa a hedek gaini duvuɗvuɗ. Aga mu miɗini wiini ɗugul buri a hina faŋ a ɵa warni kai.

⁷Zardeŋ zi vin na wiini EPIƊ-ƊAI zi Spak paŋ, e ɗi pinzibaɗi Izrayel, ɗai na Yuda e ɗi luwoŋai n’a daraŋ gara ɗa lai. A baiya tiɗi par a sda na jre, amma a nava ɗa a sda na meefeŋ A baiya ɗa a jre-ɗikat amma a ɵina ɗa a tuwi na wiiɗi na horofai.

⁸Haw buriɗi ɗai n’e wûri hlaiɗi na murgakai, na walaɗi aŋ kai, aŋ riyi dalamɗi wuzaɗi sek sek, n’e mili vowaiɗi na mugakai, aŋ riyi na wiiɗi edi sek sek lai, haa e tiki hlai paŋ kafa, e hini midini afti e ɗi nagai tar.

⁹Tili wala n’EPIƊ-ƊAI zi Spak paŋ a haŋ mini na mu ɵinaŋ a na maini nlza: Jre jaŋ, dalamai na viya hanɗa aga a tuura edi kafa, dalamai n’abakai najuvai hanɗa, ɗif aga a sumna warni kir kai.

¹⁰Zardeŋ zi vin n’a kiɗa za peke ɵaara ɗa, warni par ɗif a nava litir doogo doogo ɵim kai, ɗif na suuɗa seyem azumai kilo miya ɗaw ɗa, a haɗa li abai ɗa a kilo doogo bas.

¹¹Haw buriɗi ɗai n’e ɵi siɗi gorof, aŋ piyi wala zi ci na ɗewek, gaiɗi nagai na futi te niwiiɗisi edi pin ci ɗa lai.

¹²Adill gaini gaŋgraŋ, gaŋga gaini algeta a suura war hlaiɗi zi ci, e simi, e ci min fetɗi lai amma e siɗi wala n’EPIƊ-ƊAI a na zaŋ ɗa kai. E tili sda n’a na zaŋ gaini tini kaalai.

¹³Buri nɵa, EPIƊ-ƊAI a na muɗa maini nɵa: Ɗaiŋa aga e kiɗi edi aŋ bege buri e firiyi e ɵini kai. Abakai zi ɵi wuze wiyamai aga te fiɗiɗi edi, vok n’a hina ɗa, sai aga te vadaŋ edi lai.

¹⁴Nɵa hlai zi simni na wiiɗi ɗai zi mri aga a mala gurɗokni mal, A malaŋ edi abai mal, n’abakai na war fuŋ gaiɗi vok na waŋ lai, aga e niyi azumai warni, gaini suuraɗ gaini firyiɗi lai.

¹⁵Ɗai murɗakai e tiki siyer li, ɗai e ga e wiyi azumai, kûlûni-si na wiiɗi ɗai ɗa aga a waya azumai.

¹⁶EPIƊ-ƊAI zi Spak paŋ aga a siŋkiti abaini edi warɗi sariya na jre, Alaw na sɗik aga a siŋka sɗikni edi war jre- ɗikat lai.

¹⁷Adumai aga a suma kuzum woni maini n’edi war hlai na farai a suma woni nɵa, Ɗai n’edi par aga e mili hlaiɗi ɗai zi farai n’a tuura edi ɗa

¹⁸Haw gara buriɗi nagai n’e nigi sin meefeŋ gaini jaɓ na wiini eles n’e sipi tuwurɗi gaini jaɓ n’e sipi saret gaini lai.

¹⁹N'e miɗi ɓa: A za wiini witaw ta ta, n’a firya a zaŋ ɗa a zaŋ witaw ta, kapai mi tiliŋ haw! Wazagai n’Alaw na Siɗik na wiiɗi Izrayel a hinaŋ warni ɗa, a vaŋsi amai haw, kapai mi siɗiŋ

²⁰Haw gara buriɗi nagai n’e yiki wala na meefeŋ ɓa pɗem, na pɗem ɓa meefeŋ, n’e bindi gegeŋ aŋ gaglai, gaglai aŋ gegeŋ lai. N'e bindi wala na ɗewek aŋ wala na nem, na nem ɗa aŋ wala na ɗewek lai.

²¹Haw gara buriɗi nagai n’e siɗi siɗi ɓa e ɗi na yalakai, n’e yiki siɗi ɓa e ɗi zi siɗi gara!

²²Haw gar buriɗi nagai n’e siɗi siɗi maɵagai gara war wala zi ci, aŋ gaŋgalaŋai war ɵihiɗini wazagai zi ci.

²³E ɵi ɗif na tin war seŋ ɗa su, burini katu, amma ɗif na jre ɗa e zitini sariya na pɗemi kai.

²⁴Buri nɵa, sirdaiɗi aga a hofa, flerɗi smer aga a fanaŋ maini alogodo nɵa afu aga a yiɗi edi maini evek, maini aŋjama n’e miliŋli min afu a ya edi nɵa. Buri ɓa e yimi gadai zi ɗû na wiini EPIƊ-ƊAI zi Spak paŋ kai. E ɗiyi sin seŋ na wiini Alaw na sɗik na wiiɗi Izrayel ɗa kai.

²⁵Buri nɵa EPIƊ-ƊAI a za hi siɗi ɗaini ta, a yima tini amai, a ɵiɓiɗi, Huwaŋai a ziriya, kopoŋɗi zi mri war futi puk puk maini zilgit nɵa. Amma gaini hanɗa paŋ ɗa, hiyni a tika azumai kai Tini te na amai kaai ɗaai.

²⁶EPIƊ-ƊAI a yima wala zi siŋki ktai amai wiini pinziba na gaigai par, a yiba huwit aŋ yikiɗisi edi min koŋɗi yai par, Tili e hilisi witaw, kokolai tar.

²⁷Arbaɗi ɗa, ɗif na gaini kayai sini aŋ kai, Ktai n’a kɵiŋa aŋ kai, n’a duŋra aŋ kai, na kala weseŋ aŋ kaalai. Ktai na saŋtir na wuzani gaini pli su aŋ kai, na sogom na midini harabakni gai ruwi raw aŋ kaalai.

²⁸Ɓarawɗi mini sweɗ sweɗ, taŋɗi gai gini gaŋ gaŋ, tetrek n’ezini plasaiɗi gdaŋai maini ali-fuŋ ɵa, Ezini saretaiɗi zi gaw ɗa a guna maini berber nɵa.

²⁹E nuumi maiɗi gurnai na muni nɵa E nuumi maini ali gurnai nɵa, e ɓiri, E yimi wala n’e ɗa birgiŋ ɗa, e hili gaini Ɗif a siɗa aŋ ɵaŋ tiɗi par kai.

³⁰Amma mefeŋ ktai, aga e nivi ɓarai, maini wulani yem-ra n’abai ɗa nɵa. Ɗai aga e tili afti ɗa: E tili ɗa a gegeŋ gaini gir, hlai zi digi aga a bunda gaglai ɗa gegeŋ.